MATTHEW 13

Athā Khayaowui Chānjam

(Mk 4.1-9; Lk 8.4-8)

1 # Mk 4.1-9; Lk 8.4-8; 5.1-3. Chithang Jishuna shim chiwui eina shoklaga ngayipheili apama. 2Kala mi kachungkhana ali puiruikhama, chieina ana marikong akhali kātonga kala yaruiva ngayipheili nganinga. 3Ana apong tarākha chānjam eina tamchitheida hānga: “Athā khayaoa akhana athā yakhavai vai. 4Kala ana khayao eina athā kaikhana shongfapheili tātunga, chi vānaobingna rāngamuizāhaowa. 5Athā kaikhana ngalei tarākha makhalei lungguipamli tāzangda thaklāk eina kharshoka kaja ngalei chi mathukmana, 6kha zimik kashok eina zinghām kaprorda alungbing chi angayung thukta makhalei wui vang ngahuihaowa. 7Kaikhana ka̱shātbingwui ngachaili tāzangda ka̱shātrongbing hakkasang eina shangthathaowa. 8Kaikhana ngalei katumpamli tāzangda athei mathei, thingrong kaikhali athei shāshā kala khangateili hangtharuruk thumrārā mathei.

9Shākhavai khanā kakā a china shākhuiranu.”

Chānjambingwui Kharin

(Mk 4.10-12; Lk 8.9-10)

10 # Mk 4.10-12; Lk 8.9-10. Chiwui thili sākhangatha̱bingna ali unghānga, “Khiwuivang eina nana athumli chānjam eina tamchitheikhala?” 11Chieina ana athumli ngahānkai. “Nathumli kazing wungramwui ngathum kahai chi thei khavai mihaira, kha athumli chi mamimana. 12#Mk 4.25; Lk 8.18; Mat 25.29; Lk 19.26. Kaja khalei a chili mataimeida mirorra, chieina ana chungmeikhar leihaora. Kha makhaleia a chiwui eina kateokha khalei chila khuishokhaora. 13Chiwui vang eina ina nathumli chānjam eina tamkachitheina, khiwui vangkhala kaja athumna yanglala matheimana, nganālala mashāmana kala theishingkakhuila maleimana. 14#Isa 6.9-10; Mk 8.18; Joh 12.39-41; Ots 28.26-27. Marān Isaiahna hāngmarān kahai chi athumli ungshunga, chi hithada hānghai:

‘Nathumna shākachangra kha bhap matāmara,

kala nathumna theikachangra kha mamachukmara.

15Kaja mibing hiwui ning tangmanghaira,

khanāla mashāpaithura,

athumwui mikla mikpihaira,

chi mathāsāsi kaje athumwui mik eina theira,

kala khanā eina shāra,

athumwui ning eina bhap tāshapra,

kala athumli raimi khavai ili ngareirāra.’

16 # Lk 10.23-24; Joh 8.56; Heb 11.13; 1 Pet 1.10-12. “Kha nathumwui mik kala khanā sokhami ngasaranu, kaja mikna thei, kala khanāna shai. 17Ina nathumli kachangkhat kahāngna, marān kala khangaronga mi kachungkhana nathumna kathei thada theingailaksai; kha matheirarthuwa, kala nathumna kashā chi shāngaisai, kha chi mashāthuwa.

Athā Khayao Chānjamwui Kakhalat

(Mk 4.13-20; Lk 8.11-15)

18 # Mk 4.13-20; Lk 8.11-15. “Chieina athā khayaoawui chānjam hi nganākhuilu. 19Kachikathā akhana wungramwui tui shālaga bhap makatā tharan nawui wuklungli yaosang kahai athā chi chipee china rāyonthuiya; chi shongfapheili yaosang kahai kathāna. 20Ngalei makhalei lunggui tungli yaokahai athā chiya shākhaleoda heng sāda khamathān eina khuikasangpā chikathāna; 21thalala awuili angayung maleithuwa, kha kasha̱nakhawui vang khānglaga tui chiwui vang kakhanang kachot nilala, rekakharek nilala kharā eina ngalāngda sana̱unghaowa. 22#Mat 19.23; 1 Tim 6.9-10,17. Ka̱shātronglungli yaosang kahai athā chiya tui chi shālala mirinwui vang malungkharing kala lanli leikashina tui chi shangthathaowa kala atheila mamatheithuwa. 23Ngalei katumpamli yaokahai kathā chiya tui chi shālaga bhap tākhuida atheila mathei, kaikhana shāshā, hangthararuk kala kaikhana thumrārā mathei.”

Rāmanbingwui Chānjam

24 # Mk 4.26-29. Khangatei chānjam akhala athumli hāngchithei; “Kazing wungram hiya mi akhana awui luili athā khamathā yaosang kahai eina chānjam sāpai, 25kha mibingna piphup eina leilakha awui yangkashena mā ngachaili rāman rāyaosangmihailaga thuihaowa. 26Mārongbing chi haksangda māmazan shokkaphok tharan rāmanbing chila thuiuwa. 27Chieina shimva̱ chiwui raobingna ali unghānga, ‘Amei, nana nawui luili athā khamathā mayaosangmalā? Chithākha kathada rāman zanghaokhala?’ 28Ana ngahānkai. ‘Yangkashe akhana sākāhaira.’ Raobing china ali ngahāna, ‘Thakha rāmanbing chi ithumli aphurshokhaolu kajila?’ 29Kha ana ngahānkai, ‘Maningmana, nathumna rāmanbing chi phurkashokli mārongla phurshoknarhaipaishina. 30Māhā marāranglakha eina tangda khanini chi phorrumsāranu; māhā atamli kahātbingli rāmanbing chi meili riktā khavai rida hātlaga vamvam eina tankhuilu kha mā chiya iwui chumli hailu’ da ina hāngnaora.”

