MATTHEW 22

Shakazāwui Zātkhān Chānjam

(Lk 14.15-24)

1 # Lk 14.16-24. Jishuna athumli chānjam akha hāngchitheiluishita 2hānga, “Kazing wungram chi awunga akhana anaomayarawui shakzāt zātkhān akha khamili chānjam sapai, 3#Mat 21.34. ana awui raobingli shakazāwui zātkhānli rākhavai ngahot kahaibingli hokhavai shivātvai, kha athumna marāngaiki jihaowa. 4Ana khangatei raobingli shivātluishitta hānga, ‘Ngahot kahaibing chili hānglu, Yanglu, ina ngazin phazātwui vang ngarānkuphaira, mukvāla asā kakā seinaola taithathaira, kala ot saikora ngarānkuphaira, ngalā shakzātwui zātkhānli rāserlu jilu.’ 5Kha athumna akaho chili khikha maningmana da akhana awui luili vāhao, khangatei akhana awui otli thuihaowa, 6khangatei raobing kaikhali athumna tukkhuilaga zakshilāk eina shaomi kala sāthathaowa. 7Awunga china malungvātnahaida awui raimi chihovāda mi shaokathatbing chili sāthathaowa, kala athumwui keinung chi mei eina thottāmihaowa. 8Chiwui thili ana awui raobingli hānga, ‘Shakazāwui khangarān kuphaira, kha hokahaibing chi teonāhaira. 9Chiwui vang eina nathumna shongfa kachida vālaga samkaphaphang mi kachiva̱li shakazāwui zātkhānli rākhavai aholu.’ 10#Mat 13.47. Chieina raobing china shongfa kachida vālaga kaphāla kashila samkaphaphang saikorali kazipkhuilaga thānunga, kala ngalā shakazāli kharābing china shim chi puihaowa.

11“Kha awunga china kharābingli vākhayang tharan ngalā shakazāwui sāri makasā mi akha zangsai, 12#Mat 20.13; 26.50. chieina ana ali hānga, ‘Itao, nana shakazāwui sāri masāla kathada hili rāzanghaokhala?’ Kha mipā chi akhon mashokthuwa. 13#Mat 8.12; 13.42,50; 24.51; 25.30; Lk 13.28. Chieina awunga china raobingli hānga, ‘Ali pheipāng khalaplaga tangkhamang ayarli horshokhaolu, apam chili mibingna kachapla chapra, ahāla tarira.’ 14Khikhalajila hokakhui kachungkhaya, kha kapang kakhui kateokhamanga.”

Khāshinā Khamiwui pongli Khangahān

(Mk 12.13-17; Lk 20.20-26)

15 # Mk 12.13-17; Lk 20.20-26. #Mk 3.6; 8.15. Chiwui thili Phariseebing thuihaowa kala Jishuwui tuimatui eina ali kathada tukkhuipairakhala da angazeka. 16Chiwui thili athumwui sākhangatha̱bing eina Herodwui mibing kaikhali shivātlaga ahāng ngasaka, “Ojā, ithumna thei kaja na khamashungana, kala Varewui shongfa mashunglak eina tamchithei, kala kateina nali khinada khuilikhala kajiwui vang kakhanang maleilakmana, maramva miwui kharei kateoli nana khikha mayangmana. 17Ithumli nawui kaphaning hāngmilu. Caesarli khāshinā khami hi ainla, lah maningmakhala? 18Jishuna athumwui makaphā ningphanin chi theihaoda, “Phākakhaningbing, nathumna khisāda ili chāng yangnganao kajikhala? 19Khājanā kashānwui lupāsā akha ili chitheilu.” Athumna lupā akha khuirāmi. 20Chieina ana athumli ngahāna, “Hili kazang ama̱ kala kapi kahai hi khipāwuikhala?”

21 # Rom 13.7. “Caesarwuina” da athumna ngahānkai.

Chieina Jishuna athumli hānga, “Chithākha Caesarwui chi Caesarli milu, kala Varewui chi Vareli milu.”

22Athumna hi kashā eina matakhakhaoda awui eina thuihaowa.

