MATTHEW 14

John Ra̱hikmewui Kathi

1 # Mk 6.14-16; Lk 9.7-9; Mk 8.28. Atam chitharan khamunga Herodna Jishuwui mingzat chi shai; 2kala ana awui raobingli hānga, “Hipā hi Ra̱hikme Johnna, kathiwui eina ringshok kahaina; chiwui vang eina ana matakhak kahai ot sākashap pangshap khaleina.”

3 # Mk 6.17-18; Lk 3.19-20; Pāng 18.16; 20.21. Kaja Herodna agato Philipwui apreiva̱ Herodiaswui vang eina Johnli tukkhuida khalaphailaga phātopli sanghaisai; 4khikhalajila Johnna, “Nana Herodiasli khangakum hi ain maningmana” da hānghaowa. 5#Mk 6.19-29. Herodna ali shaothatngaisālala yaruili ngacheehaowa, kaja Johnli marānna da yaruina khui.

6Kha Herodwui kapharā ungshungthang Herodiaswui naongalāva̱na yarui mangāli pheichak sai kala Herod penlakhaowa; 7chieina ana sha̱nao chili ana kapopo chi milākra da tuingashit sai. 8Ava̱va̱wui tui khuilaga, “Ra̱hikme Johnwui kui khongphei akhali sanglaga milu” da ana poi. 9Awunga wukhananglak haowa, kha awui tuingashit kala ngasotnaobingwui vang eina kapo chi mihaolu da kasoi. 10Ana mi shivātvāda phātopli Johnwui kui arangkhuingasaka; 11kala akui chi khongpheili sanglaga khuiungda sha̱naopāva̱ chili mi, kala ana chi ava̱va̱li khuiungmihaowa. 12Kala awui sākhangatha̱bingna awui angun chi akhuilaga chizanhaowa kala athumna Jishuli ahānga.

Thingphangāli Mikazā

(Mk 6.30-44; Lk 9.10-17; Joh 6.1-14)

13 # Mk 6.32-44; Lk 9.10-17; Joh 6.1-13; Mat 15.32-38. Ara Jishuna pao chi kashā eina marikhong akhali tongda thuihaowa, kala ngachakyāng kahai apam akhali vāhaowa. Kha yaruina chi shālaga keinungwui eina phei athi shurvai. 14Jishuna ngayipheili kashok eina mi kachungkha chili theilaga lumashanlakhaoda athumwui kazātla raimi.

15Zingyinlam awui sākhangatha̱bingna ali rāhānga, “Kazing yinghaira kala apam hi ngachakyāng kahai apamna. Ruinganai kha̱bingli vālaga athum khalattawui kashakazā alozā khavai yarui hi chihohaolu.”

16Jishuna hānga, “Athum mathuilala phai, nathumna athumli zākhavai khamilu.”

17Athumna ngahānkai, “Ithumwuili khalei hiya khamui phangā kala khaih khanimānga.”

18Chieina ana hānga, “Chibing chi iwuili khuirālu.” 19#Mk 14.22; Lk 24.30. Chiwui thili Jishuna yarui saikorali khawotungli pamzang khavai kasoi, kala khamui phangā eina khaih khani chi khuilaga kazingramli yangkāda somi, kala serkhaida khamui chi sākhangatha̱bingli mi, sākhangatha̱bingna yaruili yaowa. 20Athum saikorana ningyāngunglak eina zākhui kala katai chi sākhangatha̱bingna luk tharāda khani kazipkhui. 21Athum kazābing chi sha̱nao eina naoshinao mazangla mi thingphangā sha̱khaya.

Jishuna Yireitungli Kazat

(Mk 6.45-52; Joh 6.15-21)

22 # Mk 6.45-46; Joh 6.15-17. Chiwui thili Jishuna yaruili shiunmahungda leilakha sākhangatha̱bingli marikhongli kātong ngasaklaga ngayi lākhavāk rida vāngasakhaowa. 23Ana yaruili shiunkup kahaiwui thili seihā sākhavai kaphungli amāng kāhaowa. Kazing khaying eina tangda chili pama. 24#Mk 6.47-52; Joh 6.16-21. Kha atam chitharan marikhong hi ngayilungli ngaphongzatta ngalei kathengwui eina tālakhaowa kaja masina phanvāhairasai.

25Ngayawui pung matimaikhali Jishuna shamadrutungli zatta athumwuivāk rārāsai. 26#Lk 24.37. Kha ana ngayitungli zatkharā chi sākhangatha̱bingna kathei eina ngacheenahaida, “Hi mika̱lāna” da panglāk eina vaowa.

27Jishuna heng sāda hānga, “Pingmeilu, ina; mangacheealu.”

28Chieina Peterna ngahānkai, “Amei, nana jiakha ilila tara̱tungli zatta nawuili rāngasakmilu.”

29 # Joh 21.7. “Rālu” da Jishuna ngahānkai. Chieina Peterna marikhongwui eina shoklaga Jishuwuili vākhavai tara̱tungli zatvai; 30kha ana masi kaphan chi theida ngacheehaowa kala tara̱li ngaphumamān kaji eina “Amei, ili kakanmilu” da vaowa.

31 # Mat 6.30; 8.26; 16.8. Jishuna ngalāngda apāng katingvālaga ali yonkhuida hānga, “He shitkasang kateowa mi, khisāda ningmaongkhala?”

32Ani khani marikhongli kākatong eina masila maphanthuwa. 33#Mat 28.9; 17. Kala marikhongli tongkasa mibingna ali khorumda hānga, “Kachangkhat na Varewui Naomayaralaka.”

Gennesaretli Kazāt Raikhami

(Mk 6.53-56)

34 # Mk 6.53-56; Joh 6.22-26. Athumna kānkahawui thili Gennesaret ngaleili vai. 35Kala apam chiwui mibingna ali Jishuna da kathei eina kuikhamareili khalei kha̱bingwui eina kakazā mi kachungkha khuirai, 36#Mk 3.10; Mis 15.38; Mat 9.20. kala athumna kakazānaobingli awui chontheira̱mānglila sāza̱khui khavai poi kala chili sāza̱kakhui saikora kharai samphanga.

Currently Selected:

MATTHEW 14: TANGBSI

Highlight

Copy