MATTHEW 21

Maiyārong Jerusalemli Kazang

(Mk 11.1-11; Lk 19.28-40; Joh 12.12-19)

1 # Mk 11.1-10; Lk 19.29-38; Joh 12.12-18. Kala athumna Jerusalem vānganaiuda Olive kaphungli khalei Bethphageli vāshunga, chiwui eina Jishuna awui sākhangatha̱ khanili shivātta 2hānga, “Naniwui mangāshong khalei kha̱ chili vālu, kala hengsāda chili gadhā akha anao eina ngasoda hokkahai nanina theira. Chi khalākhuilaga iwuili khuiunglu. 3Kachikathāna nanili ngahanakha, ‘Prohona ot sāvaiki kaji leili’ da hānglu. Chieina ana nanili gadhā va̱rāni chi ngalāngda chihomira.”

4Marānna hithada hānghaikasā chi ungshungvairanu da hi shok khangasakna:

5 # Isa 62.11; Zec 9.9. “Zionwui naongalāva̱li hānglu,

Yanglu, nawui awunga nawuili rārāli!

ngahuiri eina, gadhātungli,

gadhā chiwui avānaoli tongda.”

6Sākhangatha̱ khani china Jishuna sālu da hāngkahai chi sai; 7anina gadhā eina chiwui anao chi khuiunga kala khani chiwuitungli athumwui kachon hammida Jishuna chili tonga. 8#2 Wung 9.13. Mi kachungkhana athumwui kachon shongfali hammi kala kaikhana thingphāng reokhuida shongfali hammi. 9#Laa 118.26; Lk 2.14; Mat 21.15; 23.39. Jishuwui mangāli kala khanukli kazata mibingna “Davidwui naomayarali Hosanna! Prohowui mingli kharā a chi ka̱lā mahai! Chuimeikap kajeli Hosanna!” da panglāk eina vaowa.

10Kala ana Jerusalemli kazang tharan mi saikora ning ngatha̱haoda “Hi khipākhala?” da hānga.

11 # Joh 6.14; 7.40; Ots 3.22; Mk 6.15; Lk 13.33. Chieina mishang china “Hi Galileeli khalei Nazareth kha̱wui marān Jishu china.”

Jishuna Khorumshimli Khavā

(Mk 11.15-19; Lk 19.45-48; Joh 2.13-22)

12 # Mk 11.15-17; Lk 19.45-46; Joh 2.13-17; Sho 30.13; Pāng 1.14. Jishuna Varewui khorumshimli vāzanglaga chili ot khayorbinglila kala khalobinglila saikorali kashamserhaowa, kala pheisā kakaibingwui tablela kala nasha̱ khayorbingwui pamkhongla horkathānmiserhaowa. 13#Isa 56.7; Jer 7.11. Ana athumli hānga, “Hithada kapihaida lei, ‘Iwui shim hi seihā sākhavai shim hora’; kha nathumna khangaponabingwui akhur sāngasakhaira.”

14Khorumshimlungli mik khangapeo kala phei katekabing Jishuwui ngalemli rāda, ana athumli raimisera. 15#Lk 19.39; Mat 21.9. Kha pāngmon akhokabing eina ain kathembingna matakhak kahai otsakbing chi kathei eina kala “Davidwui Naomayarali Hosanna” da naoshinaobingna khorumshimli khavao chi kashā eina athum malungvāthaowa; 16#Laa 8.2. chieina athumna ali hānga, “Athumna hāngda khalei hi na shālā?”

“Mha, naoshinaobing eina angangnaobingwui khamor eina kākashunga masot kachikat nathumna khuirāhaira’ da kapi kahai chi nathum mapākhuihaira?”

17 # Mk 11.11-14; Lk 13.6-9. Jishuna athumli chihohailaga keinung chiwui eina shokta Bethanyli apisanga.

Khaorārongli Khonkashi

(Mk 11.12-14,20-24)

18Ngathorshong, keinungli latkhaung tharan Jishu thaihaowa. 19Kala ana shongfapheili khaorārong theida apam chili vai, kha chili anah maningla khikha masamphangthuwa. Chieina ana arong chili hānga, “Athei mamatheiluilakranu!” Chieina khaorārong chi ngalāngda ngahuihaowa.

20 # Mk 11.20-24. Sākhangatha̱bing china chi theida matakhakhaida hānga, “Kathada khaorārong hi hiyākha thākta ngahuihaokhala?”

21 # Mat 17.20; Lk 17.6; 1 Cor 13.2; Jam 1.6. Chieina Jishuna athumli ngahānkai, “Ina nathumli kachangkhat kahāng hina, nathumna shitkasang leida ningkhamaong maleilakakha, khaorārongli sākahai himang majimara, kha nathumna phungrei hili eina tangda ‘khuilaga shamadruli ahorsanghaolu’ da hānglala chithada shokra. 22#Joh 14.13-14; 16.23. Nathumna shitsangakha seihā sāda kapopo saikora samphangsera.”

Jishuwui Sāshap Pangshapli Khangahān

(Mk 11.27-33; Lk 20.1-8)

23 # Mk 11.27-33; Lk 20.1-8; Joh 2.18-22. Jishuna khorumshimli zangda tamchitheida leilakha pāngmon akhokabing eina ararnaobingna rāda ali hānga, “Khiwui pangshap eina nana otbing hi kasā, kala khipāna nali pangshap hi khamikhala?”

