OTSAK 6

Ngachonkhame Shini

1Chitharan sākhangthābingwui mishān mataisangmamān kaji eina Greek khamatui Jihudibingna athumwui ra̱meinaobingli thangthangwui kashakazā mathada mayangkhamiwui vang Aramaic khamatui Jihudibingli maringkaphā tui matuiphoka. 2Chieina paokazata tharāda khani china shitkasangbing saikorali hokhuilaga hānga, “Varewui tui hākashok chihohailaga kashakazāwui vang otram khangatha̱ mamashungmana. 3Chiwui vang eina ivānaobing, Manglā Katharana kapem kala theithangkhamei mi shini nathumwui eina kapangkhuilu, athumli ot hiwui yangkhame sāngasakra. 4Laga ithumva seihā kasā kala pao hākashok māngli ningyāng chigatra.” 5Athumwui tui hi shālaga saikorana ningyāng unglakhaowa, chieina athumna shitkasang kala Manglā Katharana pemting kahaia Stephen, Philip, Prochorus, Nicanor, Timon, Parmenas kala Antiochwui eina Jihudi onkahai Nicalaus athumli kapangkhui. 6Kapangkhui kahaibing chili yaruina paokazatbingwui mangāli khuikai, kala athumwuitungli pāng khāngkāda seihā sāmi.

7Chieina Varewui tui ngayaovāshumda Jerusalemli sākhangatha̱bingwui mishān mataikhangai mataisanghaowa, kala pāngmon kachungkhala shitsanghaowa.

Stephenli Tukkakhui

8Varewui lukhamashan kala pangshapna pemting kahai Stephenna mibingwui ngachaili matakhak kahai kala machut tarākha sai. 9Kha synagoguewui alungli ningkhān kasā mi kaikha, Cyrenewui mila, Alexandriawui mila, Cilicia eina Asiawui mibingla zangda Stephenli mamayāmada thuingayāta. 10Kha Stephenli Manglāna thangkhamei sangmida khamatui chitharan, athumna mangasungrarthuwa. 11Chieina athumna mi kaikhali ngathumda suikhuilaga, “Ana Moses eina Vareli khamashāt ithumna shāhaira” da hāngngasaka. 12Hithada sāda mibinglila, ararnaobinglila kala ain kathembinglila athumna ning ngatha̱ ngasaka. Chieina athumna ali atukkhuilaga hanga̱li khuikai. 13Kala athumna makhamashunga shākhi khuirāda hānga, “Mipa hina kathara apam hili kala Moseswui ainli makhamayā tui matuishonda lei. 14Kaja kathara shim hi Nazarethwui Jishuna sākhayānghaora kala Mosesna ithumli mikahai khangachāyan chila ngachei ngasakra da kahāng ithumna shāhaira.” 15Hanga̱shimli kapam saikorana Stephenli yangvāser kaji eina awui mai kazingraowui thada thei.

Currently Selected:

OTSAK 6: TANGBSI

Highlight

Copy