OTSAK 9

Saulwui Ningkhangatei

1 # Ots 22.4-16; 26.9-18. Hithada leilakha Saulna Prohowui thikashurabingli zakshilāk eina machitta sāthat khavaila sāda pāngmon khareiwuili vai 2kala Damascuswui synagoguebingli mikhavai, kaja apam chili Apong hili kashura sha̱naola mayarnaola saikorali atukkhuida Jerusalemli khuiung khavaiwui chithi kapimilu da apoi. 3Saulna zatmamānda Damascusli vāshungnanai kashuirak eina kuimareida kahor akha kazingramwui eina ali kaprorra. 4Chieina ana ngaleili saosanghaowa, kala ali kaho akhon akha shai, “Saul, Saul, khiwui vang eina nana ili rekharekhaokhala?” 5“Proho! na khipākhala?” da ana ngahāna. Akhon china hānga, “Nana rekharekta khalei Jishu chi ina. 6Kha ngakarthuida keinungli zanglu, chili nana sāki kaji hāngminaora.” 7Ali ngasokazatbing chi khituikha mamatuila nganingshinghaowa; athumna akhonva shai kha khizakkha matheimana. 8Saulna ngakarthuida mik kharak tharan khikha akhala matheirarthuwa; chieina athumna apāngli singlaga Damascusli thara̱vai. 9Ana zimiksho kathumthang mik matheila pama kala khikha mashai-mashakmana.

10Chitharan Ananias kaho sākhangatha̱ akha Damascusli leisai. Prohona ali mahāmida hānga, “Ananias!” Chieina, “I hili leili, Proho,” da ngahānkai. 11Prohona ali hānga, “Khangatar Shongfa kaho chili vālu, kala Judaswui shimli Saul kaho Tarsuswui mi akha angathingkhuilu. A seihā sāda leili, 12kala Ananias kaho mayarnao akhana awui mik theiluishit khavai awuitungli pāng parrorkida rārāli kaji ali mahāmihaira.” 13Kha Ananiasna ngahānkai, “Proho, ana Jerusalemli khalei nawui mibingli kayākha ngasakshida sākhala kaji ili mi kachungkhana hānghaira. 14Kala Damascusli nali khokharumbingli tukkhui khavai khamataia pāngmon khareibingwui pangshap khuida rākahaina.” 15Prohona ali hānga, “Zatlu, ina ali miyur khangateibing, awungabing kala Isrealnaobingli iwui ming theingasak khavai kapangkhui kahai khutlaina. 16Ana iwui mingwui vang kayākha chotchangra̱khala kaji ina ali chitheira.” 17Chieina Ananiasna vāda shim chili azanga kala Saulwuitungli pāng parrorda “Ivānao Saul,” da hānga, “nana kathei samphangluishit khavai kala Manglā Katharana pemtinghai khavai, na apam hili rākhavai zatta leilakha shongfali rākachitheia Proho Jishu china ili shirāt kharāna.” 18Chili ngalāngda khaihor thada amik eina ngajarta kahai eina kathei samphangluishithaowa. Laga ana ngakarthuida ra̱hikhaowa. 19Chiwui thili kashakazā khuida pangshap samphangluishita.

Saulna Damascusli Pao Tamkachithei

Ana sākhangatha̱bingli ngasoda Damascusli zimiksho sha̱rākhathang pama. 20Ana ngalāngda synagogueli vāda “Jishu hi Varivarawui Naomayarana” da tamchithei. 21Awui tui kashā saikorana ngahāna, “Mipa hi Jerusalemli Jishuli khokharumabingli shaokathatapā chi maningmala? Kala ana athumli tukkhuilaga pāngmon khareibingwui mangāli khuivā khavai apam hili kharā maningmala?” da matakhakhaowa. 22Kha Saulna tamkachitheiwui pangshap mataisangmamānda Jishu hi Khristalaka da theishingkhui khangasak eina Damascusli kapama Jihudibing chili pa̱ngapā ngasakhaowa.

