MATTHEW 15
15
Awo-ayibingwui pongli Tamkachithei
(Mk 7.1-13)
1 #
Mk 7.1-23. Chiwui thili Phariseebing eina ain kathembing kaikhana Jerusalemwui eina rāda Jishuli rāngahāna, 2“Khisāda nawui sākhangatha̱bingna awo-ayibingwui khangachā chonmakānhaokhala? Kaja athumna phakazā atamli pāng mamazikmana.”
3Ana athumli ngahānkai, “Thākha khiwui vang eina nathumna nathumwui khangachā sākasā chiwui vang eina Varewui ningkhami sākhaihaokhala? 4#Sho 20.12; Khal 5.16; Sho 21.17; Pāng 20.9. Kaja Varena kasohai, ‘Nava̱ navāli khayāshilu’ kala ‘Avāva̱li lah ava̱va̱li sui kasa a chili thingasak phalungra.’ 5Kha nathumna kahāng, kachikathāna avāva̱ lah ava̱va̱li ngachon khavai leisālala ‘Hi Varewuina’ da hāngakha avāva̱li khayāmashilala phai. 6Chieina nathumwui khangachā sākasā chiwui vang eina Varewui tui chi nathumna makakachanga sāngasakhaowa. 7Phākakhaningbing! Isaiahna nathumwui maramli phongkhamarān chi kayākha mashunghao, ana hānga:
8 #
Isa 29.13. ‘Mibing hina morchai eina ili khayāshiya,
kha athumwui wuklung iwui eina katāva̱li lei;
9arema eina athumna ili khoruma,
mikumona semkakhui ain chi iwui ainna da tamchithei.’”
Makhao Khangasaka Ot
(Mk 7.14-23)
10Chiwui thili Jishuna yarui chili hokhuida hānga, “Nganākazakhuilu kala theishingkhuilu: 11#Ots 10.14-15; 1 Tim 4.3. khamorli kazang china mili makhao khangasak maningmana, kha khamorwui eina kashok china mili makhao khangasakna.”
12Chiwui thili sākhangatha̱bingna ali rāhānga, “Nawui kahāng chi Phariseebing ning sāza̱haowa da na matheikhala?” 13#Isa 60.21; Joh 15.2. Ana ngahānkai, “Kazingramli khaleia iwui Avāna malingkasang thingrong kachiva̱ phurshokhaora.” 14#Lk 6.39; Mat 23.16; 24.; Rom 2.19. “Athum chithasaranu; athuma mik khangapeo kathānana; khangapeo akhali khangapeo akhana thānakha khanini khorchopli tāzangra.”
15Kha Peterna hānga, “Chānjam chi ithumli meichitheilu.”
16Chieina Jishuna hānga, “Aruila nathumla matheishingkhuiranglā? 17Khamorli kasangsang chi paiphonli tāzanglaga phasāwui eina shokhaowa kaji matheimala? 18Kha khamorwui eina kashok chi wuklungwui eina kashokna, china mili makhao ngasaka. 19#Gal 5.19-21; 1 Cor 6.9-10; Rom 14.14. Kaja wuklungwui eina makaphā kaphaning: shaokathat, phokaphā, shāmkasā, khaleekasa̱, makhamashung shākhi khami kala khamashāt shoka. 20Mili makhao khangasak chi hibing hina kha apāng mamazikla phākazā china mili mamakhao ngasakmana.”
Sha̱nao Akhawui Shitkasang
(Mk 7.24-30)
21 #
Mk 7.24-30. Jishuna apam chiwui eina zatthuihailaga Tyre eina Sidonwui ngaleili vāhaowa. 22Kala yanglu, ngalei chili kapāna Canaanwui sha̱nao akha awuili rāda, “He Amei, Davidwui Naomayara, ili khalumashanmilu; inao ngalāva̱li kameo zanghaida marlak eina kazāda leili.”
23Kha Jishuna ali khituikhala mangahānkāmana. Chieina awui sākhangatha̱bingna ali rāhānga, “Sha̱nao hili thuingasakhaolu, ana ithumli ngakaochingda lei.”
24 #
Mat 10.6; 23. Jishuna ngahānkai, “Ili shimān kahai Israel shimkhurwui yaonaobingwui vāngmang shirātkharāna.”
25 #
Mat 8.2; 18.26; 20.20; Joh 9.38. Kha sha̱naopāva̱ china amangali khuktizangta, “Amei, ili khangachonmiphalunglu” da hānga.
26Chieina Jishuna ngahānkai, “Naoshinaobingwui zāt khuilaga fali hormi kahai mangachāmana.”
27Sha̱naopāva̱ china ngahānkai, “Mha, Proho, chithalala fabing eina tangda akhavāwui eina tākatung zatpā chi ngamuizai.”
28 #
Mat 9.22,28; Mk 10.52; Lk 7.50; 17.19. Chieina Jishuna ali ngahānkai, “O sha̱nao, nawui shitkasang haklāka! Nawui ningkachāng chithada shokranu.” Kala anao ngalāva̱ chi pung chichangli raichaohaowa.
Mi Kachungkhali Raikhami
29 #
Mk 7.31-37. Jishuna apam chiwui eina zatlaga Galilee shamadruvāk vai. Kala phungrei chili kāpama. 30Mi kachungkhana phei katek, mik khangapeo, khak khangasha̱ kala khangatatei kachungkha khuirāda Jishuwui mangāli rāhai kala Jishuna athumli raimi, 31chieina khangasha̱na matuikapai, pāng katekali raikhami, phei katekana kazat kala mik khangapeoana kathei chi mibing china theilaga matakhakhaowa; kala athumna Israelwui Vareli masochikata.
Mi Thingmatili Mikazā
(Mk 8.1-10)
32 #
Mk 8.1-10; Mat 14.13-21. #Mat 9.36. Chiwui thili Jishuna awui sākhangatha̱bingli hokhuida hānga, “Ina yarui hili lumashanlakhaira, khiwui vangkhala kaja athumna ili ngasokapam hi kathumthang kāhaira, laga athum zākhavai khikhala maleimana; kala shongfali athum vānhaipaishina da kakhum eina athumli mashiunngaimana.”
33Chieina sākhangatha̱bingna ngahānkai, “Yarui hiyākha hili mizā khavai lamhāng hili kashakazā ithumna kali vākhuirakhala?”
34Chieina Jishuna athumli ngahāna, “Nathumwuili khamui kayākha leilikhala?” Athumna ngahānkai, “Khamui shini kala khai kateokha leili.” 35Chieina Jishuna yarui chili pamzang khavai kasoi, 36ana khamui shini kala khai chi khuilaga ningkashi seihā sai kala serkhailaga sākhangatha̱bingli mi, chieina athumna yaruili yaowa. 37Athum saikorana penlak eina zākhui kala katai chi luk shini kazipkhuiya. 38Chi kazāli kazang mi mashing chi sha̱nao kala naoshinao mazangla mi thing matina.
39Chiwui thili Jishuna yarui chili shiunhailaga marikhong akhali tongphungda Magadan ngaleivāk vāhaowa.
Currently Selected:
MATTHEW 15: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
