MATTHEW 24

Khorumshim Shimanki kaji Hāngkhami

(Mk 13.1-2; Lk 21.5-6)

1 # Mk 13.1-31; Lk 21.1-33. Jishuna khorumshim chiwui eina thuiuki kaji eina awui sākhangatha̱bingna khorumshimwui shimbingwui pongli hānga. 2#Mat 26.61; 27.39-40; Lk 19.44; Joh 2.19. Kha Jishuna athumli ngahānkai, “Nathumna saikora hi katheina, maningmala? Ina kachangkhat nathumli kahāngna, mahorkathānhaila ngalung akhawuitungli ngalung akha leiki kaji akhala maleimara.”

Kakhanang Kachot kala Rekkakharek

(Mk 13.3-13; Lk 21.7-19)

3 # Lk 17.20; Mat 13.39,40,49; 28.20; 16.27. Jishuna Olive kaphungli pamlakha, sākhangatha̱bingna ngathumda ali rāngahāna, “Hi katharān shokrakhala, ithumli hāngmilu kala nana rāki kaji eina okathui ngachangki kajiwui machut khirakhala?”

4Chieina Jishuna ngahānkai, “Nathumli mathānngui khavai ning ngasharlu. 5#Mat 24.11,23-24; 1 Joh 2.18. Kaja mi kachungkhana iwui ming singda rālaga ‘Khrista chi ina’ da hāngra kala mi kachungkhali thannguira. 6#Phon 6.3-8,12-17; Isa 19.2. Nathumna katā khanaiwui raipao kashā tharan malung matātunghaialu, hikathā hi shokphalungra kha china khangachang atam maningmana. 7Yur akhana yur akhawuitungli, wungram akhana wungram akhawuitungli rai sāra. Apam ngatateidali chāmrei kala neina̱ kakhanuk shokra. 8Ot saikora hi nao pharātwui naokhara̱ haokaphok kathāna.

9 # Mat 10.17-18,22; Joh 15.18; 16.2. “Chiwui thili nathumli tukkhuida tandi mikhavai kala shaothat khavai misangra. Yur saikorana iwui vang eina nathumli yangkharingra. 10Kala chiwui thili kachungkhana yāmhaora, kala akha eina akha yansai ngarokra kala yangkharing ngarokra. 11Kala minama marān tarākha shokta mi kachungkhali thānnguira. 12kala makaphā-makhayā mataisanghaoda mi kachungkhawui leikashi suitāngasakra. 13#Mat 10.22; Phon 2.7. Kha khanao eina tangda khāngkashap mi chili huikhuira. 14#Mat 28.19; Rom 10.18. Kala wungramwui paokaphā hi miyur hupta shākhi mikhavai okathui peida hāshokra, kala chiwui thili khangachang chi rāra.

Khangachee Khangachā Otshot

(Mk 13.14-23; Lk 21.20-24)

15 # Dan 9.27; 11.31; 12.11. “Masai khangasak ningkakachai ot da marān Danielna hānghaikasa china katharapamli khanganing chi nathumna kathei tharan (pākakhuia china bhap tākhuiranu), 16Judeali leikasābingna phungreibingli yāmvāranu; 17#Lk 17.31. shimtungli leikasaa china tunglaga shimlungli khalei thongthāng mazangkhuiluiaranu, 18luili leikasāpā china kachon ungkhui khavai malatungaranu. 19#Lk 23.29. Iyāvo, atam chitharan nao vaikasābing eina na̱ shimankasābing! 20Nathumwui khayām chi sikachāng lah Sabbaththang mashok khavai seihā sālu. 21#Dan 12.1; Joel 2.2. Kaja chitharan shokki kaji kakhanang kachot chi haokaphokwui eina thuilaga aja rāshungda mashoklakranga, kala mashokluilakmara. 22Kala zimikshobing chi masha̱sang ngasakakha, mikumo akhala mahuikhuimara; kha kapangkhui kahai mibingwui vang eina zimikshobing chi sha̱sang ngasakra. 23Chiwui thili kachikathāna nali, ‘Yanglu, Khrista chi hili lei!’ lah ‘Chili leili’ da hānglala mashitsangalu. 24Kaja minama Khrista kala minama marānbing shokta, shapakha kapangkhui kahaibingli eina tangda thānngui khavai khudamla kala matakhak kahai otsakla kachungkha chitheira. 25Yanglu, ina nathumli sāngngarānda hāngkahaina.

26 # Lk 17.22-24; Phon 1.7. Chieina kachikathāna nathumli ‘Yanglu, a lamhāngli leili’ da hānglala mavāalu; lah ‘Yanglu, a shimlungli leili’ da hānglala mashitsangalu. 27Kaja rikhāna zingshoshong eina shoklaga zingtun ngasheikhavā thada, miwui Naomayarana kharāla chi tākamra. 28#Lk 17.37; Job 39.30. Kathingun khaleipam kachida khalāngbing kazipa.

