MATTHEW 16

Machut Ningkachāng

(Mk 8.11-13; Lk 12.54-56)

1 # Mk 8.11-12; Lk 11.16,29; 12.54-56; Mat 12.38-39; Joh 2.18; 6.30. Phariseebing eina Sadduceebing rāda ali chāng tamyang khavai kazingramwui eina machut akha chitheilu da poi. 2Ana athumli ngahānkai, “Zingyinlam zingko shokhaiakha, ‘Zingyat mathāhaora, zingko shokhaira’ da nathumna hānga. 3Kala ngathorshong kazing kahungla hung, tangkhamangla tangmangakha ‘Aja siphan zingrot ngasha̱ra’ da nathumna hānga. Nathumna kazingwui maong yanglaga marānshapa, kha nathum atamwui machutbing chi makhalatrarmana. 4#Joh 3.4-5. Makaphā makhayā kala phophāt thot hina machutmāng phāzata. Kha Johnawui machut chi maningla machut khangatei nathumli mamimara.” Chieina ana athumli chihohailaga zatthuihaowa.

Phariseebing eina Sadduceebingwui Khawok

(Mk 8.14-21)

5 # Mk 8.13-21. Sākhangatha̱bing china lākhavāk kākashung tharan athumna khuiphungki kaji khamui chi malaihaowa. 6#Lk 12.1. Jishuna athumli hānga, “Phariseebing eina Sadduceebingwui khawok chili ningngasharlu.”

7Kala athum khalatta hi ngazekta hāng ngaroka, “Ithumna khamui makhuikaphungthura.”

8 # Mat 6.30; 8.26; 14.31. Kha Jishuna chi theihaoda hānga, “He shitkasang kateobing, khamui makhuikaphungwui vang nathum khisāda ngazek ngarokhala? 9#Mat 14.17-21. Nathum aruila bhap matāranglā? Ina khamui phangā serkhailaga mi thingphangāli mizālaga nathumna luk kayākha kazipkhuikhala kaji maphaningungmala? 10#Mat 15.34-38. Lha khamui shini eina mi thingmatili yaoshaihailaga luk kayākha kazipkhuikhala kajila malaihairalā? 11Ina khamuiwui vang khamatui maningmana kaji hi nathumna kathada matheikhuirarthukhala? Phariseebing eina Sadduceebingwui khawok chili ningngasharlu.”

12Chieina Jishuna khamuiwui khawokli kahāng maningla Phariseebing eina Sadduceebingwui tamkachitheili ningngasharlu da kahāngna kaji sākhangatha̱bingna bhap katā samphanga.

Peterna Khrista Hāngkaphat

(Mk 8.27-30; Lk 9.18-21)

13 # Mk 8.27-30; Lk 9.18-21. Jishuna Caesarea Philippiwui ngaleili vākazang tharan awui sākhangatha̱bingli ngahānna, “Miwui Naomayarali mibingna khipāna da hāngkhala?”

14 # Mat 14.2; Mk 6.15; Lk 9.7-18; Joh 1.21. Athumna ngahānkai, “Kaikhana Ra̱hikme Johnna ji, kaikhana Elijahna ji, kala khangatei kaikhana Jeremiah maningakha marānbingwui ngachaili akhara da hānga”.

15Ana athumli hānga, “Kha nathumna I khipāna da hāngkhala?”

16 # Mat 1.16; Joh 11.27; 1.49. Simon Peterna ngahānkai, “Na Khrista, kharinga Varivarawui Naomayara china.”

17 # 1 Cor 15.50; Gal 1.16; Eph 6.12; Heb 2.14. Chieina Jishuna ali ngahānkai, “Johnwui naomayara Simon, na ka̱lā mahai! Kaja nali asā khavaiya kala ashee kazangana phongkhami maningmana, kha kazingramli khalei iwui Avāna phongkhamina. 18#Joh 1.40-42; 21.15-17; 1 Cor 15.5. Kala ina nali kahāngna, na Peterna kala lunghār hiwuitungli ina iwui church sākara, kala kathiwui pangshapna chili mayuirarmara. 19#Isa 22.22; Phon 1.18; Mat 18.18; Joh 20.23. Ina nali kazing wungramwui sho chi mira, kala nana okathuili khalap kahai chi kazingramlila khalaphaira, kala nana okathuili khalākhami chi kazingramlila khalāmira.”

20 # Mat 8.4; Mk 3.12; 5.43; 7.36; 9.9. Chiwui thili sākhangatha̱bingli A hi Khrista china kaji chi khipalikhala mahānglakalu da ningmi.

Jishuna Awui Kachotkachang kala Kathi Hāngkhamarān

(Mk 8.31—9.1; Lk 9.22-27)

21 # Mk 8.31—9.1; Lk 9.22-27. #Mat 17.22-23; 20.17-19; Lk 17.25; Mat 17.12; 26.2. Atam chiwui eina thuida Jishuna awui sākhangatha̱bingli, ana Jerusalemli vālaga ararnaobing, pāngmon akhokabing kala ain kathembingwui eina kachotkachāng tarākha samphangra kala shaothathaora kha kathumthangwui thili ringshokluishitra kaji chitheiphokhaowa.”

22Kala Peterna ali hokhuilaga kaharphokta hānga, “Varena mamayāmana, Proho! Nali chithada mashoklakmara.”

23 # Mat 4.10. Kha ana ngareivāda Peterli hānga, “Iwui khanukshong unghaolu, Satan! na ili sheikakhautana; kaja na Varewuishong maningla mikumowuishong lei.”

24 # Mat 10.38-39; Lk 14.27; 17.33; Joh 12.25. Chiwui thili Jishuna awui sākhangatha̱bingli hānga, “Kachikathāna ithi shurga jiakha, khalattali malaihailaga, awui krush phungda ithi shurranu. 25Khikhalajila, awui mirin ngatangkhuira kaje a chi shimānra; kala kachikathāna iwui vang eina awui mirin shimānmiakha ana chi samphangra. 26Kaja mi akhana okathui tongda samphanglaga awui mirin shimānhaiakha awui tongkaza khi leikhala? Lha mi akhana awui mirin eina ngatha̱khuikapai khi leikhala? 27#Mat 10.33; Lk 12.9; 1 Joh 2.28; Rom 2.6; Phon 22.12. Khikhalajila miwui Naomayarana awui kazingraobingli ngasoda Avāwui tekhamatei eina rāki kajina, kala chiwui thili mi kachiva̱li kachichāna sākahai chiwui athishurda ana runmira. 28#Mat 10.23; 1 Cor 16.22; 1 Thes 4.15-18; Phon 1.7; Jam 5.7. Ina nathumli kachangkhat kahāngna, miwui Naomayarana awui wungramli kharā matheiranglakha kathi mamazapki kaji mi kaikha hili nganingda lei.”

Currently Selected:

MATTHEW 16: TANGBSI

Highlight

Copy