24Jishuna ngahānkai, “Inala nathumli khangahān akha saga, nathumna ili chiwui ngahankakā mishapakha, inala khiwui pangshap eina kasā khala kaji nathumli hāngmira. 25Johnwui ra̱hikkhami chi kachiwui eina rākhala? Kazingramwui einaka mikumowui einakhala?” Athum akha eina akha nganangrei eina “Ithumna ‘Kazingramwui einana’ jiakha, ana ‘Chithākha khisāthuda nathumna Johnli mashitsangthukhala’ da hāngra. 26#Mat 11.9; 14.5; Lk 1.76. Kha ‘Mikumowui einana’ da hāngakha ithum yaruili ngacheehao; kaja mi saikorana John hi kachangkhat marānna da khuiya.” 27Chieina athumna Jishuli “Ithum matheimana” da ngahānkai. Chieina ana athumli hānga, “Inala khiwui pangshap eina otbing hi kasākhala kaji nathumli mahāngmara.”

Naomayara Khaniwui Chānjam

28 # Mat 20.1; 21.33. “Nathumna khi phaninglikhala? Mi akhawui naomayara khani leisai. Ana khararra chili vāda hānga, ‘Inao aja drakhā yāmguili ot asālu.’ 29Chieina ana ngahānkai, ‘I mavāmara’; kha khaleilaga ningateihaida vāhaowa. 30Chiwui thili anaomayara kakhaneli ngaraikachā chi ahāngluishita; ana ‘I vāra, avā’ da ngahānkai, kha mavāthuwa. 31Khani hiwui ngachaili kachipāna avāva̱wui ningkachāng sākhala?”

“Khararrapana sai” da athumna ngahānkai.

Chieina Jishuna athumli hānga, “Ina nathumli kachangkhat kahāngna, khāshinā khalokabing eina khayorva̱ sha̱naobing china nathumli rida Varewui Wungramli zangra. 32#Lk 7.29-30. Khikhalajila Johnna khamashung-khangarong apong chithei khavai rai kala nathumna ali mashitsangmana, kha khāshinā khalokabing eina khayora sha̱naobingna ali shitsanga. Nathumna chi thatheilala naoda ning ngateilaga ali shitsangga kajila masāmana.

Drakhā Yāmgui Khamasābingwui Chānjam

(Mk 12.1-12; Lk 20.9-19)

33 # Mk 12.1-12; Lk 20.9-19; Isa 5.1-7. “Chānjam tui khangatei akhala nganālu. Shimva̱ akhana drakhā yāmgui akha sai kala chi kuimareida pan sāhai; alung chili drakhāra̱ surkhavai akhurla chuihai, tārong kajui akhala sāhai. Chiwui thili ana khamasābingli luimasāt mihailaga ngalei katava̱li thuihaowa. 34#Mat 22.3. Drakhāthei kaphā atam kharā tharān, raobingli yāmgui khamasābingwui eina awui sharuk athei akhui khavai chihovai. 35Kha khamasābing china awui raobing chili tukkhuilaga akhali shao, khangatei akhali sāthathao kala khangatei akhapāli ngalunggui eina horthathaowa. 36Ana kharewuili chungmeida khangatei raobing chihovāluishita; kala athumna raobing chilila khareli kasā tākam eina sāluishita. 37Naomeikapta ‘Athumna inaomayaralia khayāshira’ da hānglaga anao mayarali chihovai. 38Kha khamasābing china anaomayarali kathei eina athum khalatta hāngngaroka, ‘Hiya shimlui kāki kaje china; rālu, ali shaothathailaga awui shimluikat chi ithum khuihaosa.’ 39Chieina athumna ali tukkhuida athei yāmguiwui eina shimenshoklaga shaothathaowa. 40Akhavā chi kharā tharan khamasābing chili ana khi sārakhala? 41#Mat 8.11; Ots 13.46; 18.6; 28.28. Athumna ngahānkai, “Ana makaphābing chili sāthatserhaora kala yāmgui chi athei khamathei atamli tāzak eina awui sharuk miki kajebingli masāvā ngasakra.”

42 # Laa 118.22-23; Ots 4.11; 1 Pet 2.7. Jishuna athumli hānga, “Kathara Lairikli kapi kahai nathum mapāranglā:

‘Shim kasābingna horkahai ngalunggui chi

achithekwui khamakhoka ngasāhaira;

Hi Prohowui otsakna.

Ithumwui mikyanli hi matakhakhai?’

43Chiwui vang eina ina nathumli kahāngna, Varewui wungram chi nathumwui eina khuithuihailaga athei mathei khangasaka yur akhali mihaora.” 44“Ngalunggui hiwuitungli tākatunga a chi kaikazamra, kha ngalunggui china tākkaza̱ a chi akha̱-akhā ngasāhaora.”

45Chieina pāngmon akhokabing eina Phariseebingna awui chānjam tui chi shālaga athumwui maramli khamatuina da theikhuihaowa. 46Kha athumna ali tukkhui khavai sālala mi kachungkha chili ngacheehaowa, kaja athumna ali marān akhana da khui.

Currently Selected:

MATTHEW 21: TANGBSI

Highlight

Copy