MATTHEW 8
8
Phārrei Kakazā Mi akhali Raikhami
(Mk 1.40-45; Lk 5.12-16)
1Jishuna phungreiwui eina katā tharan mi kachungkhana awui thi shura. 2#Mk 1.40-44; Lk 5.12-14. #Mat 9.18; 15.25; 18.26; 20.20; Joh 9.38. Kala yanglu, phārrei kakazā mi akha rāda awui mangāli khuktizangda hānga, “Proho, nana tharmiga jiakha ili tharmishapa.”
3Chieina Jishuna awui pāng katingvāda ali saza̱da hānga, “Ina sāmilakra, tharchaohaolu.” Ngalāngda awui khangaphār chi tharhaowa. 4#Mk 3.12; 5.43; 7.36; 8.30; 9.9; Pāng 14.2. Jishuna ali hānga, “Khipālikha mahāngalu, kha vālu, nawui phasā chi pāngmonli achitheilu, kala mibingna theikhui khavai Mosesna kaso kahai chigatki kaji chi achigatlu.”
Shipai Akhavā akhawui Shitkasang
(Lk 7.1-10)
5 #
Lk 7.1-10; Joh 4.46-53. Jishuna Capernaumli vākazang tharan shipai shākhawui akhavā akhana awui mangāshong rālaga ali khorumda hānga, 6“Amei, iwui rao akha phasā ngakaida thihailaga marlak eina kazāda shimli pida lei.” 7Chieina Jishuna ali hānga, “Ina rāda raimira.”
8Kha shipai shākhawui akhavā china ali ngahānkai, “Amei, nali iwui shimli chizunki kaji iwui matik maningmana; kha thada tui chimāng hāngmimalu, china iwui rao raihaora, 9kaja ila iwui azingli shipai ngavālaga akhavābingwui azingli ot kasā mina, kala iwui azinglila raimi tarākha lei; kala ina akhali ‘Vālu’ jiakha ana vai, kala khangatei akhali ‘Rālu’ jiakha ana rai kala iwui raoli ‘Hi sālu’ jiakha ana chi sai.”
10Jishuna chi kashā eina matakhakhaida athi kashurabingli hānga, “Kachangkhat eina ina nathumli kahāngna, Israelnaobingwui alungli ina hikathā shitkasang masamphanglakmana. 11#Lk 13.28-29; Isa 49.12; 59.19; Mal 1.11; Laa 107.3. Ina nathumli kahāngna, mi kachungkha zingsho zingtunwui eina rāda kazing wungramli Abraham, Isaac kala Jacobli phazārumra, 12#Mat 13.42,50; 22.13; 24.51; 25.30; Lk 13.28. kha wungramwui naomayarabingli khamayara tangkhamang horshokhaora, apam chili athum kachapla chapra kala ahāla tarira.” 13Jishuna shipai akhavā chili hānga, “Ungulu, kala nawui shitkasang athishurda shokranu.” Kala rao chi pung chichang chili raichaohaowa.
Jishuna Mi Kachungkhali Raikhami
(Mk 1.29-34; Lk 4.38-41)
14 #
Mk 1.29-34; Lk 4.38-41; Mat 4.23-24. Jishuna Peterwui shimli akazang tharan Petershi aniva̱ kharurda pikasā thei. 15Jishuna awui pāngli sākaza̱ eina kakharur chi raihaowa. Chieina ana ngakarthuida otram ngatha̱mi.
16Chithang ngazin kameo kazanga mi kachungkha awuili khuirai kala ana tuikhurnao akha eina kameobing chi kashamshokserhaowa, kala kakazā saikora raimisera. 17#Isa 53.4. Hi Isaiah marānna “Ana ithumwui kakazā saikora khuithuimiya kala ithumwui kazāt saikora phungmiya” da hāngkahai ungshung khavaina.
Jishuwui Thishurki kajebing
(Lk 9.57-62)
18 #
Lk 9.57-60; Mk 4.35; Lk 8.22. Ara mi kachungkhana ali rākuikhanam chi theida ngayi lākhavāk vāser khavai ana kasoi. 19Kala ain kathema akhana ali rāhānga, “Ojā, nana kazazatpam kachida I nathi shurga.”
20Chieina Jishuna ali hānga, “Ramfawui akhurla lei, khamasaili yongkazata vānaobingwui athipla lei, kha miwui Naomyarawui ngayaizangda ngasāmkhui khavai apam akhala maleimana.”
21Khangatei sākhangatha̱ akhana ali hānga, “Amei, rida ishāvāli ungchifahaifaga.”
22 #
Mat 9.9; Joh 1.43; 21.19. Kha Jishuna ali hānga, “Ithi shurlu, kathena athum khalattawui kathi chifa khavai haihaolu.”
Jishuna Siphan Zingrot Kakhām
(Mk 4.35-41; Lk 8.22-25)
23 #
Mk 4.36-41; Lk 8.22-25. Jishuna marikhong kākatong eina awui sākhangatha̱bingna athi shura. 24Kala yanglu, shamadruli siphan zingrot panglāk eina ngasha̱ungda marikhong chi tara̱ khangaphaona ngaphumki jihaowa, kha Jishuva piphuphaira̱sai. 25Chieina athumna ali amathotkhuida hānga, “Amei, ithumli kanmilu, ithum shimānki jiura.”
26 #
Mat 6.30; 14.31; 16.8. Ana athumli hānga, “Khisāda nathum ngacheehaokhala? He shitkasang makhalei mibing!” Chiwui thili ana ngakarthuida masi eina shamadru chili chingrihai kharara, chieina va̱rihaowa.
27Mi kachiva̱ matakhakhaida hāngngaroka, “Hi kachikathā mikhala? Masi kala shamdru eina tangda awui kahāng nganāli.”
Jishuna Kameo Kazanga Khanili Raikhami
(Mk 5.1-20; Lk 8.26-39)
28 #
Mk 5.1-17; Lk 8.26-37. Chiwui thili Jishuna lākhavāk kānkālaga Gadarea kaho ngalei chili vākashung tharan kameo kazanga mi khani chikhurpamwui eina shokta ali rāngaroka. Ani sāshilakhaoda mi khipākha shongfa chili mazatlengmana. 29#Wung 11.12; 2 Sam 16.10; Mk 1.24; Joh 2.4. Jishuli samphangkhaleoda anina vaoda hānga, “He Varewui Naomayara, inili nana khi sāki kajikhala? Atam maungshungranglakha nana inili rekharek khavai apam hili kharālā?”
30Atam chitharan athumwui eina katāda hok ashangva̱ akha phāzāzatta leisai. 31Chieina ali kameobing china, “Nana ithumli kashamshokra jiakha hok ashangva̱ chili khavāzang ngasakmilu” da poi.
32“Thulu” da Jishuna athumli hānga, chieina athumna shoklaga hokshang chili vāzanghaowa. Kala yanglu, hokshangva̱ chi shamadruphei amaitarenli yongkachuptāda tara̱li hikthatserhaowa.
33Hok kahombing china keinungli ngasamunglaga kashok otshot saikora kala kameo kazanga khani chili khi shokhaokhala kaji unghāngchithei.
34Yanglu, keinung chiwui mi katonga Jishuli ngarok khavai shoka; kala athumna ali kathei eina aramwui eina thuimihaolu da athumna rāpoi.
Currently Selected:
MATTHEW 8: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
