JOHN 19

1Chiwui thili Pilatena Jishuli shaongasaka. 2#Mat 27.27-31; Mk 15.16-20; Lk 22.63-65; 23.11. Kala shipaibingna ka̱shatthing eina wungkuihon sākhuilga akuili ngahonmi; kala mengchin kahai kachon akha ngavaimi; 3kala “Jihudiwui Awungali okpeimeiranu” da hānglaga athumna maili kākapheya. 4#Joh 18.38; 19.6; Lk 23.4. Pilatena kayāngli shokluishitta yaruili hānga, “Awuili ina khayon khikha masamphangmana da nathumna theikhavai ina ali hili khuishokta lei.” 5Chieina Jishuna ka̱shat kuihon ngahonda kala mengchin kahai kachon ngavaida kayāngli shoka. Pilatena athumli hānga, “Yanglu, mi chi hina!” 6Pāngmon akhokabing kala kathānabingna ali kathei eina “Krushli shaoshānhaolu! krushli shaoshānhaolu!” da vaokazama. Pilatena athumli hānga, “Chithākha nathumna rākhuilaga krushli shaoshānlu, kaja iya awuili khikha khayon masamphangmana.” 7#Pāng 24.16; Mk 14.61-64; Joh 5.18; 10.33. Jihudibingna ngahānkai, “Ana Varewui Naomayarana da kahāngwui vang a thingayiphalunga kaji hi ainli kapihaida lei.” 8Chi shālaga Pilate ngacheemeihaowa. 9Ana kārotli zangluishitta Jishuli hānga, “Na kachiwui eina kharākhala?”

Kha Jishuna mangahānkāthuwa. 10Chieina Pilatena hānga, “Na ili mangahānmarala? Nali chihomikashap kala krushli shaoshānkashap pangshap iwuili lei kaji na matheimala?” 11#Rom 13.1; Joh 18.28. Jishuna ali ngahānkai, “Varena nali khami chiwui vangmāng nana iwuitungli pangshap khaleimaya. Chieina ili nawui pāngli horsangkhame mibing chiwui morei hakmei.”

12 # Lk 23.2. Pilatena tui chi shālaga Jishuli chihomi khavai khangarān sai. Kha Jihudibingna “Nana ali chihomihaiakha, na Caesarwui ngasotnao maningmana, awunga sākhavai khangarān kasā mi chi Caesarli yangkashina” da vaowa. 13Pilatena chi shālaga Jishuli khuishoka kala Hebrew tuili Gabbatha kaho Lungham bichar pamkhong chili shokpama. 14#Mk 15.42; Joh 19.31,42; Mk 15.25,33. Chithang chi Makānkhami phanitwui vang khangarān kasā zimikshona kala pung katharuka atamna. Pilatena Jihudibingli hānga, “Yanglu, nathumwui awunga!” 15Athumna vaoda hānga, “Ali khuithuihaolu, ali khuithuihaolu, krushtungli shaoshānhaolu!” Pilatena hānga, “Nathumwui Awungali krushli shaoshān ngasakngaila?” Pāngmon akhokabingna ngahānkai, “Ithumwui awunga Caesar maningla khangatei maleimana.” 16Chieina Pilatena Jishuli krushli shaoshān khavai athumwui pāngli horsangmihaowa.

Jishuli Krushli Shaokashān

(Mat 27.32-44; Mk 15.21-32; Lk 23.26-43)

Chieina athumna Jishuli khuithuihaowa, 17#Mat 27.33-44; Mk 15.22-32; Lk 23.33-43. kala awui krush phungda Mikuira̱ kaho apam chili vai, chi Hebrew tuili Golgotha hoi. 18Apam chili athumna Jishuli krushli shaoshāna, kala khangatei mi khanilila lākharip, Jishuna alungli zangda krushli shaoshānruma. 19Pilatena tuipeng akha kapikhuilaga krushli shāphai; tui chi hithai: “Nazarethwui Jishu, Jihudiwui Awunga” 20Jihudi kachungkhana chi kapā samphanga, kaja Jishuli shaokashān apam chi keinungwui eina matānāmana. Kapi kahai chi Hebrew, Latin kala Greek tui eina kapihai. 21Jihudiwui pāngmon khareibingna Pilateli hānga, “‘Jihudiwui Awunga’ da makapimialu, kha mipa hina ‘I Jihudiwui Awungana da hānga’ da kapilu.” 22Pilatena ngahānkai, “Ina kapi kahai chi kapi kahaina.”

