JOHN 6

Jishuna Mi Thingphangāli Mikazā

(Mat 14.13-21; Mk 6.30-44; Lk 9.10-17)

1 # Mat 14.13-21; Mk 6.32-44; Lk 9.10-17. Chiwui thili Jishuna Galilee shamadru vāklaida khalei Tiberias ngayili vai. 2Kakazānaobingli matakhak kahai otsak eina raimi kahai chi theida mi kachungkhana ali shurrai. 3Jishuna kaphung akhali kāda awui sākhangatha̱bingli ngasoda apama. 4Chitharan Jihudiwui Makānkhami phanit chi nganaihairasai. 5#Joh 1.43; 12.21. Jishuna kapeiungda mi kachungkha rakharā chi kathei eina ana Philipli hānga, “Mi hiyākhali mizā khavai kashakazā kali alorakhala?” 6Hi Philipli chāng yangkida kasāna, kachangkhat khi sarakhala kaji ana thei. 7Philipna ngahānkai, “Mi hiyakhali kateteo mizā khavai lupā shakhani eina lolala kalikha matangmara.” 8#Joh 1.40; 12.22. Khangatei sākhangatha̱ akha, Simon Peterwui agato Andrewna hānga, 9#Joh 21.9-13. “Naoshinao akhana khamui phangā, khai khani da khuiphungda lei, kha mi hiyākhali china kali tangra?” 10“Mi katongali pamzang ngasaklu,” da Jishuna hānga. Kaja chili khawo kachungkha phorsai. Chieina mi katonga pamzanga, saikora chi mayarnao thingphangā shākhana. 11Jishuna khamui chi khuida seihā samihailaga kapambing chili yaowa. Khaih chila khuida chi tākam eina sai, kala mi saikora thoserhaowa. 12Athum thoting kahai eina Jishuna sākhangatha̱bingli hānga, “Shaineng chi ngamuikhuilu, kateokhala mashimān ngasakalu.” 13Chieina khamui phangā chi mibingna shailaga shaineng luk tharāda khani pemda ngamuikhui. 14#Mat 21.11. Matakkhak kahai ot kasā chi theilaga mibingna, “Kachangkhat okathuili rāki kaje marān chi alaka” da hānga.

15 # Joh 6.3; 18.36. Mibingna Jishuli tandi eina awunga sāngasak khavai rārāli kaji theihaoda Jishuna kaphungvāk thuiluishithaowa.

Jishuna Tara̱tungli Kazat

(Mat 14.22-33; Mk 6.45-52)

16 # Mat 14.22-27; Mk 6.45-51. Kazing khaying eina sākhangatha̱bingna shamadruvāk tāhaowa, 17kala marikong tonglaga shamadru kānda Caperna-umvāk latunga. Ngayāhailala Jishuna athumwuili maunglakthuwa. 18Chitharan siphan zingrot ungda tara̱ ngaphaokazamhaowa. 19Athumna kilometer phangā tharuk huivā kahaiwui thili Jishuna tara̱tungli zatta marikhongvāk rākharā chi athumna theida ngacheelakhaowa. 20Kha Jishuna athumli, “Mangacheealu, ina” da hānga. 21Jishuna marikhongli kākatong eina athum ringphālakhaowa, kala ngalāngda athumna vāki kaji apam ngalei kathengli vāshunghaowa.

Mibingna Jishuli Kaphā

22Akhama kathā shamadru vāklaida leikasābingna marikhong akhamāng leikasā chi thei, kala Jishuna sākhangatha̱bingli mangasola athummāng marikhong tonglaga thuikahai chila thei. 23Chitharan Tiberiaswui eina kharā marikhongbing chi, Prohona seihā sālaga mi kachungkhali khamui mikashai apam chiwui ngalemli rāngasāma. 24Mibingna Jishula, sākhangatha̱bingla chili mazangmana kaji theida marikhong chili kātonglaga Capernaumli Jishuli phāvai.

