JOHN 7
7
Jishu kala Achinangarā
1Hiwui thili Jishuna Galileeli yaovai. A Judeali mavāngaithuwa, kaja chili khalei Jihudibingna ali shaothat khavai rimhaowa. 2#Pāng 23.34; Khal 16.16. Chitharan Jihudiwui Tabernacle phanit nganailakhairasai. 3#Mk 3.21,31; Mat 12.46. Chieina Jishuwui agato ngarāna ali hānga, “Nawui sākhangatha̱bingna nana sāda khalei theikhavai hili mapamluila Judeali ungulu, 4kaja khamaho ningkachāngbingna awui otsak ngathumda kasā khangachā maningmana, hikathā hi saga jiakha na khalatta apuk-apagva̱li chitheilu.” 5Achinā ngarā eina tangda ali mashitsangmana. 6#Mat 26.18; Joh 2.4; 7.30. Jishuna athumli hānga, “Iwui atam marāranga, kha nathumwui vanga sāpaichinga. 7#Joh 15.18-21. Okathuina nathumli maningkachairarmana, kha ili ningkachai, kaja chiwui otsakbing chi makaphāna da ina hāngching kajiwui vangna. 8Nathum Phanit chili azanglu, iya mavāfamara kaja iwui atam marāranga.” 9Ana hi hānghailaga ava Galileeli pamsanghaowa.
Jishuna Tabernacle Phanitli Khavā
10Agato ngarā vākahaiwui thili Jishuna vai, kha phonglāk eina mazatla ngayinzata. 11Jihudiwui akhavābingna, “Jishu kali leikhala” da ngathinglaga phāzata. 12#Joh 7.40-43. Mibingna Jishuwui pongli ngazek ngaroka; kaikhana “A kaphā mina” ji, kala kaikhana “Mibingli ana thannguihaira” da hānga. 13Chithālala Jihudiwui akhavābingli ngacheehaoda khipākha awui pongli phonglāk eina mamatuilengmana.
14Phanit chi alung zangkahai eina Jishuna khorumshimli zangda tamchithei. 15Jihudiwui akhavābingna matakhakhaida hānga, “Mipa hi lairik matamlakla kathada hiyākha theihaokhala?” 16Jishuna ngahānkai, “Ina tamkachithei hi iwui eina kashok maningla, ili kashirāta Varewui eina kharāna. 17Kachikathāna Varewui ningkachāng chi sāngaida leiakha, ina tamkachithei hi Varewui eina kharākā, I khalattawui sāshap eina khamatuikhala kaji theira. 18Khalatawui sāshap eina khamatuia china khalattawui maikhayā phai, kha ali kashirātawui maikhayā kaphā a chi khamashungana kala awuili sākakhaning maleimana, 19#Joh 1.17. Mosesna ain khami maningmala? Kha nathum khipākha ain chi mamayonmana. Khiwui vang eina nathumna ili shaothat khavai hotkhanākhala?” 20#Joh 8.48; 10.20; Mat 11.18; Mk 3.22. Athumna ngahānkai, “Chipee zanghaira, nali khipāna shaothatra jikhala?” 21#Joh 5.2-9. Jishuna ngahānkai, “Ina matakhak kahai ot akha sai, kala nathum saikora matakhakhai. 22#Pāng 12.3; Hao 17.10; 21.4. Mosesna nathumwui naongarāli ahui rimshok khavai kasoi, (kachangkhatpāva Mosesna maningla nawo ngarāna haokaphokna) kala nathumna nanaongarali Sabbath zimiksholi ahui rimshoka. 23#Mk 3.5; Lk 13.12; 14.4. Moseswui ain makai khavai Sabbath zimiksholi ahui rimshokmiakha ina Sabbaththang kakazā mi akhali raikhamiwui vang khisāda malungvātkhala? 24#Joh 8.15; Isa 11.3; Zec 7.9. Zakmai eina bichar masaalu; kha khamashung eina bichar sālu.”
A Messiahlā?
