MATTHEW 18

Khipā Hakmeikapkhala?

(Mk 9.33-37; Lk 9.46-48)

1 # Mk 9.33-37; Lk 9.46-48. Atam chili sākhangatha̱bingna Jishuli rangahāna, “Kazingramli khipā hakmeikapkhala?”

2Chieina ana naoshinao kateowa akhali hokhuida athumwui ngachaili nganing ngasakta 3#Mk 10.15; Lk 18.17; 1 Pet 2.2. hānga, “Kachangkhat eina ina nathumli kahāngna, nathumna ningngateida naoshinao thada mathaakha kazing wungramli mazangrarlakmara. 4Kachikathā khalatta naoshinao thada malungkhanima a china kazing wungramli hakmeikap kajena. 5#Mat 10.40; Lk 10.16; Joh 13.20. Hikathā naoshinao akhali iwui mingwui vang khuikasanga a chi ili khuikasangna.

Moreili Suikasang

(Mk 9.42-48; Lk 17.1-2)

6 # Mk 9.42-48; Lk 17.1-2. “Kha kachikathāna ili shitkasanga kateowa naoshinao akhali morei sāngasakakha chikathā mili lungriham kahaka akha akahungli hokthangmihailaga kathuka shamadruli hikthat ngasak kahaina phāmei. 7Morei sākhavai kasuiwui vang okathuili kakhanang ngasaranu! Kaja kasui hi rāphalungra, kha kasui rākhangasaka mi chi kakhanang ngasaranu!

8 # Mat 5.29-30; 17.27. “Kala napāngna lah napheina nali morei sangasakakha, chi katatkhuilaga horhaolu; pāng khani, phei khani kālaga katang makhavai meifali zangki kajile sheisha̱laga lah phei teklaga katang makhavai kharingli kazang phāmei. 9Kala nawui mikna nali morei sangasakakha, chi latshokkhuilaga horhaolu; mik khani kālaga makhamita meifali zangki kajile mik akhamāng kālaga katang makhavai kharingli kazang phāmei.

Yaonao Shimān kahaiwui Chānjam

(Lk 15.3-7)

10 # Ots 12.11. “Naoshinao kateowa akhalila ningachai kahai masaalu, khikhalajila nathumli kahāng hina kaja athumwui kazingraobingna kazingramli khaleia Ishāvawui mai theichingda lei. 11#18.11 achālakhawui lairik kachama kaikhanava tuiza 11hi ngarumsanga Kaja miwui Naomayarana shimān kahai chili huikhui khavai kharāna.

12 # Lk 19.10. #Lk 15.3-7. Nathumna khi phaningli? Mi akhana yao shākha leilaga akha pākthuihaiakha ana hangchikoda chiko chi phungreili haisālaga pākthui kahaia chili maphāmarala? 13Kala ana chi samphanghaiakha, kachangkhat ina kahāngna, mapākthuilak kaje hangchikoda chiko chili mataimeikharda ana pākthui kahaia yao akha chiwui vang ringphameikharra. 14Chieina kateowa hibingwui ngachaili akha shiman ngasaki kaji hi kazingramli khaleia iwui Avāwui ningkachāng maningmana.

Morei Kasā Achinā akha

15 # Lk 17.3; 1 Cor 6.1-6; Gal 6.1; Jam 5.19-20; Pāng 19.17; Khal 19.15. “Nachināna nawuitungli khayon sāhaiakha, ali vālaga nanimāng ngasopamlaga awui khayon chi hāngmilu, ana mayākha nana nachināli yuikhuihaira. 16Kha ana nali mahengsangakha, mi akha lah khani ngasophungda vālu. Chithākha tui kachiva̱ hilaka mi khani lah kathumwui shākhi chieina khuipaira. 17Ana athumlila mahengsangakha churchli hāngchitheilu; kala ana churchlila mahengsangakha nathumwui vanga a hi Gentile kala khāshinā kakhuia kathāna da khuilu.”

Kakhalap kala Kachiho

18 # Mat 16.19; Joh 20.23. “Ina nathumli kachangkhat eina kahāngna, kachikathāli nathumna okathuili khalap kahahai chi kazingramlila khalapra, kala nathumna okathuili khalāmi kahai chi kazingramlila khalāmira.

19 # Mat 7.7; 21.22; Jam 1.5-7; 1 Joh 5.14; Joh 14.13. Ina nathumli hāngluishitli, nathumwui ngachaili mi khanina kachikatha akha kapo chi okathuili mayā ngarokakha, kapo chi kazingramli khalei iwui Avāna mira. 20Khikhalajila iwui mingli khani lah kathum kazipakha, athumwui chili I zangda lei.”

Mapheokhame Rao akhawui Chānjam

21 # Lk 17.4; Hao 4.24. Chiwui thili Peterna ali rāhānga, “Proho, ichināna iwuitungli kayākhashida khayon sāpaira, kala ina pheomipairakhala? Shini shira̱lā?”

22Jishuna ali hānga, “Ina nali shini shira da mahāngmana, kha hangshini shini shida kajina. 23#Mat 25.19. Chiwui vang eina kazing wungram hiya awunga akhana awui raobingwui hishap tharkhuikhangai chili ngaheopai. 24Ana hishap sāphokcham kaji tharan lupā thingthara kashuka mi chili awuili khuirai; 25#Lk 7.42. kala ana chi marunrarthuda, chi runkhavai apreiva̱la, anaongarāla kala awui khalalei ot saikorala yorserhaolu da akhava china hukhum mi. 26#Mat 8.2. Chieina rao china khuktizangda ‘Amei, ili khangaraimilu, ina runsera’ da poi. 27Kala ali lukhamashanwui vang eina rao chiwui akhavā china ali chihomihaowa kala leimanla kokmihaowa. 28Kha raopā chi kayāng kashok eina awui lupā shākha shuk kahaiya rao sakharuma akha samphanga, kala ali kharokli singkhuida hānga, ‘Iwui leiman chi milu.’ 29Chieina awui ngasota raopā china ngakhumzangda, ‘Ili khangaraimilu, Ina runmira’ da poi. 30Ana mamayāthuda mipā chili leiman chi marunranglakha eina tangda phātopli sanghaowa. 31Awui rao ngasotnao kateibingna chi kathei eina wukkhananglakhaowa, kala athumna athumwui akhavāli shokkahai saikora chi ahānga. 32Chieina awui akhavā china raopā chili hokhuilaga hānga, ‘Makaphā rao, nana ili kapowui vang ina nawui leiman saikora kokmihaira; 33ina nali lumashankhami chithada nanala nawui ngasota raopā chili malumashanmipaimala?’ 34Akhavā china malungvāt eina awui leiman saikora marunranglakha eina tangda phātopli sangkhavai kashinabingwui pāngli horsangmihaowa. 35Chithada sāda nathumna nachinā ngarāwui khayon khamāng chi wuklung eina mapheomiakha kazingramli khaleia iwui Avā chinala nathum kachiva̱li chithada sāra.”

Currently Selected:

MATTHEW 18: TANGBSI

Highlight

Copy