Jishuna Kharingawui Kashakazāna

25Mibingna shamadruwui lākhavāk Jishuli kāsamphangda hānga, “Ojā, na katharan hili rāshung kajikhala?” 26Jishuna ngahānkai, “Kachangkhat eina ina nathumli kahāngna, nathumna ili kaphā hi machut kathei chiwui vang maningmana, kha khamui shaida katho samkaphangwui vangna. 27#Isa 55.2. Shimānki kaji kashakazāwui vang ngalang mazāralu, kha miwui Naomayarana nathumli miki kaji katang makhavai kharinga kashakazāwui vang ngalangzarlu, kachiwui vangkhala kaja Varena awui mayākhamiwui mahor ali nammihaira.” 28Chieina athumna ngahāna, “Varewui ot sākhavai ithumna khi sāngayikhala?” 29#1 Thes 1.3; 1 Joh 3.23. Jishuna athumli ngahānkai, “Ana shirātkharāpa chili shitkasang hi Varena sāngasakkhangai chilaka.” 30#Mat 12.38; Mk 8.11. Athumna ngahānkai, “Ithumna theilaga nali shitsang khavai nana khi machut leikhala? Nana khi sahairakhala? 31#Sho 16.4,15; Mis 11.8; Neh 9.15; Laa 78.24; 105.40. Ishawo ishayi ngarāna lamhāngli manna zai kaji kathara lairikli hithada hānghaida lei; chiya, ‘Ana athumwui zākhavai kazingramwui eina khamui mi.’” 32Jishuna hānga, “Kachangkhat eina ina nathumli kahāngna, nathumli kazingramwui khamui khame chi Moses maningmana, kha iwui Avāna kazingramwui eina khamina. 33Kaja kazingramwui eina tālaga apuk-apagali kharing manglā khami chi Varewui khamuina.” 34#Joh 4.15; Mat 6.11. Athumna Jishuli hānga, “Amei, ithumli khamui chi michinglu.”

35Jishuna hānga, “I kharingawui kashakazāna, ili kharā mi chi mathaimara, kala ili shitkasanga mi chi mara̱changlakmara. 36#Joh 6.48-50; 4.14. Kha ina kahāng hina kaja nathumna ili theihailala mashitsangmana. 37#Joh 17.2. Avāna ili khamibing saikora china ili rāra, kala ili kharā mi chili ina mahorhaimara. 38#Joh 4.34; 5.30. Kaja ina kazingramwui eina katā hi I khalattawui ningkachāng maningmana, kha ili kashirātawui ningkachāng sākhavaina. 39#Joh 17.12; 18.9. Ili kashirātana ili sāngasakkhangai chi hina; chiya, ana ili mikahai saikora chi akhala mashimān ngasakla khanao zimiksholi ina athumli ringshok ngasakserphalungra. 40#Joh 5.29; 11.24; 6.54. Hi iwui Avāwui ningkachāngna kaja Anaomayarali theilaga ali shitkasangbingli katang makhavai kharing samphang ngasakra. Kala khanaowa zimiksholi ina ali ringshok ngasakra.”

41“I kazingramwui eina katā kashakazāna” da Jishuna kahāngwui vang Jihudibingna kapupta matui. 42#Lk 4.22; Joh 7.27. Chieina athumna hānga, “Mipa hi Josephwui naomayara maningmala? Ashi ava̱ eina avāva̱li ithum thei. Chithākha ana kathada kazingram eina katāna jikhala?” 43Jishuna ngahānkai, “Nathum kapupta mamatuialu. 44#Jer 31.3; Hos 11.4; Joh 12.32; 6.65. Ili kashirāta iwui Avāna rākhangasak maningla khipākha ili marārarmara, raakha ina ali khanaowa zimiksholi ringshok ngasakra. 45#1 Thes 4.9; 1 Joh 2.27; Isa 54.13. Marānbingna hithada kapihaida lei: ‘Athum saikorali Varena tamchitheira.’ Avāva̱li nganāsangda awui eina tamkakhuia mi kachiva̱ iwuili rai. 46#Joh 1.18. Varewui eina kharā chi maningla khipākha Avāva̱li matheiranga; Varewui eina kharā amāngna thei. 47Kachangkhat eina ina nathumli kahāngna, shitkasanga mi chi katang makhavai kharing samphanga. 48I kharingawui kashakazāna. 49Nathumwui avāngarana lamhāngli manna zai, kha thihaowa. 50Kazingramwui eina katā kashakazā chiya zālaga makathi china. 51I kazingramwui eina katā kharinga kashakazāna. Kachikathāna hi zaakha a katang mavaila ringra kala apuk-apaga ringkhavai ina miki kaji kashakazā chiya iwui asāna.”

