MATTHEW 23

Jishuna Ain Kathembing eina Phariseebingli Makhamayā

(Mk 12.38-39; Lk 11.43,46; 20.45-46)

1Chiwui thili Jishuna yarui eina awui sākhangatha̱bingli hānga, 2“Ain kathembing eina Phariseebingna Moseswui pamli pama, 3chieina athumna kahahāng hupta otsak eina sālu kala ngalanglu, kha athumna kasā thada masālu, khikhalajila athumna hāshoka kha otsak eina masāmana. 4#Lk 11.46; Ots 15.10. Athumna ritlak kahai maphungkharar otphun mibingwui yārtuili parmida ngava̱ ngasaka, kha athum khalatta otbing chili athumwui pāngmareng einala masingza̱mana. 5#Mat 6.1; 5.16; Sho 13.9; Khal 6.8; Mat 9.20. Athumna athumwui kasāsā ot chi mina theikhavai sai; athumwui pāsi eina hār pākta sākhui kala chontheira̱ sānglak eina khanonga, 6#Mk 12.38-39; Lk 20.46; 14.7-11; 11.43. Zātkhānli athumna khangamkhareiwui pam kala synagogueli mathāmeikap kaje pam ningchānga, 7kala athumna leihngaphāpamli athumli khayāshilak eina shalam kasā kala ojā da kaho ningchānglaka. 8#Jam 3.1. Kha nathumli ojā mahomara, khikhalajila nathumwui oja akha lei, kala nathum chinaongarāna. 9Kala okathuili mi khipālikha avā mahoalu, khikhalajila nathumwui Avā akhamanga, ava kazingramli lei. 10Nathumli akhavā dala maho ngasakalu, khikhalajila nathumwui akhamāng kaje akhavā che Khristana. 11#Mat 20.26; Mk 9.35; 10.43; Lk 9.48; 22.26. Nathumwui lungli reimeikap kaje china nathum saikorawui rao sāphalungra; 12#Lk 14.11; 18.14; Mat 18.4; 1 Pet 5.6. kachikathā reikhangaiya mi chili teongasakra, kala khalatta kateowana kaje chili reingasakra.

Jishuna Phākakhaningbingli Yonkashinam

(Mk 12.40; Lk 11.39-42,44,52; 20.47)

13 # Lk 11.52. “Ain kathemabing eina Phariseebing, phākakhaningabing! Nathumli kakhanang ringkashi ngasāranu, khikhalajila nathumna kazing wungramli zangki kajibingli shungnamda lei, kala nathum khalattala mazang lah zangki kajebingla mazang ngasakmana. 14Ain kathembing eina Phariseebing, phākakhaningabing! nathumli kakhanang ringkashi ngasāranu, khikhalajila nathumna ra̱meinaowui shim ngaponkhui kala mānkhavai seihā sānglak eina sai, chiwui vang eina nathumna shongrān sakmeida samphangra.

15 # Ots 2.10; 6.5; 13.43. Ain kathembing eina Phariseebing, phākakhaningabing! nathumli kakhanang ringkashi ngasāranu, khikhalajila nathumna ning khangachei mi akha samphang khavai ngalei kala shamadru kānda phāzata kala ana ngachei kahai eina nathumna ali khum khani mataida nathum thada kazeiramwui nao ngasā ngasaka.

16 # Mat 5.33-37; 15.14. “Mik khangapeo thānmebing, ‘kachikatha akhana khorumshimwui ming singda shākhi saakha, chiya khikha maningmana; kha kachikathana khorumshimwui sinawui ming eina shākhi saakha, ali awui shākhina khalapa’ da tamkachitheibing, nathum kakhanang ringkashi ngasāranu! 17#Sho 30.29. Nathum khangapeoa mangkhama̱bing! Sināna mataimeikā, sināli tharkhangasaka khorumshim mataimeikhala? 18Kala nathumna hānga, ‘Kachikathāna hanphutwui ming eina mingzaiakha chi khikha maningmana, kha hanphuttungli khalei ot chiwui ming singda mingzaiakha ali china khalapa.’ 19Mik khangapeoa mibing! Kachigat ot mataimeikā chili tharkhangasaka hanphut mataimeikhala? 20Chiwui vang eina hanphutwui ming singda shākhi kasaa china chili kala chiwuitungli khalei otbing saikora chili mingzailaga shākhi kasāna; 21#1 Wung 8.13; Laa 26.8. kala khorumshimwui ming singda shākhi kasaa china chili kala chiwui alungli khalei Varewui mingli mingzaida shākhi kasāna. 22Kala kachikathāna kazingramwui ming singlaga shākhi kasā chi Varewui wungpamkhong kala chiwuitungli kapama ali mingzailaga shākhi kasāna.

