OTSAK 8

Saulna Churchli Rekakharek

1 # Ots 11.19. Kala ali sākathat chi Saulnala mayai. Chithang Jerusalemli khalei churchli sākashi kachotkachāngwui rekakharek haophokhaowa. Chiwui vang paokazatbing maningla khangatei saikora Judea eina Samariawui apam saikorali ngapha̱yāng yāmvāhaowa. 2Shitkasanga mi kaikhana chapngachāda Stephenli chizana. 3Kha Saulna church hi shimān khavai sāda shim shimli zanglaga shitkasanga mayarnaolila, sha̱naolila shimenshokta phātopli vāsanga.

Samariali Paokaphā Hākashok

4Chitharan ngapha̱ kahaibing china apam kachida paokaphā tamchithei. 5Philipna Samariawui keinung akhali vāda mibingli Khristawui pao hāshoka. 6Philipwui tui kala ana kasā matakhak kahai machut chi theilaga mibing saikorana ana kahāng chili ningsanglak eina nganai. 7Mi kachungkhawui eina makathar manglāna panglāk eina vaolaga shoka kala sheikasha̱ kala pheikatekbinglila raimi. 8Chiwui vang eina keinung chili chithang khamathān tarākha samphanga.

9Keinung chili meowor kathema Samarianaobingli matakhakhai khangasaka, khalatta akhana da langkasoa, Simon kaho mayarnao akha leisai, 10kala kateo kharei mi saikorana, “Mipa hi Varewui Pangshap, Kahaka kaho china” da shitsanga. 11Athumna ali saklāk eina khuisai kaja awui meowor eina mibingli matakhakhai khangasak atam kasāngkhahairasai. 12Kha Philipna Vare wungram eina Jishu Khristawui mingwui paokaphā tamkachithei chi athumna shitsanghaoda mayarnaolila, sha̱naolila ra̱hikmi. 13Simonnala shitsanghaoda alila ra̱hikmi. Kala ra̱hikmi kahaiwui thili Philipli ngasozatchinga kala matakhak kahai kala machut tarākha kasā chi theilaga matakhakhai.

14Jerusalemli leikasā paokazatbing china, Samariawui mibingna Varewui tui khuisanghaira kaji kashā eina, athumna Peter eina Johnli athumwuili chihovai. 15Athumnala Manglā Kathara samphangpai khavai anina vākashung eina athumwui vang seihā sāmi. 16Kaja Proho Jishuwui ming singda ra̱hikkhami maningla athum khipākhawuitungli Manglā Kathara matāzangrangsai. 17Chiwui thili athumwuitungli anina pāng khāngkāmida Manglā Kathara samphanghaowa. 18Paokazatbingna pāng parkharor eina Manglā Kathara samphanga kaji hi Simonna kathei tharan lupā mida 19hānga, “Kachikathā mili ina pāng parrorlaga Manglā Kathara samphangpai khavai ilila pangshap milu.” 20Kha Peterna hānga, “Nawui pheisā chi nali shimānrumra kaja Varewui lemmet hi lupā eina lokhuipai da nana phaninga! 21#Laa 78.37. Hiwui ot hili nawui yar mazangmana; kaja Varewui miktāli kaphaning mamashungmana. 22Chiwui vang eina nawui makaphā hiwui vang ningngateilu, kala sāpaiakha nawui ningrin chi pheomi khavai Vareli seihā sālu. 23#Isa 58.6. Kaja na mikpaikashi pemting kahai kala moreiwui phātopli leiyada ina thei.” 24Simonna hānga, “Zingarāda iwui vang seihā sāmilu, chithākha nanina hāngkahaibing chiwui eina akhala iwuitungli matārormara.”

25Athumna Prohowui tui shākhi sāda Varewui tui tamchithei kahaiwui thili, Peter eina Johnna Jerusalemli latunghaowa. Awunlam Samariawui kha̱ung kachungkhali paokaphā hāshoka.

Philip eina Ethiopiawui Akhavā

26Prohowui kazingrao akhana Philipli hānga, “Ngakarthuida Jerusalemwui eina Gazali tākhavai azingshongwui shongfa chili tāulu.” Hi siwuk shongfana. 27Chieina Philipna ngakarthuida zatuwa. Ana zatta leilakha Ethiopiawui awungva̱ Candacewui lan saikora singkhame kahaka akhava, Ethiopiawui ahonga akha Jerusalemli vākhorumlaga shimshong hanungukida, 28sigui-gari tonglaga Isaiah marān lairik chi pāzatsai. 29Kala Manglā Katharana Philipli hānga “Garipamshong nganaimeida vālu.” 30Philipna ngasamvai, kala ana Isaiah marānwui lairik pākasa tui chi shāda ngahāna, “Nana pāda khalei chi khikhala da bhap tāla?” 31Chieina ana ngahānkai, “Kachikathā mi akhana mahāngchitheiakha ina kathada bhap tarakhala?” Ana Philipli garili kāpamlu da hokhui. 32#Isa 53.7-8. Ana pāda leikasā kathara tuipam chi hina:

“Taithat khavaipamli khuivā khavai khuikaphunga yaonao,

ahā kachichāpawui mangāli yaonaona

akhon makashok thada,

anala khamor mamakāmana,

33Ali maikashi mida mashun hatmihaowa.

Awui okthot khipāna hāngmishapra?

Khikhalajila okathui hili awui mirin ngachanghaira.”

34Chieina ahonga china Philipli hānga, “Marānna kahāng hi khipālikhala? Ili kahāngmilu, a khalattali kahāngkā khangatei akhali kahāngkhala?” 35Chiwui thili Philipna kathara tuipam hi eina haophoklaga Jishuwui khamathā chānpao hāngchithei. 36Anina zatmamānda leilakha tara̱ khaleipam akhali vāshunga. Chieina akhavā china hānga, “Yanglu, hili tara̱ leili, ili ra̱hikmikida khi pankhavai leikhala?” 37Philipna ali hānga, “Nana ningtongda shitsangakha ra̱hikmipaira.” Chieina ana ngahānkai, “Ina Khrista hi Varewui naona da shitsanga.” 38Kala ana siguigari chi ngasām ngasaka, kala ani khanini tara̱lungli zangda Philipna ahonga chili ra̱hikmi. 39Anina tara̱wui eina kashok tharan kashuirak eina Prohowui Manglāna Philipli khuithuihaowa, kala ahonga china Philipli matheiluithuwa, kha awui vāki kajipamli ringphālak eina thuihaowa. 40Philip Azotusli leisai. Ana Caesareali vākhavai zatmamānlakha shongfali khalei keinung saikorali paokhamathā hāshokzata.

Currently Selected:

OTSAK 8: TANGBSI

Highlight

Copy