MICAH 6
6
Israelwuitungli Prohowui Tuingaphun
1 Prohona hāngda khalei nganālu:
Ngakarthuilu, phungreili nawui mashun phayatlu,
kala phungrābingna nawui akhon shāranu.
2Nganālu, phungreibing kala katang makhavaia okathuiwui shimphunga nathum
Prohowui makhamayā tui nganālu,
kaja Prohona awui mibingli makhamayā akha lei,
kala ana Israelli ngasungra.
3“O iwui mibing, ina nali khi sāhaokhala?
Kathāda ina nali chotngasakhaokhala?
Ili ngahānkālu!
4 #
Sho 4.10-16; 12.50-51; 15.20. Kaja ina nali Egyptwui eina khuiunga,
kala khalap kahaiwui eina ngatangkhui;
nathumwui vang ina Moses, Aaron
kala Mariam chihorai.
5 #
Mis 22.2—24.25; Jos 3.1—4.19. O iwui mibing, Moabwui awunga Balakna khiwor sākhala kaji;
kala Beorwui naomayara Balaamna ali khi ngahānkā;
kala Shittimwui eina Gilgal khavāli khi shokkhala kaji phaningunglu;
chieina nathumna Prohowui huikhami otsak chi theipaira.”
6Khi singlaga ina Prohowui mangāli rāda,
atungshong khalei Varewui mangāli ikhalatta khorumrakhala?
Awui mangāli rikkatā kachigat,
kumkhawui seinao singlaga vārala?
7Yaovā thingthing, thao kongrā thingkha miakha,
Prohona ningyāng ungrala?
Iwui khayonkhamāngwui vang iwui naochizai,
imanglāwui moreiwui vang, iwui asāwui athei mirala?
8O mikumo, kaphā chi khikhala;
kaji Prohona chitheimihaira kala Prohona nawui eina khi ningkachāngkhala kaji chiya mashun eina kasā,
lukhamashanli kakahao,
kala ningmazingda Vareli ngasokazat maningmala?
9Keinungli khaleibingli Prohona hānga—
kala namingli khangachee chi thangkhameina:
“Nganālu, O shangbing kala keinungwui mibing!
10Makaphā makhayāwui shimli makaphā makhayā lupāchum kahai,
kala khonshi kahai kateizā khavai khāntam chi ina malairarrala?
11Makaphā makhayāwui khāntam eina ngasoda ina mipa chili pheomirala?
kala kazikakazāwui khao eina ngasoda pheomirala?
12Nawui kashanga mibing khangashaona pemtinghai;
nawui ramli kapambing kakapik tuimang matui,
kala athumwui male kakapikana.
13Chieina ina nali pāng parhaira,
kala nawui moreiwui vang ramcho sāngasaka.
14Nana phazāra, kha mathomara,
thaishon thaithaira;
nana taihaira, kha makharuikhuimara,
kala kharuikhui kahai chi raighai eina shimān ngasakra.
15Nana yaora kha mahātkhuimara;
nana olive surra,
kha nakhalatta khaneo masamphangmara;
nana drakhāthei surra, kha khamang masamphangmara.
16 #
1 Wung 16.23-34; 21.25-26. Kaja nana Omriwui shiyan-chikan,
kala Ahab shimkhurwui shiyan-chikan mayonhaira;
kala athumwui khamachin athishurda zatra;
chieina ina nali macho ngasakra,
kala nawui ramli kasikharora ngasāra,
chithāda sāda mibingwui khamashāt nana phungra.”
Currently Selected:
MICAH 6: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
