JOHN 4

Jishu eina Samariawui Sha̱nao

1 # Joh 3.22. Johnwuili lāngda kashura kachungkhali Jishuna ra̱hikmi kaji Phariseebingna kashā eina, 2(Kachangkhat Jishu a khalattana ra̱hikkhami maningla awui sākhangatha̱bingna kasāna) 3ana Judeawui eina Galileeli latunga. 4#Lk 9.52; 17.11. Shongfa chi Samariawui eina ngaruivāki kajina. 5#Hao 33.19; 48.22; Jos 24.32. Chieina Jacobna anaomayara Josephli khami tampāk chiwui ngalemli khalei Sychar kaho Samariawui keinungli ana vai. 6Jacobwui ra̱khong chi chili lei, kala Jishuna ram zatta chothaoda ra̱khong chiwui ayarli apamkhui, chi pung katharuka maikhawui atamlina.

7Apam chili Samariawui sha̱nao akha tara̱ rātārasai. Jishuna ali hānga, “Ili tara̱ khamimanglu.” 8Chitharan awui sākhangatha̱bing keinungli kashakazā alothuihairasai. 9#Mat 10.5; Joh 8.48; Ezr 4.3-6. Samariawui sha̱nao china hānga, “Nava Jihudinaona kala iya Samarianaona, kathada Samariawui sha̱nao ili tara̱ pokhala?” Kaja Jihudibingna Samarianaoli ot mangaronmana. 10#Joh 7.37; Phon 21.6; 22.17. Jishuna ali ngahānkai, “Nana Varewui lemmet chi theisāsi kaja kala ‘Ili tara̱ khamimanglu’ da kapopa hi khipākhala da theisi kaja nana ali poda ana nali kharinga tara̱ chi mihaira̱ra.” 11Sha̱naopava̱ china hānga, “Amei, nava tara̱ sokkhui khavaila makhuiphung, kala ra̱khongna hiyākha thuklaga nana kachiwui eina kharinga tara̱ chi khuimirakhala? 12Ishawo Jacobli na reimeila? Ana ithumli ra̱khong hi khamina, kala ala awui naongarābingla kala sha̱keibingla hi mangkasāna.” 13Jishuna hānga, “Tara̱ hi khamanga mi kachiva̱ ra̱changluishitra, 14#Joh 6.35; 7.38. kha ina miki kaji tara̱ chi khamanga a chi mara̱changluimara. Ina miki kaji tara̱ chiva awuili katang makhavai kharing wurkashoka ura ngasāhaora.” 15#Joh 6.34. Sha̱naopava̱ china hānga, “Amei, ina mara̱changlui khavai kala apam hili tara̱ marātālui khavai tara̱ chi ili khamilu.”

16Jishuna hānga, “Nagaharali unghokhuilaga hili rālu.” 17Sha̱naopava̱ china ngahānkai, “I igahara maleimana.” Jishuna ali hānga, “Nana nagahara maleimana da kahāng chi mashunga. 18#2 Wung 17.24; Hos 2.7. Kaja na mayar phangāli ngakumhaira, kala arui pamrumda khaleipa hila nagahara maningmana. Na mashungda hāngda lei.” 19Sha̱nao china hānga, “Amei, na marān akhana da ina thei.” 20#Khal 11.29; Jos 8.33; Lk 9.53. “Ishawo ngarāna phungrei hili khoruma, kha nathum Jihudibingna khorum khangayi apam chi Jerusalemna da hānga.” 21#Joh 5.25; 16.2,32; Mal 1.11. Jishuna hānga, “He sha̱nao, ili shitsanglu. Avāva̱ chili mibingna kaphung hilila, Jerusalemlila makhorumluiki kaji atam chi rārāli. 22#2 Wung 17.28-41; Isa 2.3; Rom 9.4. Nathum Samarianaona khipāli khokharumkhala da matheimana, kha Jihudi ithumna khipāli khokharumkhala da thei, kaja huikhame hi Jihudiwui eina rai. 23Khamashung eina khokharumabingna Avāva̱li manglā kala khamashung eina khorumki kaji atam chi rārāli, chi arui hina, kaja Avāva̱na ali chithada khorum ngasakngai. 24#Phil 3.3. Vare hiya Manglāna, chieina ali khokharumbingna manglā kala khamashung eina khorumphalungra.” 25Sha̱nao china hānga, “Messiah (Khristala kaho) chi rāra da ina thei. Ana kharā tharan ot saikora ithumli ana hāngchitheira.” 26#Joh 8.24. Jishuna ali hānga, “Nali ngazekta khalei I hi a laka.”