23Khaleilaga Jihudibingna Saulli shaothat khavai ngakukphoka, 24#2 Cor 11.32-33. kha khangarān chi Saulna theihaowa. Ngashun ngayā athumna ali shaothat khavai ngaveili rimpama. 25Kha thangngayākha awui kashurabingna ali sopkai akhali sanglaga phākhowui eina chihotāhaowa.

Saul Jerusalemli Katā

26Saulna Jerusalemli unglaga sākhangatha̱bingli ngarum khavai khangarān sai. Kha athum saikorana ali ngacheehaowa, kaja ala sākhangatha̱ akha sāhaira kaji mashitsangthuwa. 27Chiwui vang ali Barnabasna paokazatbingwuili thānvai, laga ana awui khāram khavāli kathada Proholi thei kala Prohona ali kathada ngazekkhala kaji athumli hāngchithei. Chili lāngda Saulna kathada Damascusli Jishuwui ming singda pinglak eina pao hāshokkhala kajila athumli hāngchithei. 28Chieina Saulna athumli ngasopamda, Prohowui ming singda Jerusalemli zatung zatvāda pinglak eina matuida, 29Greek khamatuia Jihudinaobinglila hāngchithei kala khangaphatla ngaphata, kha athumna ali sāthat khavai sai. 30Ali sāthat khavai kasā chi shitkasangbingna kathei eina Saulli Caesareali khuitālaga Tarsusli chihounghaowa.

31Chitharan Judeali, Galileeli kala Samariali khalei church saikora chingri eina okathui samphanga, Proholi khangachee eina okthuida, Manglā Katharana athumli ringphā ngasakta mishānla chungsangkhangai chungsanga.

Peterna Lydda eina Joppali Khavā

32Peterna apam saikorali zatung zatvālaga, thangkha Lyddali khalei shitkasangabingli samphang khavai vai. 33Apam chili phasā ngakaida thikahai kum chishat petwui eina mangakarthuikharara Aeneas kaho mayarnao akhali samphanga. 34“Aeneas,” Peterna ali hānga, “Jishu Khristana nali phāngasakhaira. Ngakarthuida nawui pet masankhuilu.” Chieina ana ngalāngda ngakarthui. 35Lydda eina Sharonli okthuida khalei mibing saikorana ali theilaga athumna Proholi mai ngareiunga.

36Joppali Tabitha, chiwui kakhalata Dorcas kaho sākhangatha̱va sha̱nao akha okthuisai. Ana kaphā ot kala ngachonkhami ot kachungkha sai. 37Atam chitharan a kazāhaoda thihaowa. Chieina athumna awui phasā chi ra̱vaimihailaga atung kā akhali chipethai. 38Joppa hi Lyddawui eina chiyākha matāmana, kala sākhangatha̱bingna Peter apam chili leili kaji kashā eina mi khanili, “Thāklak eina kharāmilu” da ahongasaka. 39Chieina Peterna athumli ngasovai kala ana vākashung eina athumna khamato kāli khuikai. Ra̱meinao saikorana Dorcasna athumli ngasopamlakha sākhami kashankachonbing chi ali chitheilaga awui ngalemli rāchapa. 40Peterna athum saikorali kayāng shokngasakhailaga khuktida seihā sai; chiwui thili ana kathi angunshong ngareiungda hānga, “Tabitha, ngakarthuilu!” Ana mik kharak eina Peterli theida thuipama. 41Peterna awui pāng singkhuida khāngmathota, chiwui thili shitkasangabing kala rāmeinaobing saikorali hokhuida ringngasak kahaiva̱ chi athumli mihaowa. 42Kashok ot hi Joppa peichaoda kashā eina mi kachungkhana Proholi shitsanga. 43Peterna Joppali sāhui khamathena Simonwui shimli zimiksho sha̱rākhathang pamsanga.

Currently Selected:

OTSAK 9: TANGBSI

Highlight

Copy