25Jerusalemwui mi kaikhana hānga, “Akhavābingna shaothatra kaji mipa chi hi maningmala? 26Yanglu, ana phonglāk eina matuilala khipānakha awuitungli mahāngmana. Kathānabingla a hi Khrista china da theihaola? 27#Joh 6.42; 7.41; 9.29. Messiah kharā tharan a kachiwui eina rākhala da khipākha matheimara. Kha mipa hi kachiwui eina kharākhala kaji ithum thei.” 28#Joh 8.42. Jishuna khorumshimli tamchitheida panglāk eina hānga, “Nathum ili theila kala I kachiwui eina kharākhala kaji thei kachangkhatla? Iningsasak eina kharā maningmana, kha ili kashirāta a chi khamashungana. Nathum ali matheiranga. 29#Joh 8.55; 17.25; Mat 11.27. Kha iya ali thei, kaja I awui eina kharāna kala ana ili kashirātna.” 30#Joh 7.44; 10.39; Mk 12.12; Joh 8.20. Chieina athumna ali tukkhui khavai sai, kha khipānakha ali pāng maparmana, kaja awui atam marārangsai. 31#Joh 8.30; 10.42; 11.45. Thālala yaruiwui ngachaili mi kachungkhana ali shitsanga kala athumna hānga, “Messiah kharā tharan mipā hina kasāli lāngmeida sāshaprala?”
Jishuli Tukkhui khavai Khangarān
32Mibingna Jishuwui maramli kakhalop chi Phariseebingna shai, chieina pāngmon akhokabing eina Phariseebingna Jishuli tukkhui khavai akhavābing chihovai. 33#Joh 8.21; 12.35; 13.33; 14.19; 16.16-19. Chieina Jishuna hānga, “Ina nathumli kasha̱nakhawui vang ngasopamra, chiwui thili ili kashirātawui ngalemli vahaora. 34Nathumna ili phālala masamphangluimara; I khaleipamli nathum marārarmara.” 35#Jam 1.1; 1 Pet 1.1; Joh 12.20; Ots 11.20. Jihudi akhavābing athum eina athum ngazek ngaroka, “A kali vaukida ali maphākhuirarmara kajikhala? Ithumwui mibing chaida khalei Greeknaowui keinungbingli vāda Greeknaobingli atamchitheira kajila? 36Ana ‘Nathumna phālala ili masamphangluimara kala ina vāki kaji apamli nathum marārarmara’ da kahāng hi khisa-uyi kajikhala?”
Kharinga Tara̱
37 #
Pāng 23.36; Joh 4.10; 14. Phanitwui khanaowa kala khamataiyathang Jishuna nganingda panglāk eina hānga, “Kachikathāna ra̱changakha iwuili rāmangkhuilu. 38#Isa 44.3; 55.1; 58.11. Kathara Lairikli hāngkahai thada ‘Kachikathāna ili shitsangakha awui wuklung eina kharing tara̱wui kongra̱ longshokra.’” 39#Joh 20.22; 12.23. Hi ali shitkasangbingna samphangki kaji Manglāwui tui kahāngna. Kaja Jishuna tekhamatei eina maringshokrangsāthuda Manglā chi mamirangsai.
Mibing Ning Khangakai
40 #
Joh 1.21; Mat 21.11. Mi kachungkha chiwui ngachaili kaikhana tui hi shālaga hānga, “Mipā hi marānlaka.” 41Kaikhana hānga, “A Khrista china.” Kha kaikhana “Khrista hi Galileewui eina rāmaraola? 42#Mic 5.2; Mat 1.1; Lk 2.4. Kathara lairikli hāngkahai Messiah chi Davidwui shangnaora kala Davidna pamkasa keinung Bethlehemli pharāra” da hanghaili ji. 43Hithada sāda athumwui ngachaili Jishuwui maramli ning ngakai khangarok shokhaowa. 44#Joh 7.30; 10.39. Kaikhana Jishuli tukkhuingai, kha khipānakha pāng maparmana.
Jihudi Kathānabingwui Mashitkasang
45Pāngmon akhokabing eina Phariseebingna kachiho akhavābing chi latkhaung tharan, “Khisāda ali matukkhuithukhala?” da ngahāna. 46#Mat 7.28. Mibing china ngahānkai, “Mipā hina khamatui thada khipānakha mamatuilakmana!” 47Chieina Phariseebingna “Nathumlila ana pāngasakhaola? 48Kathāna maningakha Phariseewui ngachaili kachikathā ali shitkasang khaleihairala? 49Kha ain makathei ashangva̱ hili khonshihaira.” 50#Joh 3.1; 19.39. Jishuli rida asamphang kahaia Nicodemusla chili leisai. Ana athumli hānga, 51#Khal 17.6; Sho 23.1. “Ithumwui ain athishurda mi akhali bichar sālaga khayon matheiranglakha khayon mamipaimana.” 52#2 Wung 14.25. Chieina athumna ngahānkai, “Nala Galileewui eina kharāla? Kathara Lairik pāyanglu, kachilikha Galileewui eina marān mashoklakmana kaji theira.”
53Athum ichāchāwui shimli ungserhaowa,
Currently Selected:
JOHN 7: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.