Kayānghanthāwui Chānjam

(Mk 4.30-32; Lk 13.18-19)

31 # Mk 4.30-32; Lk 13.18-19; Mat 17.20. Khangatei chānjam akhala athumli hāngchithei. “Kazing wungram hiya mi akhana kayānghanthā khuilaga awui luili yaosang kahai kathāna. 32Athābingwui ngachaili hi teomeikapa, kha hi hakkasang eina khawobingwui ngachaili hakmeikap kaje thingrong akha ngasāda khamasaili yongkazata vānaobingna chiwui aphangbingli athip rāsai.”

Kapkachungwui Chānjam

(Lk 13.20-21)

33 # Lk 13.20-21; Gal 5.9; Hao 18.6. Ana khangatei chānjam akha hāngchithei: “Kazing wungram hiya sha̱nao akhana khawok ari khuilaga mathir luk kathumkhali manātlaga makapchungranglakha eina tangda thumkahai kathāna.”

Jishuna Chānjam Shikachin

(Mk 4.33-34)

34 # Mk 4.33-34; Joh 10.6; 16.25. Saikora hi Jishuna chānjam shichinlaga yaruili hāngchithei; chānjam tui akhala mazangla ana athumli matamchitheimana. 35#Laa 78.2. Hi marānna hāngkahai chi ungshung khavaiwui vangna:

“Ina chānjam shichinda hāngchitheira,

okathui haokaphokwui eina thumhaikasā chi ina hāngra.”

Rāmanbingwui Chānjam Khalatkhami

36Jishuna yarui chili nothāhailaga shimlung kazang eina awui sākhangatha̱bingna ali ngahāna, “Luili kaphor rāmanbingwui chānjam kakhalat chi ithumli hāngchitheilu.”

37Jishuna ngahānkai, “Athā khamathā khayaoa chi miwui Naomayarana. 38#Joh 8.44; 1 Joh 3.10. Lui chi okathui hina kala athā makhamathā chi chipeewui naongarāna. 39Rāman khayaoa yangkashe chi chipee china. Māhā atam chi okathui khangachang atam china, kala kahātbing chi kazingraobingna. 40Rāmanbing kazipkhuilaga meili thottā kahai thada thot akatanglila chithāpapamra. 41#Mat 24.31. Mibingli morei kala makaphā makhayā sakhangasaka athumli wungramwui ayarli kazipkhui khavai miwui Naomayarana awui kazingraobing shivātra, 42#Mat 13.50; 8.12; 22.13; 24.51; 25.30; Lk 13.28. kala athumli meifalungli horsanghaora. Chili athum kachapla chapra kala ahāla tarira. 43Chiwui thili khamashung khangarongbingna athumwui Avāwui wungramli zimik thada horra. Shākhavai khanā kakā a china shākhuiranu!

Ngathum kahai Lanwui Chānjam

44“Kazing wungram chiya lui akhali lan thumhaida khalei mi akhana samphangda yātphum kahai kathana; ana ringphākhaihaoda awui khalalei hupta ungyorserhailaga, lui chi alokhui.

Aman Kasaka Muktawui Chānjam

45“Latluida, kazing wungram chiya leihkasā mi akhana aman kasaka pearl ngalung phākazat kathāna, 46ana aman kasaka pearl ngalung akha leikasā theida awui khalalei hupta ungyorserhailaga pearl chi alokhui.

Khailanwui Chānjam

47 # Mat 13.40-42. “Latluida, kazing wungram chiya shamadruli khaihlan horsanglaga khai ayur kachiva̱ phākakhui kathāna. 48Khailan chi pemkahai eina athumna ngayipheili ngakhunshokta pamzanglaga khaih khamathāthā chi khongsaili sangkhui, kha makhamathābing chi horhaowa. 49Okthot akatangli chithada shokra. Kazingraobingna shokta makaphābing chi khamashung khangarongbingwui eina ngatei ngasakra, 50Kala athumli meifalungli horsanghaora; chili mibingna kachapla chapra kala ahāla tarira.”

Kadhara Akachang kala Kachama

51“Nathumna saikora hi bhap tāhairalā?” Athumna “Mha” da ali ngahānkai.

52Chieina ana athumli hānga, “Chiwui vang eina kazing wungramwui vang tamchithei kahaia ain kathema kachiva̱ chiya shimva̱ akha kathāna, ana awui lan kazip kahai kāwui eina kadhara kala kachama lan khuikashok kathāna.”

Nazarethli Jishuli Makhuikasang

(Mk 6.1-6; Lk 4.16-30)

53 # Mat 7.28; 11.1; 19.1; 26.1. Kala Jishuna chānjam tui saikora chi pheikupchanghailaga, apam chiwui eina thuihaowa, 54#Mk 6.1-6; Lk 4.16-30. kala aramli hanungda ana athumli synagogueli tamchithei, chi kashā mibing china matakhakhaoda athum akha eina akha ngazek ngaroka, “Mipā hina hikathā awor kala hakkhamahā otsak hi kachiwui eina samphangkhala? 55A mistriwui naomayara chi maningmalā? Ava̱li Mary mahomalā? Kala James, Joseph, Simon kala Judah awui achināngarā maningmalā? 56Azarva̱ngarā ithumli mangasopamalā? Ana saikora hi kachiwui eina tamkakhuikhala?” 57Chieina athumna ali makhuisangthuwa. Kha Jishuna athumli hānga, “Marānliva aramli kala ashi shimkhurli maningla apam khangatei khayāmakashi maleimana.” 58Kala athumna mashitkasangwui vang ana apam chili matakhak kahai ot kachungkha masāmana.

Currently Selected:

MATTHEW 13: TANGBSI

Highlight

Copy