JOHN 14

Avāva̱li Vākhavai Shongfa Jishuna

1Jishuna hānga, “Wuk makhanangalu; Vareli shitsangmalu, kala ilila shitsanglu. 2#Joh 13.33. Iwui Avāwui shimli pamkhavai kā kachungkha lei; chi maningsi kaja ina nathumwui vang pam angaranura da hāngrala? 3Kala nathumwui vang pam angarānhailaga nathumli rāhokhuiluira, chieina I khaleipamli nathumla leira. 4Kala ina vāki kaji shongfa nathum thei.” 5#Joh 11.16. Thomasna hānga, “Proho nana vāki kaji shongfa ithum matheimana, chili vākhavai shongfa chi kathada ithumna theirakhala?” 6#Joh 10.9; 1.4; 14. Jishuna ngahānkai, “I shongfana, khamashungana, kala kharingana; iwui eina maningla Avāva̱wuili khipākha marāpaimana. 7Nathumna ili theisāsi kaje iwui Avālila theihairara, arui hiwui eina thuida nathumna awui apongli theihaira, mik einala theihaira.”

8Philipna hānga, “Proho, Avā chi ithumli chitheimilu, ithum ningyangunglakhaora.” 9#Joh 12.45. Jishuna ngahānkai, “Hirankha nathumli ngasopamhaira, laga ili matheirangla, Philip? Kachikathāna ili theihaiakha Avāli theikahaina. Chithākha khisāda Avāli chitheilu da hāngkhala? 10I Avāwuili lei kala Avā iwuili lei kaji hi mashitsangmala? Ina khamatui hi iwui eina kashok maningmana, kha ili khalei Avāna kasā otsakna. 11#Joh 10.38. I Avāwuili lei kala Avā iwuili lei kaji hi shitsanglu. Chi maningkha ina sākahai otbing chiwui vang shitsanglu. 12Kachangkhat ina nathumli kahāngna, kachikathāna ili shitsangakha ina kasā ot chi ala sāshapra, hakkhamei ot eina tangda sāra, kaja I Avāwuili vāhaora. 13#Mat 7.7; Joh 15.7,16; 16.23; Jam 1.5. Kala nathumna iwui ming eina kapopo chi ina sāmira, chieina Avāva̱wui tekhamatei chi Anaomayarawui mangā eina theikhuipaira. 14Nathumna iwui ming eina kapopo chi ina mira.

Manglā Kathara Ngashitkhami

15 # Joh 15.10; 1 Joh 5.3; 2 Joh 6. “Nathumna ili leishiakha iwui ningkhami mayonra. 16#Joh 14.26; 15.26; 16.7; 1 Joh 2.1. Ina Avāli pora kala ana nathumli katang mavaila ngasopamki kaje Machinme akha mira, khamashungwui Manglā china nathumli ngasopamchingra. 17Chi apuk-apagva̱na masamphangkhararra khamashungwui Manglāna. Kachiwui vangkhala kaja apuk-apagva̱̱na ali mik einala matheimana, ning einala theikakhuila maleimana. Nathumna ali thei, kaja ana nathumli ngasopamda lei kala nathumwui lungli leira.

18“Ina zatkahai tharan ina nathumli ngachakyāng eina mahorhaimara; I rāluira. 19#Joh 7.33. Hunkhawui thili apuk-apagva̱̱na ili matheiluimara, kha nathumna theira; kala ina kharingwui vang nathumla ringra. 20Chithang I Avāwuili lei, nathum iwuili lei kala I nathumwuili lei kaji nathumna theira. 21“Kachikathāna iwui ningkhami khuisangda mayonakha a ili leikashena. Ili leikashe chili iwui Avānala leishira; inala ali leishida I khalatta ali phongmira.” 22#Ots 1.13; 10.40-41. Judas (Iscariot makhaninga)na ali hānga, “Proho, na khalatta apuk-apagva̱li maphongmila ithumli phongmira kaji hi kathada sāpairakhala?” 23#1 Joh 2.24; Phon 21.3. Jishuna ngahānkai, “Ili leikashe mi china iwui tui khuisangra kala iwui Avāna ali leishira, kala iwui Avā inina awuili rāda ali ringrumra. 24Kachikathāna ili maleishiakha iwui tui makhuisangmara. Kala nathumna shākahai tamkachithei chi iwui eina kharā maningmana, kha ili kashirāta Avāwui eina kharāna.

25“Hibing hi ina nathumli ngasopamlakha hānghaira. 26Iwui ming eina Avāna shirātki kaje Manglā Kathara, Machinme china ot saikora nathumli tamchitheira, kala ina hāngkahai saikora phaningung ngasakra. 27#Joh 16.33; Phil 4.7; Col 3.15; Joh 20.19. “Ina nathumli chingri kahai haikhamina; I khalattawui chingri kahai nathumli khamina. Okathuina khami thada nathumli khami maningmana. Wukmakhananglakalu; khangacheela mangacheealu. 28‘Ina thuihailala rāluishitra’ da ina kahāng chi nathumna shāhaira. Nathumna ili leishiakha, ina Avāwuili vaura kaji hili ringphāngayilaka, kachiwui vangkhala kaja ana ili reikhameina. 29#Joh 13.19. Hi mashokranglakha nathumli ina kahāngna, chieina chi kashok tharan nathumna shitsangra. 30#Joh 12.31. Ina nathumli kasāngkha mangazekrarluimara, kachiwui vangkhala kaja okathui hiwui khamunga rārāda lei. Ana iwuitungli khikha masārarmara, 31#Mk 14.42; Joh 18.1. kha iwui Avāna kakaso athishurda kasāna, chieina ina iwui Avāli leishiya kaji okathuina theira. “Ngakarthuilu, ithum zatusa.

Currently Selected:

JOHN 14: TANGBSI

Highlight

Copy