MICAH 7
7
Israelwui Khamakhao Acham
1I kalākashi! kaja I lumkachāngwui athei phākhui kahai,
drakhāthei arong eina phākhuiser kahai thāda:
amazān akha eina tangda shaikhavai maleithura,
iningna shaikhangai minkhare khaorātheila maleithura.
2Vare katheia mi okathuiwui eina shimānhaira,
kala mashun eina kasā mi khipākha maleithura;
athum saikora asheewui vang rimpama,
kala mi kachiva̱ khailan singlaga achināli kharoma.
3Makaphāwui vang athumna themlāk eina sai;
wungnao eina bichar kasaana pheizā poi,
kala khangama mi china awui makaphā sākhangai chi hāngzata,
hithāda athumna otsakruma.
4Athumwui ngachaili phāmeikap kaje chiya phanāng kathāna,
mashungmeikap kajena ka̱shāt kathāna.
Athumli yangki kaji kala athumli tandi miki kaji atam rāhaira,
ara athum pa̱ngapāki kaji nganaihaira.
5Khongnainaoli machihānalu,
ngasotnaoli mashitsangalu;
preiva̱li kahāng eina tangda mahangphāphālu;
6 #
Mat 10.21,35,36; Mk 13.12; Lk 12.53. kaja anaomayarana avāva̱li ningkachai,
anao ngalāva̱na ava̱va̱li ngaruka arihāva̱na aniva̱li chithāpapama,
yangkashe chiya a khalatta awui shimkhurwui mipapama.
7Kha ichanga, iva Proholi yangtha̱ra,
Iwui huikhame Vareli ngaraitha̱ra;
iwui Varena ili shāmira.
Prohona Huikhami Khuirāmi
8O iwui yangkashe, iwuitungli mamathānalu;
ina kongluilala ngakarthuiluira;
Ina tangkhamangli kapam tharan,
Prohona iwui kahor ngasāra.
9 Prohowui malungkhavāt chi Ina phungra.
Kaja ina awui mangāli morei sāhaira,
ana iwui vang maphayatmiranglakha,
kala tuitak matāmiranglakha eina tangda phungra.
Ana ili kahorli khuishokmira;
awui ngatangkhami chi ina theira.
10Chiwui thili iwui yangkashena theira,
kala “Nawui Vare Proho kali leikhala?”
da kahāngpāva̱ khayāmalāra.
Imikna ali yanggazira kala chānreiwui chifa thāda naikazamra.
11Nawui raipan sākakā zimik rārāda lei!
chithang nawui thari kachungkha mataisangra.
12Chithanghon Assyriawui eina Egypt,
Egyptwui eina Kong, shamadruwui eina shamadru kala phungreiwui eina phungrei,
chiwui alungli khalei athumna nawuili rāra.
13Kha okathui hi mibingwui vang eina,
kala athumwui otsakwui vang eina ramcho sāhaora.
14Ngahong thingpheili ngachakyāng eina khalei,
nawui yaobingli khāmshui singda hommilu;
achālakhawui thāda athumli Bashan eina Gileadli phazāranu.
15Egypt ngaleiwui eina nathumna shokthang thāda,
Ina athumli matakhak kahai ot sāchitheira.
16Yurbingna chi theida athumwui pangshap
saikorawui vang khayakhaora;
athumna athumwui pāng khamor kafara;
athumwui khanā ngakhokhaora;
17athumna phara̱ thāda chifa malekra,
ngawokazata yur thāda;
athumwui raipanwui eina kathirriri shokra,
kala Proho ithumwui Vareli athumna ngacheerangrang latungra,
kala nawui vang eina athum ngacheera.
18Khayonkhamāng pheokhami na kathā Vare khipā lei?
awui shimluikat shākkahaiwui vang salāng kahaili chihokhami khipā lei?
Ana katang mavaila awui malungkhavāt makaziphaimana kaja makhangachei leikashili awui ringkaphā lei.
19Ana ithumwuitungli lumashanluishitra,
ithumwui khayonkhamāng phei eina naishanhaora.
Nana ithumwui morei saikora kathuka shamadruli horsanghaora.
20Achālakha nana ishāvā ngarāli ngashitkhami thāda,
nana Jacobli ningkatong kala Abrahamli leikashi chi chitheira.
Currently Selected:
MICAH 7: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