Miwui Naomayara Kharā

(Mk 13.24-27; Lk 21.25-28)

29 # Phon 8.12; Isa 13.10; Ezek 32.7; Joel 2.10-11; Zep 1.15. “Kachotkachāng atamwui thichangli zimikla tangmanghaora, kachāngla mahorluimara, kazingramwui eina sirābingla tātungra kala kazingramwui pangshapla nganukhaora; 30#Mat 16.27; Dan 7.13; Phon 1.7. chiwui thili kazingramli miwui Naomayarawui machut chi theira; kala okathuili khalei miyur saikorana chapra, kala miwui Naomayarana pangshap kala tekmateilak eina muiyātungli tongda kharā theira; 31#1 Cor 15.52; 1 Thes 4.16; Isa 27.13; Zec 9.14. kala kapanga talla̱khon eina ngasoda ana awui kazingraobingli chihoshokra kala athumna awui kapangkakhui mibingli achikun matiwui eina, kazingram akatang akhawui eina akatang akhali vāshungda khaleibingli kazipkhuira.

Khaorārongwui eina Theikakhui

(Mk 13.28-31; Lk 21.29-33)

32“Khaorārongwui eina tamkhuilu: aphāngna nuiuda anah shokura̱akha mayo kachāng rāura da nathumna thei. 33Chi tākam eina nathumna saikora hi kathei tharan, A nganaihaira, ngaveichingli leihaira da nathumna thei. 34#Mat 16.28. Kachangkhat ina nathumli kahāngna, ot saikora hi mashokranglakha thot hi makānthuimara. 35#Mat 5.18; Lk 16.17. Kazingram kala okathuila shimānhaora, kha iwui tui mashimānlakmara.

Khipānakha Zimiksho eina Pung chi Matheimana

(Mk 13.32-37; Lk 17.26-30,34-36)

36 # Ots 1.6-7. “Kha zimiksho eina pung chi khipanakha matheimana, kazingramli khalei kazingraobing eina tangdala, kala Anaomayarala matheimana, Avāmāngna thei. 37#Lk 17.26-27; Hao 6.5-8; 7.6-24. Noahwui atamli kashok thada miwui Naomayarana kharāla chithāpapamra. 38Chitharan tara̱ maphongranglakha, Noahna marikhongli kākazang atam eina tangda athumna phakashak-phakazā, khamang-kazā, ngalākakhui kala fakathui ot sāsai; 39tara̱ phongda athumli makheithuiranglakha eina tangda khi shokhaokhala kaji athum matheimana, miwui Naomayarana kharāla chithāpapamra. 40#Lk 17.34-35. Atam chitharan luili mi khani leisāra, akhali khuithuihaora kala akhali haihaora. 41Preinao khanina mā rungsāra, akhali khuithuihaora, akhali haihaora.

42 # Mk 13.35; Lk 12.40; Mat 25.13. “Ngasharda rimpamsālu, khikhalajila nawui Proho katharan rāra̱khala da nathum matheimana. 43#Lk 12.39-46. #1 Thes 5.2; Phon 3.3; 16.15; 2 Pet 3.10. Kha hi theilu, chiya shimva̱ china khale chi katharan rāra̱khala kaji atam theisāsi kaja ana ngasharda rimpamlaga khale chili awui shim mashaokhaizang ngasakmara. 44Chiwui vang eina nathumla ngaranpinghaisāphalungra, khikhalajila nathumna maphaningsālak kaji pung chili miwui Naomayara china rāra.

Kahāng Khanganā eina Makhanganā Rao

(Lk 12.41-48)

45“Chithākha kahāng khanganā kala thangkhama, shimva̱ china shimkhurwui kashok kazang saikora yangmi khavai kala atam chālak eina khangatei raobingli kashakazā khuimi khavai otsin horsangkhami rao chi khipakhala? 46Akhavāna kharā tharan chithada sāsāda rātheikakhuia rao chi sokhamina. 47Kachangkhat eina ina nathumli kahāngna, akhavāna rao chili awui khalalei lan saikorawuitungli chipamra. 48Kha makaphā rao china a khalatta ‘Iwui akhavā marāfamara’ da phaningda, 49#Lk 21.34. awui rao ngasotnaobingli shaophokurakha kala khamaripbingli zārum mangrumakha, 50rao chiwui akhavā china raona machihānkasa zimiksho kala makathei pung chili hanungda, 51#Mat 8.12; 13.42,50; 22.13; 25.30; Lk 13.28. ali tandi mira kala phākakhaningbingli ngasoda hairumhaora; chili mibingna kachapla chapra, ahāla tarira.

Currently Selected:

MATTHEW 24: TANGBSI

Highlight

Copy