MARK 2

Sheikasha̱ Akhali Raikhami

(Mat 9.1-8; Lk 5.17-26)

1Zimiksho khani kathumthangwui thili Jishuna Capernaumli hanunga kala a unghaira kaji pao ngayaohaowa. 2Chieina mi kachungkha rākazipta khamongphei eina tangda pamkhavai maleithuwa; kala Jishuna athumli pao hāshokpama. 3#Mat 9.2-8; Lk 5.18-26. Kala sheikasha̱ mi akhali mi matina ngava̱rai. 4Mi chungnāhaida awui ngalemli mazangpaithuda, athumna shimtung lānphutlaga akhur chiwui eina kakazā mipa chili pet eina phonda chihotai. 5Jishuna athumwui shitkasang chi theilaga sheikasha̱pali, “Inaomayara, nawui morei pheomihaira.” da hānga.

6Chitharan pamkasa ain kathemabingna athumwui ningli machuka, 7“Kathada hipāna hithada matuihaokhala? Hi Vareli kachipat tuina. Vare maningla morei pheomishapa khipā leikhala?”

8Athumwui ningli khamachuk chi heng sāda theihaoda Jishuna hānga, “Khisāda nathumwui ningli machukphāphākhala? 9Sheikasha̱pali ‘Nawui morei pheomihaira’ kaji paimeika ‘Ngakarthuida nawui pet khuiphungda zatulu’ kaji paimeikhala? 10Kha miwui Naomayarana okathuili morei pheomikashapwui sāshap pangshap lei kaji nathumli ina shākhi mira.” Chieina ana sheikasha̱pali ngareivāda hānga; 11“Ngakarthuilu, nawui pet khuiphungda shimli ungulu.” 12#Mat 9.33. Ana ngakarthuilaga hengsāda awui pet khuiphungda athumwui mangāli phongshar eina zatshokhaowa. Chi kathei eina athum matakhakhaida Vareli sochikatta hānga, “Hikatha hi rida ithum matheilakranga.”

Jishuna Levili Kaho

(Mat 9.9-13; Lk 5.27-32)

13Jishuna shamadrupheishong hanvāluishithaowa kala mi kachungkha rākazipta ana tamchithei. 14#Mat 9.9-13; Lk 5.27-32. Ana zatvāmamān kaji eina Alphaeuswui naomayara Levi khāshinā khalokpamli pamkasa theida ali hānga, “Ithi shurlu.” Chieina ana ngakarthuida athi shurthuwa.

15Jishuna Leviwui shimli phāshakta leilakha khāshinā khaloka kala morei kaphunga mi kachungkha athi shurrāda awui sākhangatha̱bingli ngasoda phazāruma. 16#Ots 23.9. Kala Jishuna morei kaphungbing eina khāshinā khalokabingli ngasoda phazākhangarum kathei eina ain kathemabing eina Phariseebingna awui sākhangatha̱bingli ngahāna, “Khi sāda ana khāshinā khalokabing eina morei kaphungbingli phazākharumkhala?”

17Jishuna chi kashā eina athumli hānga, “Kazāt makhaleibingna khānong mahomana, kha kakazābingna kahona. Ina khamashungbingli hokhuikida kharā maningla, kha morei kaphungbingli hokhuikida kharāna.”

Kakhumwui pongli Khangahān

(Mat 9.14-17; 5.33-39)

18 # Mat 9.14-17; Lk 5.33-38. Thangkha Johnwui sākhangatha̱bing eina Phariseebing khumda leilakha mi kaikhana ali rāngahāna, “John eina Phariseebingwui sākhangatha̱bingna khumlaga khiwui vang eina nawui sākhangatha̱bingna makhumthukhala?” 19Chieina Jishuna athumli hānga, “Khām kahaipa china shakzātli kharābingli ngasopamda leilakha athum khumpairala? Khām kahaia china athumli ngasopamda leilakha eina tangda makhumpaimana. 20#Lk 17.22. Kha mākhām kahaia chili athumwui eina khuikathui atam rārāsāra, chithang athum khumnaora. 21Mi khipānakha kachama kachonli kadhara chonsā mataksangmana, tāksangakha kadhara chonsā chi kākshokhaoda zakshimeikhar kākhaowa. 22Kala khipānakha drakhāra̱ sangkhavai sāhuikhao kachamli drakhāra̱ kadhar mathaisangmana, thaisangakha drakhāra̱ china khao chi ngawokkhaida drākhāra̱la, khaola shimanhaowa, kha drakhāra̱ kadhar chiya kadhara sāhuikhaowui vangna.”

Sabbathwui pongli Khangahān

(Mat 12.1-8; Lk 6.1-5)

23 # Mat 12.1-8; Lk 6.1-5. #Khal 23.25. Sabbaththang Jishuna luivāk vai, kala athumna zatmamānda leilakha awui sākhangatha̱bingna mā mazokshai. 24Chieina Phariseebingna ali, “Yanglu, khisāda athumna Sabbaththang ain kakai ot sākhala?” 25Kala ana athumli hānga, “Davidna darkar kasā kala thaikahai tharan ali ngasokazatbingli ngasoda: 26#1 Sam 21.1-6; 2 Sam 8.17. Abiatharna pāngmon kharei sāda leilakha ana kathada Varewui shimli zanglaga pāngmonbing maningla khangateibingna shaikashar Ngasokhamiwui khamui chi shaihao kala ali ngasokazatbinglila mishaihao kaji mapākhuihaira?” 27#Sho 23.12; Khal 5.14. Kala ana athumli hānga, “Sabbath hi miwui vangna, mi hi Sabbathwui vang sākahai maningmana; 28chiwui vang eina miwui Naomayarana Sabbathwui akhavāna.”

Currently Selected:

MARK 2: TANGBSI

Highlight

Copy