23Shipaibingna Jishuli krushli shaoshān kahaiwui thili awui kashankachon khuida akhum mati sālaga shipai ava̱va̱na akhum ava̱va̱ khui. Phahon katuma chila khui. Kha awui phahon katuma che amalak mavaila ato eina thuida aze tāshungda rakrumhaisai. 24#Sho 28.32; Laa 22.18. Chieina athum akha eina akha ngazek ngarokta “He maserkhākhaisa, khipāwui ngasānikhala, ka̱lā yanghaosa” da mayāngaroka.

Hi kathara tuili hāngkahai,

“Athumna iwui kashankachon ngayara;

kala iwui phahon katumawui vang ka̱lā yangra” kaji chi ungshung khavaina.

25 # Mat 27.55-56; Mk 15.40-41; Lk 23.49; Joh 2.3; Mk 3.31; Lk 24.18; Joh 20.1; 18. Shipaibingna chithada sai. Kha krush ngalemli Jishuwui ava̱, ava̱gatui Cleopaswui preiva̱ Mary, kala Mary Magdalene athum nganingsai. 26#Joh 13.23; 20.2; 21.20. Jishuna ava̱ eina leikashiya sākhangatha̱ akha chi nganingkasā theida ava̱va̱li hānga, “Sha̱nao, yanglu, nanao mayarali!” 27Chiwui thili sākhangatha̱pa chili hānga, “Chi nava̱na.” Chithang eina thuida sākhangatha̱pa china ava̱va̱ chi ashi shimli thanunghaowa.

Jishuwui Kathi

(Mat 27.45-56; Mk 15.33-41; Lk 23.44-49)

28 # Laa 69.21; Mat 27.45-50; Mk 15.33-37; Lk 23.44-46; Joh 17.4. Chiwui thili Jishuna ot kuphaira kaji theida, Kathara lairikwui tui chi ungshung khavai, “I ra̱changhaira” da hānga. 29Chili drakhāthei kathur tengkotkha haisai; chieina athumna chonshi akha thing akhali khalapshānhailaga atheira̱ chumkhuilaga Jishuwui khamorli sangmi. 30Jishuna atheira̱ chi manglaga “Ngachanghaira” da hānglaga kui mashunzangda thihaowa.

Jishuwui Arāpli Kharung

31 # Khal 21.23; Sho 12.16. Chithang chi Khangaran kasā zimiksho sāhaoda, sabbaththang (kaja sabbath hi haklāk kahai zimikshona) kathi angun chi krushli kāngyuilaga mahaingaithuda athumna aphei sāteklaga krushwui eina khuithuihai khavai Jihudibingna Pilateli poi. 32Chieina shipaibingna nganaimeikap kaje chiwui aphei sātekhaowa, kala chiwui thili Jishuwui lākhavāk khaleipāwuila sāteka. 33Kha Jishuli vākhayang eina a thihaira̱kasā chi theihaida masātekmana. 34#1 Joh 5.6-8. Kha shipai akhana Jishuwui arapli kazei eina runga, kala chichangli ashee eina tara̱ manātta longshoka. 35#Joh 15.27; 21.24. Hi mik eina katheia mipa china shākhi khamina— awui shākhi chi mashunga kala a khamashung tui matui kaji ana thei—chieina nathumnala shitsangpaira. 36#Sho 12.46; Mis 9.12; Laa 34.20. Kathara lairikli “Awui ara̱kui akhala matek ngasakmara” da hāngkahai chi ungshung ngasaka. 37#Zec 12.10. Kathara tui khangatei akhalila hithada hānga, “Athumna rungthat kahaia chili athumna yangkāra.”

Jishuli Kachifa

(Mat 27.57-61; Mk 15.42-47; Lk 23.50-56)

38 # Mat 27.57-61; Mk 15.42-47; Lk 23.50-56. Hiwui thili Arimatheawui Joseph, Jihudibingli ngacheehaida ngathumda Jishuwui sākhangatha̱ sākasapā china Jishuwui aphasā makhuipairakhala da Pilateli apoi. Pilatena awui phasā khuipaira da mayāmihaoda Josephna vālaga aphasā chi akhui. 39#Joh 3.1; 7.50. Jishuli thangngayākha rasamkaphanga Nicodemusla myrrh eina aloes khamanāta nganamkaphā thao pound shākha sha̱kha khuiphungda Josephli ngasovai. 40#Mk 16.1; 14.8. Anina Jishuwui phasā chi khuitālaga Jihudiwui kachizan khangachā athishurda khamanaka kachon eina romkhui kala nganamkaphā thao neomi. 41Jishuli shaokathat apam chili yāmgui akha leisai, kala chiwui alungli khipālikha machizanlakrang kasā kashophutkakhui chikhur kadhar akha leisai. 42Akhama kathā Jihudiwui Sabbath zimiksho sāhaogada kala chiwui ngalemli chikhurla leisāda Jishuli chili chizanhaowa.

Currently Selected:

JOHN 19: TANGBSI

Highlight

Copy