MATTHEW 7

Kateili Bichar Kasā

(Lk 6.37-38,41-42)

1 # Lk 6.37-38; Mk 4.24; Rom 2.1; 14.10. “Bichar masaalu, chithākha nathumlila bichar masāmara. 2Kaja nathumna bichar kasā tākam eina nathumlila bichar sāra, kala nathumna kateili khān katamyākha nathumlila tamra. 3#Lk 6.41-42. Khisāda nachināwui mikli khayim kazang chi theilaga namikli thingngumrikha kazang chi matheithukhala? 4Lha namikli thingngumrikkha zanglaga kathada nachināli, namikli khayim kazang chi ina kheimiga da hāngpairakhala? 5He, phākakhaninga! Rimeikapta namikli thingngumrikha kazang khayim chi kheishokhaifalu, chiwui thili nachināwui mikli kazang khayim chi kheishokmi khavai mathingrik eina theira.

6“Kathara ot chi fali mamialu, athumna hanungda makeipaishina; kala khayingmukta chi hokwui mangāli mahorsangalu, athumna naikazazamlaga naiphumhaipaishina.

Polu, Phālu, Shaolu

(Lk 11.9-13)

7 # Lk 11.9-13; Mk 11.24; Joh 15.7; 16.23-24; Jam 4.3; 1 Joh 3.22; 5.14. “Polu, nali mira; phālu, nana samphangra; shaolu, nali shomira. 8Kaja kapo mi kachiva̱na samphangra kala kaphā mi china samphangra kala kashaoalila shomira. 9Lha nathumwui ngachaili avāva̱ khipāna anaomayarana khamui poakha ngalunggui mikhala? 10Kala ana khaih poakha ali phara̱ mida? 11Nathum maphāsālala nathumwui naongarāli khamathā ot mitheiakha, kazingramli khaleia nathumwui Avāna ali kapobingli kayākha mataimeida mirakhala?

12 # Lk 6.31. “Chiwui vang eina nathumwui ningkachachāng chi mibingli sāmi ngasakhangai thada nathumnala athumli sāmilu; khikhalajila hi ain eina marāntuina.

Khamasha̱ Ngavei

(Lk 13.24)

13 # Lk 13.23-24; Jer 21.8; Khal 30.19; Joh 14.6; 10.7. “Khamasha̱ ngavei eina zanglu; khikhalajila shimān khavaiwui ngavei chi mashālaka kala shongfa chi zatphālaka, kala chi eina kazang mi chunglaka. 14Kharing mirinli thanvā khavai ngavei chiya masha̱laka, kala shongfa chi saklaka kala chi mi kateokhamāngna phākhuiya.

Thingrong kala chiwui Athei

(Lk 6.43-44)

15 # Mat 24.11; 24.; Ezek 22.27; 1 Joh 4.1; Joh 10.12. “Minama marānbingli ngasharlu, athumna yaohui ngavaikhaninglaga rai, kha alungle athum sākakathān ramfa kathāna. 16#Lk 6.43-44; Mat 12.33-35; Mat 3.10; Jam 3.12; Lk 13.7. Nathumna athumwui kasākhavā eina theikhuira. Ka̱shātrongli drakhāthei kala kuivārongli khaorāthei mamatheingayaomana. 17Chithada sāda khamathā thingrong kachiva̱na kaphā athei mathei, kha makaphā thingrongna zakkashi athei mathei. 18Khamathā thingrongna zakkashi athei mamatheipaimana, lah zakkashi thingrongna khamathā athei mamatheipaimana. 19Khamathā athei makhamathei thingrong kachiva̱ ta̱teklaga meilungli horsanghaora. 20Chithada sāda athumli nathumna athumwui athei chieina theira.

Nathumli I Matheisālakmana

(Lk 13.25-27)

21 # Lk 6.46. “Ili, ‘Proho, Proho’ da khangakaoa mi kachiva̱ kazing wungramli zangki kaji maningmana, kha kazingramli khaleia iwui Avāwui kaphaning kasaa china zangra. 22#Lk 13.26-27; Mat 25.12; Laa 6.8. Chithanghon mi kachungkhana ili ‘Proho, Proho, ithumna nawui sāshap-pangshap chieina mamarānmala? Kala nawui pangshap eina kameo makashamshokmala? Nawui sāshap-pangshap chiwui alungli ithumna matakhak kahai tarākha masāmala?’ da hāngra. 23Chieina ina athumli, ‘Nathumli I matheisālakmana, iwui eina thulu, makaphā kasābing’ da hāngra.

Shim Kasaa Khani

(Lk 6.47-49)

24 # Lk 6.47-49; Jam 1.22-25. “Chieina iwui tuibing hi shākhuilaga kasā mi kachiva̱ lunghārtungli shim sākā kahaia thangkhama mi kathā ngasāra; 25kazing roda tara̱ phonga kala masinala shim chili panglāk eina ungphanza̱ya, kha shim chi maja̱mana khiwui vangkhala jilaga shim chi lunghārtungli sakā kahaina. 26Kha iwui tuibing hi shākhuilaga chi makasā mi kachiva̱ chiya awui shim situitungli sākā kahaia mangkhama̱a mi kathāna. 27Kazing roda tara̱ phonga kala masina shim chili ungphankaza̱ eina shim chi ja̱tāhaowa.”

Jishuwui Sāshap-pangshap

(Mk 1.22; Lk 4.32)

28 # Mk 1.22; Lk 4.32; Mat 11.1; 13.53; 19.1; 26.1. Jishuna hibing hi hāngser kahaiwui thili awui tamkachithei chi theilaga yarui saikora matakhakhaowa. 29Kaja ain kathembingna tamkachithei mathāla ana sāshap-pangshap eina tamchithei.

Currently Selected:

MATTHEW 7: TANGBSI

Highlight

Copy