23 # Lk 11.42; Pāng 27.30; Mic 6.8. “Ain kathemabing eina Phariseebing, phākakhaningabing! Nathumli kakhanang ringkashi ngasāranu, khikhalajila nathumna suirihan, shomri kala sāchikom hikathāthāwui tithe mi, kha ritkhameiya ainwui apong, mashun, lukhamashan kala shitkasang hikathāthāva mamayonmana; nathum hi sahairarāna, kateibing chila masāmara majipaimana. 24Mik khangapeo thānmebing! Nathumna hāchangnaoliva sishokhailaga utva mayuitai!

25 # Lk 11.39-41; Mk 7.4. “Ain kathemabing eina Phariseebing, phakakhaningabing! Nathumli kakhanang ringkashi ngasāranu, khikhalajila nathumna tengkot eina khongpheiwui ayar pheomathai, kha chiwui alungliya takzākakhui eina ngamarkakhui otna pemtinghai. 26Mik khangapeo Phariseebing! Rida tengkot eina khongpheiwui alung chi pheomathāhaifalu. Chithākha ayarla tharpaira.

27 # Lk 11.44; Ots 23.3; Laa 5.9. “Ain kathembing eina Phariseebing! phākakhaningabing! Nathumli kakhanang ringkashi ngasāranu; khikhalajila nathum hi teimachar kahai chikhurbing kathāna. Chiwui vang eina ayarli mathālak eina thei, kha alungliya kathibingwui ara̱kui eina makatharna pemting kahaina. 28Hi tākam eina ayarli nathumna mibingli mashunglak kahai thada theingasaka, kha alungliva phākakhaning eina moreina pemtinghai.

Tandi Samphangki kaji Jishuna Marānkhami

(Lk 11.47-51)

29 # Lk 11.47-48; Ots 7.51-53. “Ain kathembing eina Phariseebing! phākakhaningabing! Nathumli kakhanang ringkashi ngasāranu, khikhalajila nathumna marānbingwui chikhur sākāmi kala katharabingwui wonrā tekmatei ngasaka, 30kala nathumna, ‘Ithum awo-ayibingwui thotli okthuisasi kaja athumna kasā thada masāsāmara kala marānbingli shaokathatli mazangsāmara’ da hānga. 31Chithada sāda nathum marānbingli sākathata mibingwui naongarāna kaji hi nathum khalatta kahāng china shākhi khamina. 32Chieina navā ngarāna haophok kahai chi sākuphaolu. 33#Mat 3.7; Lk 3.7. Phara̱bing, phara̱wui naongarābing, nathumna kazeiram vāki kajiwui eina kathada yāmshokpaira? 34#Lk 11.49-51; 2 Thot 36.15-16. #Mat 10.17; 23. Chiwui vang eina ina marānbing, thangkhameibing kala ain kathembing nathumwuili chihorai, nathumna kaikhali sāthatra, kaikhali krushtungli khāngkāra kala kaikhali synagogueli lijei eina ngaphitra kala athumli nathumna keinung akhawui eina keinung akhali rekharekra, 35#Hao 4.8; Heb 11.4; Zec 1.1; 2 Thot 24.21. okathuili khayon makhaleibingwui ashee tākahai saikora; chiya khayon makhalei Abelwui ashee eina thuilaga Barachiahwui naomayara Zechariah eina tangda nathumna kathara khorumshim eina hanphutpamwui ngachaili shaokathat saikora nathumwuitungli tāra. 36#Mat 10.23; 16.28; 24.34. Kachangkhat ina nathumli kahāng hina, saikora hi thot hiwuitungli tāra.

Jerusalemli Jishuwui Leikashi

(Lk 13.34-35)

37 # Lk 13.34-35. “O Jerusalem! Jerusalem, marānbingli shaothata kala nawuili chihokharābingli lunggui eina horthata! Ina nawui naongarāli harva̱na anaoli angachangzingli kapum thada pumkhami kayākha shirakhala, laga chi nana masā ngasakmana. 38#1 Wung 9.7; Jer 22.5. Yanglu, nawui shim horhaida ngachakyānghaira. 39#Mat 21.9; Laa 118.26. Ina nathumli kahāngna, arui hiwui eina thuida nathumna, ‘Prohowui mingli kharā mi chi sokhamina’ da mahāngranglakha eina tangda ili matheiluimara.”

Currently Selected:

MATTHEW 23: TANGBSI

Highlight

Copy