OTSAK 5

Ananias eina Sapphira

1Kha Ananias kaho mayarnao akha eina apreiva̱ Sapphirana lam kateo akha yora, 2kala apreiva̱wui khamayā zangda aman chi ngakaida haihailaga khumkhamāng paokazatbingwui pāngli rāsangmi. 3Chiwui thili Peterna hānga, “Ananias, kathada nana chipeewui tui khuilaga Manglā Katharali kapikta lam khayorwui aman ngayarda thumhaokhala? 4Lam chi mayorranglakha nawui maningmala? Yorkahaiwui thili chiwui aman chila nawui maningmala? Chithākha, khiwui vang eina nana chikathā ot sahaokhala? Hiya mikumoli kakapik maningla Vareli kakapikna!” 5Ananiasna tui hi kashā eina kongluisangda thihaowa, kala kashā saikorana ngacheelakhaowa. 6Chiwui thili yaronnaobingna ngakarthuida kachon eina romlaga ayarli achizanhaowa.

7Pung kathum sha̱kha shānglaga khi shokhairakhala kaji matheila apreiva̱ rārāsai. 8Peterna ali ngahāna “Nani preigaharna lam yorlaga samkaphang pheisā chi himalā?”

Ana ngahānkai, “Mha, himana.”

9Chieina Peterna ali hānga, “Khisāda nani khani mayāngarokta Prohowui Manglāli chāng yanghaokhala? Yanglu, nagaharali vākachizanbing khamongpheili ungshunghaira kala nalila athumna ngazonshokhaora.” 10Chili ngalāngda ala Peterwui pheizingli saosangda thihaowa. Yaronnaobing china shimlung kazang eina ala thihairasāda agaharawui ngalemli achizanhaowa. 11Church katongana kala hi kashā mi saikorana ngacheelakhaowa.

Matakkhak kahai Otbing

12Chitharan paokazatbingwui pāng eina mibingwui alungli matakhak kahaila kala machutkakhuila tarākha sai kala athum saikorana Solomonwui khāmreili kazipruma. 13Athum phāya da mibingna ngazeklala mi khipānakha athumwui alungli mavāzanglengmana. 14Chitha-ilala, mayarnaola, sha̱naola Proholi shitkasang mi ashang eina chungmeikharda ngarumsanghaowa. 15Chiwui vang eina Peterna khaung khavā atamli aka̱lāmāngla saza̱khui khavai, athumna shongfapheili petla khomphāla hamlaga kakazānaobingli khuirāda chipethai. 16Jerusalemwui kuikhamareili khalei keinungbingwui einala kakazābing kala makathar manglā kazangbing khuirāda raimisera.

Paokazatbingli Rekkakharek

17Kha pāngmon kharei eina ali khangaso Sadduceebingna athumli yuishihaowa. 18Chieina athumna paokazatbingli tukkhuida khangachā phātop shimli narhai. 19Kha ngayāshong Prohowui kazingrao akhana phātop shimwui khamongbing chi shomihailaga athumli khuishokta hānga, 20“Nathumna khorumshimli vanganingda mibingli kharingawui tui saikora hi ahāngchitheilu.” 21Athumna tui chi shāda kazing kathang eina khorumshimli atamchitheiphoka.

Chitharan pāngmon kharei eina ali khangasobing china hanga̱ kazipngarum khavai Jihudiwui ararbingli hokhui, kala paokazatbing chili akhui khavai phātop shimli mi chihovai, 22kha akhavābingna phātop shimli vākashung tharan paokazatbing chi maleisāthuda, athumna hanunglaga hithada unghānga, 23“Phātop shim lonkazaklaga haikasā ithumna thei, kala khamayonabing china khamong saikorali nganingsai, kha ithumna khamong chi kasho eina shimlungli khipākha maleisāmana.” 24Khorumshim kashinabing eina pāngmon akhokabingna tui saikora chi shālaga paokazatbing chi kathada shokhaokhala da matakhakhai. 25Khaleilaga mi akhana rāhānga, “Nathumna phātop shimli sanghaikasābing chi khorumshimli nganinglaga mibingli tamchitheida lei.” 26Chieina akhavā china kashinabingli ngasovālaga athumli akhuiluishita, kha mibingna lunggui eina horpaishina da khangacheewui vang zakshilāk eina masāmana.

27Athumna paokazatbing chili khuiungda hangva̱wui mangāli nganing ngasaka, kala pāngmon kharei china athumli hānga, 28“Nathumli mipa hiwui ming eina matamchitheilakalu da kaso kahaina, kha nathumna nathumwui tamkachithei hi Jerusalem peida ngayao ngasakhaira kala mayara hiwui ashee katā chi ithumwuitungli tāngasakida sai.” 29Kha Peter eina paokazatbingna ngahānkai, “Mibingwui tui nganāki kajipale Varewui tui nganātha̱ra. 30#Khal 21.22-23. Ishawo ngarāwui Vare china, nathumna thingtungli shaoshanda sāthat kahaia Jishu chili ringngasakhaira, 31Varena ali Isrealnaobingli ningngateida, morei pheomi khavai kathāna Huikhame akha sāngasakta awui yāshong chipama. 32Kala ithumna ot saikora hiwui shākhina. Chithada sāda awui kahāng khanganā athumli Varena khami Manglā Kathara chinala shākhina.” 33Hangva̱naobing china hi kashā eina malungkangnāhaida paokazatbing chili shaothatngai. 34Kha chān khangazek chiwui alungli, ain kachishuta kala saikorana khayākashi Gamaliel kaho Pharisee akhana nganingda mibing chili kasha̱khawui vang kayāngli khuishokhaisalu da kasoi. 35Ana athumli hānga, “Isrealnaobing, nathumna mibing hili khi sarakhala da phaningkazaklu. 36Khare kachāng Theudasna a khalatta mi akhana da phaninga kala mayar shāmati sha̱khana thi shura kha ali shaothat kahai eina athi kashurabing chila ngapha̱haoda khikha mashokthuwa. 37Awui thili mishān kakhui atamli Galileewui Judasna mi kaikhali athi shurkhavai khomkhui, kha ala shimānhaowa, kala athi kashurabingla ngapha̱haowa. 38Chieina ajawui tuishot hili ina nathumli kachangkhat eina kahāngna, mibing hili khikha masālaklu. Athum ningsasakranu. Athumna khangarān kala otsak hi mikumowui eina kashokna jiakha shimānhaora. 39Kha hi Varewui eina kharāna jiakha, nathumna athumli mashimān ngasakrarmara. Kala nathumna Vareli ngakaikashi ngasāsāpai!”

Athumna Gamalielna hāngkachithei chi khuisanga. 40Chieina paokazatbing chili hosanglaga athumli shaowa kala Jishuwui ming singda mamatui khavai kasolaga thuingasakhaowa. 41Jishu mingwui vang athumna kakhayak samkaphang chi khangayi otna da theikhamiwui vang mathānthup eina athumna hanga̱shim eina thuihaowa. 42Kala thangkachida athumna khorumshimlila, shimlila Jishu hi Khristana kaji hākashok, tamkachithei mathāhailakmana.

Currently Selected:

OTSAK 5: TANGBSI

Highlight

Copy