52 # Joh 3.4; 4.9. Chieina Jihudibingna ngayāt ngarokta hānga, “Mipa hina kathada awui asā ithumli mishaipairakhala?” 53Chieina Jishuna athumli hānga, “Kachangkhat eina ina nathumli kahāngna, miwui Naomayarawui asā mashaiakha kala ashee mamangakha nathumwuili kharing kaho maleimana. 54Iwui asā kashai kala iwui ashee khamang a china katang makhavai kharing samphangra, kala ali khanaowa zimiksholi ringshok ngasakra. 55Kaja iwui asā hi shaikhavailaka kala iwui ashee hi mangkhavailaka. 56#Joh 15.4; 1 Joh 3.24; 4.15. Iwui asā kashaia kala ashee khamanga chi ili lei kala I ali lei. 57Ili kharinga Avāva̱na kashirātna kala awui vang I kharingna. Chithada sāda iwui asā kashaia chi iwui vang eina ringa. 58#Joh 6.41,51. Hi kazingramwui eina katā khamui china, navā ngarāna shailaga thikahai khamui kathā maningmana. Kashakazā hi kazā mi chi katang mavaila ringra.” 59#Joh 6.25. Hi ana Capernaumwui synagogueli tamchitheida kahāng tuina.

Makashimān Kharinga Tui

60Jishuwui athi kashura kachungkhana hi shāda hānga, “Tamkachithei tui hi saknāli, khipāna nganākhuipairakhala?” 61#Mat 11.6. Sākhangatha̱bingna kapumkakaseo chi theida Jishuna hānga, “Nathumla mamayāngaimala? 62#Joh 3.13; 17.5. Nathumna miwui Naomayarana rida ana pamkasā awui apamli kāluishit kaji theisi kaja khi phaningra? 63#2 Cor 3.6; Joh 6.68. Manglā china kharing chi khamina, asā hiya aremana; ina nathumli hāngkahai tui chi manglā kala kharingana. 64#Joh 2.25. Kha nathum kaikhana mashitsangmana.” Kaja haokaphokwui eina athum mashitsangmana kala khipāna ali hatrakhala kaji Jishuna thei. 65#Joh 6.44; 3.27. Chieina Jishuna hānga, “Hiwui vang eina nathumli hānghaira kaja Avāva̱na khamayāpā chi maningla khipākha iwuili marārarmara.”

66Chiwui thili athi kashura mi kachungkha mashurluithuwa. 67Jishuna tharāda khani chili hānga, “Nathumla ngalanthuingaila?” 68#Mk 8.27-30. Simon Peterna ngahānkai, “Proho, ithum khipāwuili varakhala? Namāngli makashimān kharing tui chi lei. 69Ara ithum shitsanghaira, kala ithumna theihaira, Varewui Tharkhamathengapa chi nalaka.”

70 # Joh 15.16; 19. Jishuna ngahānkai, “Ina nathum tharāda khanili kapangkakhui maningmala? Kha nathumwui ngachaili akhava chipeena.” 71#Joh 13.2,27; 17.12. Hi ana Simon Iscariotwui naomayara Judas, tharāda khaniwui ngachaili ali hatki kajipawui pongli kahāngna.

Currently Selected:

JOHN 6: TANGBSI

Highlight

Copy