Ringkhaluiwui pongli Khangahān

(Mk 12.18-27; Lk 20.27-40)

23 # Mk 12.18-27; Lk 20.27-38. #Ots 4.1-2; 23.6-10. Chithang chi ringkhalui maleimana da kahanga Sadduceebingna Jishuli khangahān akha rāsai, 24#Khal 25.5. “Ojā, Mosesna hānga, ‘Mi akhana naongarā maleila thihaiakha agatona rameiva̱ chili ngakumlaga ashameiwui vang nao nganaomiphalungki kajina.’ 25Ara ithumwuili chinaongarā shini leida hili okthuida leisai. Khararra china ngalā khuilaga thihaowa, kala nao mapharāthuda apreiva̱ chi agatoli haimihaowa. 26Chithada sāda kakhanela, kakathumala kala kashine tāshungda nao mapharāla thiserhaowa. 27Athum saikorawui thili sha̱naopāva̱ chila thihaowa. 28Chithākha ringkhalui tharan sha̱naopāva̱ chi athum shiniwui ngachaili khipāwui preiva̱ ngasārakhala? Kaja athum saikorana ali ngakumsera.”

29Jishuna ngahānkai, “Nathum yonhaira, khikhalajila nathumna Kathara Lairikwui tuila kala Varewui pangshapla matheimana. 30Kaja ringkhalui tharan athum ngalāla makhuimara, fakathuila mafathuiluimara, kha athum kazingramli kazingraobing thāhaora. 31Thikahaibingwui ringkhaluiwui pongli Varena khi hānghaikhala kaji nathum mapāmalā? 32#Sho 3.6. ‘Iva Abrahamwui, Isaacwui kala Jacobwui Varena,’ Ishamei ava kathewui Vare maningmana, kha kharingawui Varena.”

33 # Mat 7.28. Mi kachungkhana chi shāda awui tamkachithei chili matakhakhaowa.

Kahaka Ningkhami

(Mk 12.28-34; Lk 10.25-28)

34 # Mk 12.28-34; Lk 20.39-40; 10.25-28. Kha Sadduceebingli Jishuna mangahānkākapai sāmihaowa kaji hi Phariseebingna kashā eina athum ngarumda rai. 35#Lk 7.30; 11.45; 14.3. Kala athumwui ngachaili ain kathema akhana ali chāng yangkida khangahān akha sai, 36“Ojā, ningkhamiwui ngachaili kachipā hakmeikapkhala?”

37 # Khal 6.5. Jishuna ngahānkai, “Nana nawui Proho Vareli nawuklung, kala namanglā kala naning tongtingda leishiphalungra.” 38#Pāng 19.18; Mat 19.19; Gal 5.14; Rom 13.9; Jam 2.8. Hina mataimeikap kaje khare ningkhamina. 39Kakhane khamataiya ningkhamiva, “Nawui khongnainaobingli na khalatta leikashi thada leishiphalungra. 40Ain tui kala marān tui saikora ningkhami khani hiwui lungli leisera.”

Messiah pongli Khangahān

(Mk 12.35-37; Lk 20.41-44)

41 # Mk 12.35-37; Lk 20.41-44. Phariseebing kazipta leilakha, Jishuna athumli khangahān akha sai, 42“Nathumna Khrista chi khipāna da phaningkhala? A khipāwui naomaryarakhala?”

“A Davidwui naomayarana” da athumna ngahānkai.

43Ana athumli hānga, “Chithākha, khiwui vang Davidli Manglāna kasatmida ali ‘Proho’ hoda

44 # Laa 110.1; Ots 2.34-35; Heb 1.13; 10.13.

‘Prohona iwui Proholi hānga:

iwui yāshong pamlu;

yangkashebingli nawui pheinai

masā ngasakranglakha eina tangda’ da hānghaokhala?

45Davidna ali ‘Proho’, hoakha, kathada Davidwui naomayara ngasāpairakhala?”

46 # Mk 12.34; Lk 20.40. Kala mi khipānakha ali ngahankakā akhala mamirarthuwa, kala chithangwui eina thuida mi khipānakhala khangahānla masālengthuwa.

Currently Selected:

MATTHEW 22: TANGBSI

Highlight

Copy