JOHN 3

Jishu eina Nicodemus

1 # Joh 7.50; 19.39; Lk 23.13; Joh 7.26. Chitharan Phariseewui mi akha Nicodemus kaho Jihudiwui kathāna akha leisai. 2#Joh 2.11; 7.31; 9.16; Ots 10.38. Thangngayākha ana Jishuli rahānga. “Ojā, nava Varena chihokharā ojā akhana da ithumna thei. Sakahai machutbing hi Varena ngasokhami maningla khipānakha masārarmana.” 3#Joh 1.13; 1 Pet 1.23; Jam 1.18; 1 Joh 3.9. Jishuna ngahānkai, “Kachangkhat eina ina nali kahāngna, mapharāluishitakha khipānakha Vare wungram matheirarmara.” 4Nicodemusna, “Mi akhana sārhailaga kathada pharāluishitpairakhala? Ana ava̱wui wuklungli zangluishitlaga kakhane sāda pharāluipairala?” da ngahāna. 5#Ezek 36.25-27; Eph 5.26; Tit 3.5. Jishuna ngahānkai, “Kachangkhat eina ina nali kahāngna, kachikathāna tara̱ eina kala Manglā eina kapharā maningakha Vare wungramli mazangrarmara. 6#1 Cor 15.50. Phasāna kapharā chi phasāna kala Manglāna kapharā chi manglāna. 7Ina nali kahāng hi mamatakhakhaialu, ‘nathum pharāluishitphalungra. 8#Ezek 37.9. Masina awui phankhangaili phana, kala chiwui akhon nathumna shālaga kachiwui eina phankharā kala kachivāk phanvāhaokhala kaji nathum matheimana. Manglāna kapharā mi kachiva̱ chithāpapama. 9“Kathada hi sapairakhala?” da Nicodemusna ngahāna. 10Jishuna ngahānkai, “Na Israelwui ojā akhalaga chi matheimala? 11#Joh 8.26; 1.18; 3.32. Kachangkhat eina ina kahāngna, ithuma ithumna kathei chi matui kala mik eina theikahai chi shākhi mi, kha nathumna ithumwui shākhi hi makhuisangmana. 12Ina okathuiwui ot hānglaga nana ili mashitsangakha kazingramwui ot hāngda nana kathada ili shitsangrakhala? 13#Rom 10.6; Eph 4.9. Kazingramwui eina katā miwui Naomayara chi maningla khipākha kazingram kākahai maleimana.” 14#Mis 21.9; Joh 8.28; 12.34. Mosesna lamhāngli phara̱li khāngkakā chithada miwui Naomayaralila khāngkāphalungra. 15Kala ali shitkasanga mi kachiva̱ katang makhavai kharing samphangra. 16#Rom 5.8; 8.32; Eph 2.4; 1 Joh 4.9-10. Khikhalajila Varena apuk-apagva̱li leishinā kahaiwui vang awui Naohonaotong chi mi, chieina ali shitkasanga mi kachiva̱ mashimānphalungmara kha katang makhavai kharing samphangra. 17#Joh 8.15; 12.47; Lk 19.10; 1 Joh 4.14. Okathuili bichar sākhavai Varena Anaomayarali chihokharā maningmana, kha awui mangā eina apuk-apaga hi huikhui khavaina. 18Ali shitkasanga chili bichar masāmana, kha mashitkasanga chili bichar sāpinghaira, kaja ana Varewui Naohonaotong chiwui mingli mashitsangthuwa. 19#Joh 1.4; 8.12; Eph 5.11,13. Kala bichar chi hithai: kahor chi okathuili rāhaira, kha mikumona tangkhamangli leishitha̱haowa kaja athumwui otsak maphāmana. 20Makaphā kasā mina kahorli ningkachai kala athumna kahorli marāngaimana, kaja awui otsak mathei ngasakngaimana. 21#1 Joh 1.6. Kha khamashung khangarong kasaa china awui otsak chi Varewui ningkachāngna da mathingrik eina theikhavai kahorli rai.

Jishu kala John

22 # Joh 4.2. Chiwui thili Jishula, awui sākhangatha̱bingla Judea ngaleili vai. Apam chili athumli ngasopamda ra̱kahikla ra̱hikmi. 23Johnnala Salimwui ngalemli khalei Aenonli ra̱hikmisai. Kaja apam chili tara̱ tarākha leisai. Mi kachungkha rāda ana ra̱hikmi. 24#Mk 1.14; 6.17-18. Kaja John phātopli mazangrangsai.

25Chitharan Johnwui sākhangatha̱bing eina Jihudi akha dharmawui pheokhamatharwui pongli ngayāt khangarok shokka. 26#Joh 1.7,28. Chieina athumna Johnli ahānga, “Ojā, Jordan kongwui zimikshovāk nali ngasokasā, nana awui maramli shākhi khamipā china hili ra̱hikmida leili, kala mi sorkhangasai awuili vāda lei.” 27#1 Cor 4.7. Johnna ngahānkai, “Kazingramwui eina khami maningakha khipānakha khikha masamphangrarmana. 28#Joh 1.20,23. ‘I Khrista maningmana kha ali rimeida ili chihokharāna’ da ina hāngkahai chiwui shākhi chi nathumna. 29#Mk 2.19-20; Mat 25.1; Joh 15.11. Khām kahaiva̱ leikahaia chi khām kahaiana. Khām kahaiawui khamashita, awui ngalemli nāshungda khalei china khām kahaiva̱wui akhon kashā eina mathāna. Chithada sāda iwui ringkaphā chi ara kāshunghaira. 30A mataisangphalungra, kha iya teosangphalungra.”

Kazingram eina Katā Jishu

31 # Joh 3.13; 8.23; 1 Joh 4.5. Atungshongwui eina katā china saikorali reimei. Okathuiwui eina kharā china okathuiwuina, kala okathuiwui apongli matui, kha kazingramwui eina kharā a china saikorawuitungli lei. 32#Joh 3.11. Jishuna awui kathei kashā chi hānga, kha khipānakha makhuisangmana. 33Awui shākhi khuikasanga china Vare hi khamashungalaka kaji hāngshapa. 34Varena kashivāta a china Varewui tui matui kaja Varena Manglā chi khavāt maleila ali mi. 35Avāva̱na Anaomayarali leishiya kala ot saikora awui pāngli horsangmi kahaina. 36#Joh 3.16; 5.24. Naomayara chili shitkasanga mi chi katang makhavai kharing lei; kahāng makhanganaa chi kharing kaho matheimara, kha Varewui malungkhavāt awuitungli lei.

Currently Selected:

JOHN 3: TANGBSI

Highlight

Copy