ZECHARIAH 7
7
Thlungshimnak Mantrang Solung
1Heirou Darius'yei Krungchaan kum phali tlung heirouri asitoubi thukkura, touri heikumyei tlun-tako tlung tangla touri Chislev#7.1: Chislev: Mayun. tanglayei phalini tlung tlainirou Umpuei tloulhangni Zechariah'nung kyong: 2Heirou Bethel'yei thimi rapne Sharezer'yei Regem-Melech'le kalhonne yaiyei thimi dei rapkou Dunpuei Pucheemra Umpuei tlouya lounanungei shuncharou heimalhetkur. 3Heitoubi Thangwan-Shimleiyei Pu Umpuei Pucheemra louklei Suipipu raple Thimkhui rapnungei tlou wangaithibine atoubi shun, “Youkur kum heinakei rilla keiyei touwurkhou heinaksine, tlun-phanga tlung tanglarou ramphani keine chapbine chara yilbine leithurouko?” 4Heirouri Thangwan-Shimleiyei Pu Umpuei tlou keinungei yongbi asitoubi shunpilei: 5“Ram heiyei thimirap nammanungle, Suipipu rapnungei asitoubi shunpilaka, ‘Nane tlun-phanga tlung tanglaserrou heirou tlun-eni tlung tanglaserrou kum-somret rekpa chara yilbine kanrelwurkhou heiwari Keinung'tlim chara yilbi kanrelkhouweiko?’ 6Heirou naiyei chamaiwurkhou heirou mongurkhou heiwari naitamtom'nungei cha'maiwurkhou, heirou mongurkhou nimako? 7Jerusalem'ra heirou heiyei karhillei klei khukarthil raprakhi heirou khate-lhangei phaikar raprakhi thimi rapne yuldabi tangbaang-choubaangkurei kheenrou, heichaanyei Thimkhui rapne Umpuei Pu'tlou rapya ungraochane shunthutkhouyei kalnung nani ninglhakmakur nimaka?”
8Heirouri Umpuei tloulhangne yongbi Zechariah'nung asitoubi shunpi: 9“Thangwan-Shimleiyei Pu Umpune atoubi shunlei, ‘Chimmei picharya tourilbine, thimi napung-kantangni ai'aiyei teinao rapbei doura kringpi kheile kalhonne khatle-khat malungshirilni lhou tourillaksu. 10Heitoubi trulmei rapya, nimanung saracha rapyakhi manthapimak toupimakne, miram-mithrillei thimi rapyakhi heirou kanring-kanwai chanao rapyakhi thuithini marhotdurpimak; heirou na hukhatnekhi neiyei teinao rapya karhane ukningra lhangaimakya ningchabine lhou tourilmaklo.’
11“Heiya yaneri ninglhakni'makne, mai khreithutdurbi, mayekmaknungei toubine yaiyei khnabilkhi tipburbine, napal toubi leiwurkhou. 12Moi! Yane yaiyei ukningrap heiri thlungshimnakne kalyerwurbi, Thangwan-Shimleiyei Pu Umpune Aiyei lhawaiyei ngamne bongei Thimkhui rapya shunthutyerkur Aiyei Chaylamle Aiyei tloulhang rapya ninglhakpimakur; heingammei Thangwan-Shimleiyei Pu Umpurei meithukkei malungkhaya yongdakur. 13Heineri asitoubi hungthukkur, Keine ungrou, heiya yane louningpimakrou, heineri yane ungrou, heirou Keinekhi loumyekpimakrou,” toubine Thangwan-Shimleiyei Pu Umpune shunlei. 14“Heiya yayari Keine lhimnung-martheetangle kalhonne shamatraikur heinaksine, yayari yani shak mumakna lim nammaei hangra hulcheklhakkur. Heisi toubine yaiyei lakkurkhou ram heiwari thlei taarwurbi, thimi hukhatnekhi kallenglhakbine yul damakna ram khoini leiyerkur. Ngamri, nungkngaiyei ram heiwari horwurkhou ram hoiyura.”
Currently Selected:
ZECHARIAH 7: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