27Chichangli sākhangatha̱bing rārāsai. Ana sha̱naoli khangazek chi athum matakhakhaowa, kha khipānakha “Na khi ningkachangkhala?” lah “Khisāda sha̱nao chili khangazekkhala?” da mahāngmana. 28Chieina sha̱nao china awui tara̱ham haihailaga keinungli latungda mibingli hānga, 29#Joh 7.26; Mat 12.23. “Rāyanglu, ina sākahai saikora hāngmishapa mi akha lei, hi Khrista chiralā?” 30Athumna keinungwui eina rāda Jishuli samphanga.

31Athum rāmahungda leilakha sākhangatha̱bingna Jishuli, “Ojā, phazākhuifalu” da hānga, 32#Mat 4.4. kha Jishuna athumli hānga, “Nathumna makathei kashakazā ina zāki kaji lei.” 33Chieina athum akha eina akha, “Kachikathāna ali kashakazā khuiungmihairala?” da ngazek ngaroka. 34#Joh 5.30; 6.38; 17.4. Kha Jishuna hānga, “Ili kashirātawui ningkachāng ot kasā kala chi ungshung khangasak chi iwui kashakazāna. 35#Lk 10.2; Mat 9.37. Nathumna, ‘Kachāng mati vātfaya, chiwui thili māhā rāra’ da mahāngmala? Ina nathumli kahāngna, namik kapeikāda ngashānyanglu, mā chi hātkhavai minhaira. 36Kahāta china langhai samphanga kala katang makhavai mirinwui heiun kazipkhui, chieina khayaoa eina kahāta ringpharumra. 37#Job 31.8; Mic 6.15. Chānjam hi mashunglaka, ‘Akhana yaowa, akhana hātkhui.’ 38Nathumna mavākasang lui chi nathum hātkhui khavai ina nathumli kashivātna, khangateina vāsangmihaira, nathuma thada hātki kajimaya.”

39Kala sha̱naopava̱ china “Ina sākahai saikora chi ana hāngmihaira” da shākhi khamiwui vang Samarianao kachungkha Jishuli shitsanghaowa. 40Kala athumna Jishuwuili rāda ngasāmsangmi khavai poi, chieina ana khanithang pamsanga. 41Awui tui shālaga apam chiwui mi kachungkha ali shitsanghaowa. 42#1 Joh 4.14; 2 Tim 1.10. Athumna sha̱naopava̱ chili hānga, “Nana kahāng chiwui vangmāng ithumna shitkasang maningmana, kha ithum khalattana awui tui shāhaira kala a hi okathuiwui Huikhamelaka da ithumna theihaira.”

Jishuna Akhavā Akhawui Naoli Raikhami

43Khanithangwui thili Jishuna Galileeli vāhaowa. 44#Mk 6.4; Mat 13.57. Jishu a khalattana, marān kaho hili awui ramli khayākashi mangachāmana da hāngphata. 45Jishuna Galileeli kharā tharan chiwui mibingna mathānthathup eina rāsamphanga kaja athumna phanitli Jerusalem kakā tharan Jishuna kasāsā saikora theihairasai.

46 # Joh 2.1-11; Mat 8.5-10; Lk 7.2-10. Chiwui thili Jishuna Galileeli khalei Cana, tara̱ eina drakhāra̱ onkhangasakpam chili latunga. Chitharan Capernaumli akhavā akhawui nao kazāda leisai. 47Mipā china Jishu Judeawui eina Galileeli rāhaira kaji kashā eina thinanai khalei awui naomayarali raimi khavai apoi. 48#Dan 4.2; Mk 13.22; Ots 2.19; 4.30; Rom 15.19; Heb 2.4. Chieina Jishuna ali hānga, “Nathum hiya machut kala matakhak kahai otsak matheiranglakha eina tangda mashitsangmana.” 49Akhavāpa china hānga, “Inao mathiranglakha kharāmilu” 50Jishuna hānga, “Ungulu, nanao ringra.” Mipa china Jishuna kahāng shitsangda latunghaowa. 51Ana shim maungshungranglakha awui raobingna pao khuirada hānga, “Nanao kakazā phāhaira.” 52Chieina ana atam katharān phāhaokhala da khangahān eina athumna ngahānkai, “Ayā ngashun pung akha katā tharan kakharur vānhaowa.” 53#Ots 11.14. Chieina a khalattala kala ashi shimkhur katongala shitsanghaowa. 54#Joh 2.11. Jishuna Judeawui eina Galileeli kharā tharan machut kachithei hina kakhanena.

Currently Selected:

JOHN 4: TANGBSI

Highlight

Copy