MATTHEW 20
20
Drakhā Yāmguili Ot Kasābing
1 #
Mat 21.28,33. “Kaja kazing wungram chiya shimva̱na awui yāmguili ot sākhavai ngathorthakva̱ ngalangkaphei mi phākazat kathāna. 2Ot kasābing chili thangthangwui ngalangman lupā ava̱va̱ mira da mayā ngarok kahaiwui thili awui drakhā yāmguili chihovai. 3Khaleilaga pung chiko katā eina, keitheilungli khiotkhala masātheimada nganingung eina nganingzatkasā mi kaikhali theida 4athumli hānga, ‘Nathumla drakhā yāmguili ot asālu, laga mikhangayi chi ina minaora.’ Chieina athumna vāhaowa. 5Pung tharāda khani katā atamlila, kathum katā atamlila chithada vāluishita. 6Kala pung phangā maikhali khavā eina mi kaikha nganingzatkasā chi theida hānga, ‘Chāngnārem eina khisāda nganingpamshonlikhala?’ 7Athumna ngahānkai, ‘Khipānakha mahothuwa.’ Ana athumli, ‘nathumla drakhā yāmguili ot vāsālu’ da hānga.
8 #
Pāng 19.13; Khal 24.15. “Kazing khaying eina yāmguiwui akhavā china awui kashina chili hānga, ‘Ot kasābing chili hokhuiserlaga rākhanaowa eina haophoklaga rākhare kāshungda athumli athumwui langhai chi mihaolu.’ 9Chieina pung phangā maikhali ot sākaphokbing china lupā akharip samphanga. 10Rākharebingli khami tharan, athum chungmeida samphangra da phaningsai kha athumla lupā akharip samphanga. 11Athumna pheisā chi samkaphang eina shimva̱wuitungli matuikazamda 12hānga, ‘Rākhanaowa chi pung akhamang ot sai, laga langpongda zinghām sāririli ot kasā ithumli ngaraichā ngasakhaira.’
13 #
Mat 22.12; 26.50. Kha ana athum akhali hānga, ‘Itao, ina nathumli khalāng khikha masāmana, lupā akhara da khamayā maningmala? 14Nawui chi khuilaga ungulu; nali khami thada rākhanaobinglila mira da ina hāngkahaina. 15#Mat 6.23; Mk 7.22; Khal 15.9. Iwui khalei chi ina sākhangaingai masāpaimara kaji leilā? Lha ina hānkaphāwui vang mikpaikashikhala?’”
16 #
Lk 13.30; Mat 19.30; Mk 10.31. Chieina khanaowa china rira kala khare china naora.”
Jishuna Awui Kathiwui pongli Hāngkakathuma
(Mk 10.32-34; Lk 18.31-34)
17 #
Mk 10.32-34; Lk 18.31-34; Mat 16.21; 17.12,22-23; 26.2. Jishuna Jerusalemli kākhavai zatta leilakha; ana awui sākhangatha̱ tharāda khanili ngateida hokhuilaga, shongfali athumli hānga, 18“Yanglu, ithum Jerusalemli vaura, kala miwui Naomayarali pāngmon akhokabing eina ain kathembingwui pāngli horsanghaora, kala athumna ali yonshinamda chithithaora. 19Kala ali mana̱shi khavai, ngaphit khavai kala krushtungli shaoshān khavai Gentilebingwui pāngli horsangmira; kala kakathumathang ali ngakarthuilui ngasakhaora.”
Ava̱ Akhawui Kapo
(Mk 10.35-45)
20 #
Mk 10.35-41. #Mat 8.2; 9.18; 15.25; 18.26; Joh 9.38. Chiwui thili Zebedeewui naomayara khanili ava̱va̱na thānlaga Jishuwui mangāli khuktizangda kachikatha akha sāmi khavai rāpoi. 21#Mat 19.28. Chieina ana sha̱naopāva̱ chili hānga, “Nana khi ningchangkhala?”
Sha̱nao china ali ngahānkai, “Nawui wungramli iwui naomayara khani hi akhana nawui yāshong kala akhana nawui uishong pamkhavai kasamilu.”
22 #
Mat 26.39; Joh 18.11. Kha Jishuna ngahānkāda hānga, “Nathumna kapo chi khikhala da nathum matheimana, ina mangki kaji tengkot chi nathum mangshapla?”
“Ithum shapa” da athumna ngahānkai.
23 #
Ots 12.2; Phon 1.9; Mat 13.11. Ana athumli hānga, “Nathumna iwui tengkot chi mangra, kha iwui yāshong kala uishong pamkhavai mayāmiki kaji chi I maningmana, kha chiya iwui Avāna ngarān kahaiya athumwui vangna.”
24Sākhangatha̱ tharā china chi kashā eina ani chinaonili malungvāthaowa. 25#Mk 10.42-45; Lk 22.25-27. Kha Jishuna athumli hokhuida hānga, “Gentilebingwui khamungabingna athumwuitungli khayaiya kala athumwui khangam khareibingnala athumwuitungli pangshap lei kaji nathumna thei. 26#Mat 23.11; Mk 9.35; Lk 9.48. Nathumwui ngachailiva chi mathamara; kha nathumwui ngachaili hakki kaje china nathumwui otram ngatha̱me sāphalungra, 27kala nathumwui ngachaili khare sāki kaje china nathum saikorawui raonao sāphalungra, 28#Mat 26.28; 1 Tim 2.5-6; Joh 13.15-16; Tit 2.14; 1 Pet 1.18. kaja miwui Naomayara eina tangda ali otram ngatha̱mi ngasak khavai kharā maningla ana otram ngatha̱mi khavai kala kachungkhawui vang ngatangman sāda amanglā chigatmi khavai kharāna.”
Khangapeo Khanina Kathei Samkaphang
(Mk 10.46-52; Lk 18.35-43)
29 #
Mk 10.46-52; Lk 18.35-43; Mat 9.27-31. Kala Jishu eina awui sākhangatha̱bingna Jerichowui eina zatkathui eina mi kachungkhana athi shura. 30Kala yanglu, mik khangapeo mi khani shongfapheili pamsāda Jishu rārāli kaji kashā eina, “Davidwui naomayara, inili khalumashanmilu” da vaowa.
31Chieina yarui china anili kasainakha pamlu da kharara; kha anina pangmeida “Davidwui naomayara, Proho inili khalumashanmilu,” da vaowa.
32Jishuna kasha̱nakha nganingda anili hokhuida hānga, “Ili naniwui vang khi samilu jikhala?”
33Anina ngahānkai, “Amei, iniwui mik rak ngasakmilu.”
34Chieina Jishuna lukhamashan eina aniwui mikli sāza̱ya kala ngalāngda mik kathei samphangda anina athi shurthuihaowa.
Currently Selected:
MATTHEW 20: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
