MATTHEW 17

Azak Khaon

(Mk 9.12-13; Lk 9.28-36)

1 # Mk 9.2-10; Lk 9.28-36; 2 Pet 1.17-18. #Mat 26.37; Mk 5.37; 13.3. Kala zimiksho tharuk thangwui thili Jishuna Peter eina James kala agato Johnli thānphungda phungrei kajuiva̱ akhali kāda athummang apama. 2Kala athumwui miktāli Jishu azak onhaowa: amai zimik thada horra kala awui kashankachonla kahor thada charshihai. 3Kala yanglu, Moses eina Elijahna Jishuli chān khangazek chi athumna thei. 4Kala Peterna Jishuli hānga, “Proho, ithum hili leikasā hi phālakhaira. Nana mayāmiakha nawui vang akha, Moseswui vang akha kala Elijahwui vang akha da ina rāmnao kathum sāmiga.”

5 # Mat 3.17; Isa 42.1; Laa 2.7; Joh 12.28. Ana matuimahunglakha, yanglu, horchamri kahai muiyāna athumli ngapuikhamhaowa kala muiyālungwui eina akhon akha vaorada, “Hi iwui khaluma Naomayarana, ali Ina ningyāng unglaka, awui kahāng nganālu.”

6Sākhangatha̱bingna chi kashā eina ngacheenāhaida ngakhumzangsera kala khakshingakhaowa. 7Kha Jishuna athumli rāsaza̱da hānga, “Ngakarthuilu, mangacheealu.” 8Chieina athumna yangkakā tharan Jishu maningla khipākha maleisāthuwa.

9 # Mat 8.4; 16.20; Mk 3.12; 5.43; 7.36. Athumna phungreiwui eina katā tharan Jishuna athumli, “Miwui Naomayarana kathiwui eina maringshokranglakha eina tangda khamahā hi khipālikha mahāngalu” da ningmi.

10 # Mk 9.11-13; Mat 11.14; Mal 4.5. Chieina awui sākhangatha̱bingna ngahāna, “Chithākha khi sāda Elijahna rāriphalungra da ain kathembingna hāngkhala?”

11Jishuna ngahānkai, “Elijahna rālaga ot saikora ngarānpinghaisāra. 12#Mat 16.21; 17.22; 20.17; 26.2; Lk 17.25. Kha ina nathumli kahāngna, Elijah rāhaira, kha mibingna ali mamachuthuwa kala ali athumna sākhangangai sai. Chi tākam eina miwui Naomayarala athumwui pāngli kachotkachāng samphangra.”

13Chiwui thili Jishuna Ra̱hikme Johnwui pongli khamatuina kaji hi sākhangatha̱bingna bhap tāhaowa.

Kameo Kazanga Naoshinao akhali Raikhami

(Mk 9.14-29; Lk 9.37-43)

14 # Mk 9.14-27; Lk 9.37-43. Athumna yaruili latkhaung tharan kachikathā mi akhana awui mangāli rākhuktizangda hānga, 15“Ojā, inaomayarali khalumashanmilu, kaja a zingmeirai kakazā mina kala zakshilak eina kazāda meilila, tara̱lila tāzangzang jichinghaowa. 16Ina ali nawui sākhangatha̱bingwuili khuirai kha athum maraimirarthuwa.” 17Chieina Jishuna ngahānkai, “He shitkasang makhaleia ngakaikashe thot, ina nathumli karankha ngasopamfara? Ina nathumli karankha ja̱mifarakhala? Ali iwuili khuirālu.” 18Jishuna kameo chili kakaso eina kameo chi shokhaowa kala naoshinaopā chi ngalāngda raihaowa.

19 # Mk 9.28-29. Chiwui thili sākhangatha̱bing china Jishumang khalei atamli rāda hānga, “Kachiwui vang eina ithumna kameo chi makashamshokrarthukhala?”

20 # Lk 17.6; Mat 21.21; Mk 11.22-23; 1 Cor 13.2; Mk 9.23. Jishuna ngahānkai, “Marama nathumwui shitkasang vātkahaiwui vangna. Ina nathumli kahāngna, nathumna shitkasang kayānghanthā rikha leiakha, phungrei hili nathumna ‘Hiwui eina araa chili vālu’ jilala vāra. Nathumna khikha masākharar maleimara.” 21“Kha hikathā hiya seihā kasā kala kakhum eina maningla kalikha mashokrarmana.

Jishuna Awui Thiki kaji Hāngkhamarān

(Mk 9.30-32; Lk 9.43-45)

22 # Mk 9.30-32; Lk 9.43-45; Mat 16.21; 20.17-19; 26.2. Athumna Galileeli kazipta leilakha Jishuna athumli hānga, “Miwui Naomayarali mibingwui pāngli horsangmihaora, 23athumna ali shaothatra; kha kathumthangwui thili ringshokluishitra.”

Chieina sākhangatha̱bing wukhananglakhaowa.

Khorumshimwui Khājanā Kashān

24 # Sho 30.13; 38.26. Athumna Capernaumli ungkazang tharan khorumshimwui khāshinā khangashaibingna Peterli rāngahāna, “Nathumwui ojā khāshinā chi mamimalā?”

25 # Rom 13.7; Mat 22.17-21. “Miya” da ngahānkai. Kala ana shimlung kazang eina Jishuna rimeikapta ali ngahāna, “Simon, nawui kaphaning khikhala? Okathuiwui awungabingna khāshinā kala shai hi khipāwui eina khuikhala? Naomayara ngarāwui eina khuikā, khangateiwui eina khuikhala?”

26Kala ana, “Khangateibingwui einana” da kahāng eina Jishuna ali hānga, “Chithākha naomayara ngarāva khalemna. 27#Mat 5.29; 18.6-9; Joh 6.61; 1 Cor 8.13. Chithālala athum malungmavāt khavai shamadruli vālaga khaisui akha ahorsanglu, nana samphangkhare khai chi khuilaga khamor phākkhayang tharan shekel akha samphangra; chi khuilaga iwui eina nawui chi shānmihaolu.”

Currently Selected:

MATTHEW 17: TANGBSI

Highlight

Copy