MATTHEW 6

Ngachonkhamiwui pongli Tamkachithei

1 # Mat 23.5. “Nathumna sākhangayi kaphā ot kasā chi mibingna mathei khavai ning ngasharlu, kaja nathumna chithei khavai saakha kazingli khalei nathumwui Avāwui eina sāman masamphangmara.

2“Chiwui vang eina nana kachikathā khavāta mi akhali khangachon khami tharan phākakhaningabingna synagogueli kala chānreili mibingna sovairanu da kasā thada yaruili masāchitheizatalu. 3Kha nana lemmet khami tharan, nawui yāshongna kasā chi nawui uishongli mathei ngasakalu, 4#Col 3.23-24. chithākha nawui lemmet khami chi khangathumli lei kala ngathumda katheia nathumwui Avāna nali sāman mira.

Seihā Kasāwui pongli Tamkachithei

(Lk 11.2-4)

5 # Mk 11.25; Lk 18.10-14. “Nathumna seihā kasā tharan phākakhaningbingna kasā thada masāphalungmara kaja athumva mina theivairanu da synagogueli kala chānreipheili nganinglaga seihā sākazat ningchanga. Ina nathumli kachangkhat kahāngna, athumna samphangkhangayi chi samphanghaira. 6Kha nana seihā kasā tharan nawui kāli zangda khamong shunghailaga mik eina makathei nathumwui Avāli seihā sālu, kala ngathum kahai saikora katheia nathumwui Avā china nali sāman mira.

7 # 1 Wung 18.25-29. “Nathumna seihā kasā tharan Gentilebingna tuicho sorngasaida kakhor thada masaalu, kaja tui kachungkha kahāngwui vang shāmira da athumna phaninga. 8#Mat 6.32; Lk 12.30. Athum mathālu kaja nathumna maporanglakha nathumwui khavāt chi nathumwui Avāna thei. 9#Lk 11.2-4. Chieina hithada seihā sālu:

‘Kazingramli khaleia ithumwui Avā, Naming tharmathengmeiranu,

10Nawui wungram rāshungmilu;

Kazingramli khavai thada,

Okathuilila nawui ning eina vaimilu.

11Aja ithumli thangthangwui kashakazā chi khamilu;

12Ithumli khayonkhamāng kasābingli ithumna pheomi kahai thada,

Ithumwui khayonkhamāngla kapheomilu;

13 # 2 Thes 3.3; Joh 17.15; Jam 1.13. Kala ithumli kasuili mazang ngasakmialu,

kha makaphāwui eina kanmilu.’

14 # Mat 18.35; Mk 11.25; Eph 4.32; Col 3.13. “Nathumna mibingwui khayonkhamāng pheomiakha, nathumwui kazingramwui Avānala nathumli pheomira. 15Kha nathumna mibingwui khayonkhamāng mapheomiakha, nathumwui Avānala nathumwui khayonkhamāng mapheomimara.

Kakhumwui pongli Tamkachithei

16 # Isa 58.5. “Nathumna kakhum tharan khanangzan eina phākakhaningbingna kasā thada mapamchitheialu, kaja athuma athumwui kakhum chi mibingna theivairanu da zakmai ngatei ngasaka. Ina nathumli kachangkhat kahāngna, athumna athumwui samphangrān chi samphanghaira. 17Kha nathumna kakhum tharan akuili thaola neolu kala maila ngatāpkhariklu. 18#Mat 6.4,6. Chieina nathumwui kakhum chi mina maningla kha ngathumda khaleia nathumwui Avāna theira; kala ngathumda katheia nathumwui Avāna nathumli sāman mira.

Kazingramli Lan Kakazip

(Lk 12.33-34)

19 # Lk 12.33-34; Mk 10.21; 1 Tim 6.17-19; Jam 5.1-3. “Nathum khalattawui vang okathuili lan makaziphaialu, aga̱-akaina shaihaipai kala maripaih paida shimānhaipai kala khalebingna shaokhailaga leethuihaipai. 20Kha nathum khalattawui vang kazingramli lan kaziphailu, chili aga̱-akainala mashaimara, maripaihla mapaimara kala khalebingnala shaokhaida maleekhuimara. 21Kaja nathumwui lan khaleipamli nathumwui ningla leira.

phasāwui Kahor

(Lk 11.34-36)

22 # Lk 11.34-36; Mat 20.15; Mk 7.22. “Mikna phasāwui thaomeina, namik mathingakha naphasā katonga horchamrihaira, 23kha namik mamathingakha naphasā katonga tangmangtinghaora. Chieina nawuili khalei kahor chi tangmanghaiakha, tangkhamang chi kayākha hakmahākhala!

Vare eina Lan

(Lk 16.13; 12.22-31)

24 # Lk 16.13. “Khipānakha akhavā khaniwui otram mangatha̱rarmana; kaja ana akhapāli yangkharinglaga akhapāli leishira, lah akhali mashitlaklaga akhapāli ningkachaira, nathumna Vare eina lanli otram mangatha̱rumpaimana.

25 # Lk 12.22-31; 10.41; 12.11; Phil 4.6; 1 Pet 5.7. “Chiwui vang eina ina nathumli kahāngna, nathumna ringkhavai khizā, khimangra, lah phasāwui vang khi ngavaira kajiwui vang malungmaringalu. Mirinna kashakazāli kala phasāna kashankachonli mamataimeimalā? 26#Mat 10.29. Kazingramli yongkazat vānaobingli yanglu, athumna khayaola, kahātla, chumli kazip kahaila maleimana. Chithālala kazingramli khalei nathumwui Avāna athumli mizai. Nathumna athumli aman masakmeimalā? 27#Laa 39.5. Nathumwui ngachaili khipāna malungringhaoda awui mirin angaritli khuiningkha mataisangshapkhala?

28“Khiwui vang eina nathumna kashankachonwui vang malungringkhala? Luiwui timrāwonbing kathada haksangkhala da machukyanglu, athum otla masāmana, sakla masāmana. 29#1 Wung 10.4-7. Chithālala ina nathumli kahāngna, Solomon eina tangda chiyākha tekmateida okthuisālala, awon akhawui khamathā thada mangavairarmana. 30#Mat 8.26; 14.31; 16.8. Luili aja wonlaga akhama meilungli horsanghaokikaje awonrongbingli Varena chiyākha mathada sāmiakha, nathumli ana sakmataimeikharda masāmimaralā? O, shitkasang kateoabing!

31“Chiwui vang eina ‘Ithum khi zāra?’ lah ‘Khi mangra?’ lah ‘Khi ngavairakhala?’ da malungmaringalu. 32Kaja Gentilebingna katonga hi phāzata; kala nathumna saikora hi darkar sai kaji nathumwui kazingramwui Avāna thei. 33#Mat 19.28; Mk 10.29-30; Lk 18.29-30. Kha rimeikapta, nathumna Varewui wungram kala awui khamashung khangarong chi phārifalu, chithākha saikora hi nathumli ngarumsangmira. 34Chiwui vang eina akhamawui vang malungmaringalu, akhamana akhamawui vang malungringhaora. Thangthangwui kakhanang chi thathangwui vang shapranu.

Currently Selected:

MATTHEW 6: TANGBSI

Highlight

Copy