JOHN 13

Sākhangatha̱bingwui Phei Pheokhami

1 # Joh 11.55; 12.23; 16.28. Makānkhami phanit sākida thangkha vātlakha, Jishuna apuk-apagva̱li pākhailaga Avāva̱wuili vāki kaji atam rāhaira kaji kathei tharan, apuk-apagva̱li khalei mibingli leishihaoda, khanao eina tangdala ana leishi.

2 # Joh 6.71; Mk 14.10. Kala ngazin phazātwui atamli, Jishuli yorza khavai Simon Iscariotwui naomayara Judaswui wuklungli chipee zangkahai tharan, 3Jishuna, Avāva̱na ot saikora awui pāngli horsangmihaira, kala a Varewui eina kharāna kala Varewuili vāluihaora kaji theida, 4ana phazātwui eina ngakarthuida, awui kachon raitāhailaga towel akha kashānli neikhui. 5#Lk 7.44; 22.27. Kala khongsaili tara̱ heisangda sākhangatha̱bingwui phei pheophokuwa kala awui kashānli neikahai towel chieina mitmi. 6Jishuna Simon Peterwuili kharā eina Simonna hānga, “Proho, nana iwui phei pheomirala?” 7Jishuna ngahānkai, “Ina khi sākhala kaji na arui bhap matāmara kha naoda bhap tānaora.” 8#Khal 12.12; Joh 3.5; 9.7. Peterna hānga, “Nana iphei mapheopailakmara.” Jishuna ngahānkai, “Ina naphei mapheomiakha na ili khangarum maleimana.” 9Simon Peterna ngahānkai, “Chithākha Proho, ipheimāng maningla ipāng eina ikuila pheomilu!” 10Jishuna ngahānkai, “Ra̱vai kahai mina aphei maningla khangatei pheokhavai maleimana, a tharsera, kala na tharda lei, kha nathum kachiva tharser majimana.” 11#Joh 13.2. Kaja Jishuna ali khipāna hatrakhala kaji theida “Nathum katonga tharser majimana” da kahāngna. 12Jishuna athumwui phei pheomihailaga awui kachon ngavaikhuida pamluishita, kala “Ina arui nathumli sākhami hiwui kakhalat theila?” da ngahāna. 13“Nathumna ili Ojā kala Proho da hoi, chi mashunga, kaja I chilaka. 14Nathumwui Proho kala ojana phei pheokhami chithada nathumla akha eina akha pheomi ngarokphalungra. 15#1 Pet 2.21. Nathumnala chithada sākhavai tamkachitheina. 16#Mat 10.24; Lk 6.40. Kachangkhat eina ina nathumli kahāngna, raona akhavāli mahakmeimana, paophungmena kashivātali mahakmeimana. 17#Lk 11.28; Jam 1.25. Ara khamashung hi nathum theihaira; nathumna hiwui athishurda saakha kayākha ringkaphā ngasārakhala! 18#Laa 41.9. “Ina nathum saikorawui pongli kahāng maningmana, ina kapangkhui kahaibing chili ina thei; kathara tuili hāngkahai, ‘Ili phazākhangaruma a china ili mamayāmana’ kaji hi ungshung khavaina. 19#Joh 14.29; 8.28. Hi mashokranglakha nathumli ina kahāngna, chieina kashok tharan nathumna A chi ina da shitsangra. 20#Mat 10.40; Lk 10.16. Kachangkhat ina nathumli kahāngna, kala ili khamayā chi ili kashirāta chili khamayāna.”

Jishuna Ali Hatki kaji Hāngkhamarān

(Mat 26.20-25; Mk 14.17-21; Lk 23.21-23)

21 # Mat 26.21-25; Mk 14.18-21; Lk 22.21-23. Tui hi hānghailaga, Jishuna ningli saza̱lak eina hāngphata, “Kachangkhat eina ina nathumli kahāngna, nathumwui ngachaili akhana ili yorzāra.” 22Chieina sākhangatha̱bing akha eina akha ningmaongtong eina khipākhala da yangkāngaroka. 23#Joh 19.26; 20.2; 21.7; 20. Jishuna leikashia sākhangatha̱ akha awui ngalemli pamsai. 24Simon Peterna ali “Khipākhala” da ngahān ngasaka. 25Chieina ana Jishuwuivāk shaivāda hānga, “Proho, chi khipākhala?” 26#Joh 6.71. Jishuna ngahānkai, “Ina khamui tengkotli rurkhuilaga miki kajipa china;” chieina ana khamuitang akha rurkhuilaga Simon Iscariotwui naomayara Judasli mihaowa. 27Judasna khamui chi khuikhaleoda awuili satan zanghaowa. Jishuna ali hānga, “Nana sāki kaji chi thākta saulu.” 28Table kuimareida kapama mi khipānakha Jishuna ali kahāng chi bhap matārarmana. 29#Joh 12.6. Judasna lupākhao singhaoda zātkhānwui vang ali kahāng-eili, kachāmabingli kateokha mikhavai kahāng-eili da sākhangatha̱bingna phaninga. 30#Lk 22.53. Judasna khamui chi khuilaga hengsāda shokhaowa. Chi ngayāhairasai.

Ningkhami Kadhara

31 # Joh 17.1. Judas thuikahaiwui thili Jishuna hānga, “Ara miwui Naomayarawui tekhamatei phonghaira, kala awui eina Varewui tekhamatei phonghaira. 32Varewui tekhamatei chi awui eina phongmiakha; Varena a khalattawui alungli miwui Naomayaralila makahatlakla tekkmatei ngasakra. 33#1 Joh 2.1; Joh 7.33. Inao ngarā, ina nathumli kasāngkha mangasopamluimara. Khaleilaga nathumna ili phāra, kha ina Jihudiwui akhavābingli kahāng chi nathumlila kahāngna kaja ina vāki kaji chile nathum marārarmara. 34#Joh 15.12,17; 1 Joh 3.23; 2 Joh 5; Pāng 19.18; 1 Thes 4.9; 1 Pet 1.22; Heb 13.1; Eph 5.2; 1 Joh 4.10. Chieina ina nathumli ningkhami kadhar khamina kaja nathum akha eina akha leishi ngaroklu, ina nathumli leikashi thada nathum akha eina akha leishi ngarokphalungra. 35Nathum akhana akhali leikashi leiakha nathum iwui sākhangatha̱bingna kaji saikorana theira.”

Peterwui Makhamayā Jishuna Hāngkhamarān

(Mat 26.31-35; Mk 14.27-31; Lk 22.31-34)

36 # Joh 21.18; 2 Pet 1.14. Simon Peterna “Proho, na kali vaurakhala?” da ngahāna. Jishuna ngahānkai, “Ina vāki kaji chili ara nathum mashurrārarluimara. Kha naoda shurrānaora.” 37#Mat 26.33-35; Mk 14.29-31; Lk 22.33-34. Peterna ngahāna, “Proho, khisāda I mashurthukmarakhala? I nawui vang thishapra.” 38Jishuna ngahānkai, “Na kachangkhat iwui vang thishapralā? Kachangkhat eina ina nali kahāngna, harvā makhongranglakha nana ili matheimana da kathum shida hatra.”

Currently Selected:

JOHN 13: TANGBSI

Highlight

Copy