MATTHEW 19

Preigahar Kapāngwui pongli Tamkachithei

(Mk 10.1-12)

1 # Mat 7.28; 11.1; 13.53; 26.1. #Mk 10.1-12. Jishuna tui hi hāngchitheichamhailaga Galileewui eina thuihaowa kala Jordan kong kānlaga Judea ngaleili vāzanga, 2kala mi kachungkhana awui thi shurrai kala ana athumli apam chili kazāt raimi.

3Phariseebingna rālaga chāng yangkida, “Mi akhana maram akhawui vang eina apreiva̱li pāngkahai hi ainlā?” da ali ngahāna.

4Jishuna ngahānkai, “Anili kasema china haokaphokwui eina sha̱nao eina mayarnao sai da kapi kahai nathum mapārangla, 5#Hao 1.27; 2.24; Eph 5.31; 1 Cor 6.16. kala Varena hānga, ‘Hiwui vang eina mayara china ava̱ eina avāli chihohailaga preiva̱li ngarumhaora, kala ani khani akha ngasāhaora.’ 6Chiwui vang eina ani khani asā khani maningluimana, kha asā akhamānga. Chithākha Varena ngakummi kahai chili mi khipānakha masākhaiaranu.”

7 # Khal 24.1-4. Athumna ngahanlui, “Chithākha mayarana kapāngwui lairik milaga apreiva̱li chihoranu da Mosesna kachiwui vang kakasokhala?”

8Jishuna ngahānkai, “Mosesna nathumwui ning khamararwui vang napreiva̱ ngarāli pāngpaira da mayākhamina, kha haokaphokwui eina chi mathāmana. 9#Mat 5.32; Lk 16.18; 1 Cor 7.10-13. Kha ina nathumli kahāngna, phokaphāwui vang maningla kachikathāna apreiva̱li pānghailaga sha̱nao khangateili khuiakha ana phokaphāna.”

10Sākhangatha̱bingna ali hānga, “Preigaharni ngachaili hikathā shokra jiakha ra̱sa makaphā phāmei.”

11 # 1 Cor 7.7-9. Jishuna ngahānkai, “Mi kachiva̱na tamkachithei hi mayāser kaji maningmana, kha Varena mikahai athum māngna khuikasangna. 12Kaja mi kaikhava ahonga sāda kapharā lei kala mi kaikhali mina ahonga sāngasaka kala mi kaikhava kazing wungramwui vang athum khalatta ahonga sākakhui lei. Tamkachithei hi khuisangshapa a china chi sāranu.”

Jishuna Naoshinaobingli Sokhami

(Mk 10.13-16; Lk 18.15-17)

13 # Mk 10.13-16; Lk 18.15-17; Mat 18.2-3; 1 Cor 14.20. Naoshinaobingli pāng parda seihā sāmi khavai mi kaikhana athumli Jishuwuili khuirai. Chieina sākhangatha̱bingna athumli khararra. 14Kha Jishuna hānga, “Naoshinaobingli iwuili rāngasaklu, athumli mahaphaialu, khikhalajila wungram hiya athum kathāwuina.”

15Chieina ana athumli somilaga thuihaowa.

Kashānga Yaronnao

(Mk 10.17-31; Lk 18.18-30)

16 # Mk 10.17-22; Lk 18.18-23. #Lk 10.25; Pāng 18.5. Kala yanglu, Jishuwuili mi akhana rāda hānga, “Ojā, ina katang makhavai kharing samphang khavai khi kaphā ot sāphalungrakhala?” da ngahāna.

17Chieina Jishuna ngahānkai, “Khiwui vang eina nana ili kaphāwui apongli ngahankhala?” “Kaphā kaho akhamāng lei. Nana kharingli zangngaiakha ningkhamibing chi mayonlu.”

18 # Sho 20.12-16; Khal 5.16-20; Rom 13.9; Jam 2.11. “Kachipā” da ana ngahāna.

Jishuna ngahānkai, “Mi mashaothatpaimana, maphophāpaimana, maleepaimana, mikhanam shākhi masāpaimana; 19#Pāng 19.18; Mat 22.39. nava̱ navāli khayāshilu, kala nawui khongnainaoli na khalatta leikashi thada leishiphalungra.”

20“Saikora hi ina mayonserhaira” da yarona china ngahānkai, “Khi khavāt leifakhala?”

21 # Lk 12.33; Ots 2.45; 4.34; Mat 6.20. Jishuna ali hānga, “Nana peichaongaiakha, ungulu, laga nawui khalalei saikora yorserhailaga kachāmnaoli mihaolu. Chieina kazingramli nawui lan leira. Chiwui thili rāda ithi shurlu.”

22Yarona china tui chi kashā eina wukkhananglak eina thuihaowa, khikhalajila a shānglaka.

23 # Mk 10.23-27; Lk 18.24-27. Chiwui thili Jishuna awui sākhangatha̱bingli hānga, “Ina nathumli kachangkhat eina kahāngna, kashānga akhana kazing wungramli zangki kaji hi saklakra. 24Kala ina nathumli hāngluishitli, kashānga mi akhana Varewui wungramli zangki kajile utna kapimkhurli ngara̱kashokna paimei.”

25Sākhangatha̱bingna chi shālaga matakhakhaida hānga, “Chithākha khipāli huimipairakhala?”

26 # Hao 18.14; Job 42.2. Kha Jishuna athumli yanglaga hānga, “Mikumowui vanga hi masāpaimana kha Varewui vanga masākapai maleimana.”

27 # Mk 10.28-31; Lk 18.28-30; Mat 4.18-22. Chiwui thili Peterna ngahānkāda hānga. “Yanglu, ithumna ot saikora horhaida nathi shurhaira. Chithākha ithumna khi samphangrakhala?”

28 # Lk 22.30; Mat 20.21; Phon 3.21. Jishuna athumli hānga, “Kachangkhat eina ina nathumli kahāngna, kadhara oathuili, miwui Naomayarana awui tekhamatei wungpamkhongli kapam tharan, ithi kashura nathumla wungpamkhong tharada khanili pamda Israel shang tharāda khanili bichar sāra. 29Kala iwui mingwui vang shim lah chinao ngarā, azarva̱ ngarā, ava̱-avā, naongarā kala ram horkahai mi kachiva̱ shākha mataida samphangra kala makashimān kharing mirin mathunkhuira. 30#Mat 20.16; Lk 13.30. Kha arui khare kasābing kachunga naothuihaora kala khanaobingna rihaora.

Currently Selected:

MATTHEW 19: TANGBSI

Highlight

Copy