ZECHARIAH 8
8
Zion'ra Kying Heirou Tangbaang-Choubaangyerrou
1Hanuikhi: Thangwan-Shimleiyei Pu Umpuei tloulhangne keinungei yongbi asitoubi shun; 2Thangwan-Shimleiyei Pu Umpune atoubi shunlei: “Keine Zion'ya beimak horthitangne malungshikhou; heine Keine aya malungshinei ngamrou meithukni malungkhakur.” 3Umpune asitoubi shunlei: “Keine Zion'ra yenkallengbi, heitoubi Jerusalemei lailamra yongpaalheirou; heitoubi Jerusalem'ri malungamkna khukarthil heirou Thangwan-Shimleiyei Pu Umpuei khying lhungdoume toubine min thullouwa.” 4Thangwan-Shimleiyei Pu Umpune atoubi shunlei: “Jerusalemei khullamrari napawa tara, heirou napuiya tara rapne bil thimni ombine leiheirou; thimi napung-kantangni tarachaknei ngamrou ai'aiyei hutra shungkrok shinbine karwaichaheirou. 5Heitoubi khukarthil heiyei khullamrap heiri nangak-kartlang douwa rapne marekbi bil thimne leiheirou.” 6Thangwan-Shimleiyei Pu Umpune atoubi shunlei: “Kounakpi kheen heirou yanaksi himalei thimi rapnungei kngak khat hoileime toubi Keiyei mit'thrilnarakhi kngak khat hoirouko?” toubi Thangwan-Shimleiyei Pu Umpune yunlei. 7Thangwan-Shimleiyei Pu Umpune shunlei: “Thilak, Keine kulkng lhangrouweikhi, heirou kulrel lhangrouweikhi Keiyei thimi rapya kalpirouwa. 8Heitoubi Keine yaya yenruilhakpirou, heirou yani Jerusalemei rilla paalrouwa; heirouri yane Keiyei thimi hoirouwa; heitoubi Keine malungamknale chimnara yaiyei Dunpu hoirouwa.”
9Thangwan-Shimleiyei Pu Umpune shunlei: “Thangwan-Shimleiyei Pu Umpuei Pucheem cheemmun thulbangniyei waiyoubine Thimkhui rapbei murrouwei Pu'tlou rapya mayekthungkur thimirap na nammane Pucheemya sabaang manenanungei hut mantrangyerlaklo. 10Kouweiyo toulanungri, bongnungri thimi rapbei lhou churnei klah mankhi pirilkhoumak, heirou ui-waakhi shaalrilkhoumak; heirou khukarthil heirouwei thimirap hukhatnekhi malung damne wachang-wathukkhi tourilkhoumak; koungameiyo toulanungri, Keine thimi rapya ai'aiyei cheemlhun rapyakhi khatle-khat karhourilyerkhou. 11Heiya asinungri Keine himaleithungkur thimi rapya bongei touwurkhou heinakni thuithine toumakarou,” toubine Thangwan-Shimleiyei Pu Umpune shunthutlei. 12“Kouweiyo toulanungri, trunwai lung rapkhi lhangaine katpukthutrouwa; darkha yamkhi hei leraoni yenheirouwa; heirou thleikhi marngirbi trunwai duine heiyerrouwa; heirou nungthourei rdaikhi yukchurouwa; heitoubi Keine thimi raprei himaleithung rapya heirap nammaya phathungyerouwa. 13Heirouri asitoubine hungthukrouwa, touri chaan khatrou limdei rapbei hangra nani mancho phawurkhou thimirap khoini leikhounakni, O Judah'yei cheemmai, heirou Israellei cheemmai; heinakrimni Keine naya kalpirouwa, heitoubi nari phoryei thimirap hoirouwame. Nari chimaklo, heiya naiyei hut-hoya mantrangyerlaklo.”
14Kouweiyo toulanungri, Thangwan-Shimleiyei Pu Umpune asitoubi shunlei: “Naiyei nutar-patar rapne Keiya malungkhayerwurbi, naidoura tanti pinungei mardingurkhou heirouwei Keiyei ukning holwurkhoumak,” toubi Thangwan-Shimleiyei Pu Umpune shunthutlei. 15Heingammei angtuei chaanrou Keine Jerusalemnungei heirou Judah'yei cheemmai rapnungei lhangaiya toupirouwame toubine mardingurla; heineri nari chimaklo. 16#Eph 4.25. Nai tounungei lhou rapri asitoubi leilei: “Thimi napung-kantangni ai'aiyei cheemlhun thimi rapnung chim tlouya yunlak; heitoubi neiyei shumtrumra chimmei picharya tourilbi, kyingni heirou karbilni paalyerlak. 17Heitoubi na hukhatnekhi ukningra lhangaimakya ningchabine neiyei teinaoya karhane lhou toumak; heirou sowallei tlou kantomrilya madumak; kouweiyo toulanungri, heinaksi lhourap namma heiri Keine machinkna,” toubi Umpune shunlei.
18Heirouri Thangwan-Shimleiyei Pu Umpuei tloulhangni keinungei yongbi atoubi shunpilei: 19“Thangwan-Shimleiyei Pu Umpune asitoubi shunlei; Tlunphali tlung tanglayei chara kyil, heirou tlun-phanga tlung tanglayei chara kyil, tlun-eni tlung tanglayei chara kyilkhi, heirou tlun-chipbei chara kyil Judah'yei cheemmainungri namma ha'krao-nungkngai heirou langthouei lhouthil; ngam heineri chimle kyingya malungshilaklo.”
20Thangwan-Shimleiyei Pu Umpune atoubi shunlei: “Asitoubine hungthukheirou, touri khukarthil kounakrouwei limrap heirou thimi rapne wathukrillou; 21heitoubi yane khukarthil khatrouweini khukarthil khatra wachangbine atoubi yunrilheirou. ‘Kane chabine Umpuei bomra khrumchawase, heitoubi Thangwan-Shimleiyei Pu Umpuya raphawase; heiyanungri keimshahakhi charouwame.’ ” 22Moi! Thimi kounakni heirou mantrangkur lim rapnekhi Jerusalem'ra wachangbine, Thangwan-Shimleiyei Pu Umpuya raphaheirou; heitoubi yani Umpuei maibongra wachangbi khrumchaheirou. 23Thangwan-Shimleiyei Pu Umpune atoubi shunlei: “Heiyei tlainirap heirouri asitoubine hungthukheirou, touri Lim kantangrei napawa napungchip wathukbine, Jehudia napawa napung-khatdei linglik chulna masurra churphopbine atoubi yunheirou, ‘Kakhi nangkou chaeise, kouweiyo toulanungri, Dunpune neiya kalhonpime touri kani mayekla.’ ”
Currently Selected:
ZECHARIAH 8: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
