ZECHARIAH 6
6
Sapuk Kaari Phalitam Kar'ankmu
1 #
Kre 6.2-8. Heirouri keine mangalthutbi thiyeinungri keimitni mulhakurla, thilak, lhungdou khintamyei tlakra sapuk kaari phalitam wathuk loukmu; heirou lhungdourap heiri kulshan lhungdou. 2Heirou lamkri kaariyei sapukrap heiri mraolei, heirou khintam tlung kaariyei sapukrap heiri khmong. 3Heirou khyumtam tlung kaariyei sapuk rapri khngou; heirou phalitam tlung kaariyei sapuk rapri khngoubal-bungrangle, mraotronglei. 4Heirouri keikou tlou kallangkril Thangring heiwanung keine mallangbine loukngai, “Arapri kouweiyo, keiyei Upawa?” 5#Kre 7.1. Heirou Thangringne loumallangbi keinungei loushun, “Arapri tlaipangpal namyerrei Pu Umpuei maibongra mayungkhoubi wathukkur thangmunrei Lhawai phalitam rapme.” 6Sapuk khmong rapbei kaari heiwari khalu-lhangei ramranung kawura; heitoubi sapuk khngouwei kaari heiwane yaihilla chanthunglei; heirou sapuk khngoubal-bungrangle, mraotrong rapbei kaari heiwari khate-lhangei ramranung yuwura. 7Heirou sapuk mraotrong rapne wathukkurle tallengni, bikhatra mulcha mayungchim'changmakne, tlaipangpal karyouni kyongle-kale toubi chancha'knine thiphakur. Heitounei ani heishun, “Shoh chalaka! Tlaipangpal karyouni kyongle-kale chanchalaka.” Heisitoubi yani tlaipangpal karyouni kyongle-kale chanchakur. 8Heirouri ani ungraochani keinungei heishunbi atoubi kyun, “Thilak, khalu lhangei ramranungei kakakur sapuk rapne, ram heiyei doura klei Keiyei malungkhanei Lhawaiya malung damyerwurla.”
9Heirouri Umpuei tlouni keinungei hanuikhi yongbine atoubi shunpithu: 10“Nangne Babylon'ra raal manphopbi leikhounarei yenkallengbi klei Heldai, Tobijah, heirou Jedaiah'yei hutrei hutthul rapya loubine, heitoubi tlaini heihakrou Zephaniah'yei cha napawa Josiah'yei cheemra wachangalo. 11Heitoubi kulshanle, sina loubine lukhuprap sheemthutbi, heitoubi heirapya Josedech touri Jehozadak'yei cha napawa Suipipu upawa Joshua'yei lura makhupbaangpilaka.” 12#Zec 3.8; Isa 4.2; Jer 23.5; 33.15. Heitoubi anungei asitoubine shunpilak, “Thangwan-Shimleiyei Pu Umpune atoubi shunlei, ‘Thilak, BAN toubine min ung Napawa khatne, Aiyei leinabi heirouwei ban heisouthutbi tangbaangeirou; heitoubi A heiwane Umpuei Pucheemya sabaangeirou. 13Umpuei Pucheem heiwari Ahakpane sabaangeirou; heirouri Ane thang'allei minthulya phabine, Aiyei Krungbom doura Ane Krung khoinikhi omheirou; heitoubi Aiyei Krungbom doura Ane Suipipu khat khoinekhi omrou; heitoubi lhoubom khintam heiyei tlakra Ane kyingni Picharpu khoini thrungeirou.’ ” 14Asinungri lukhup heiwari Pucheemra Zephaniah'yei chanapawa'rap Heldai (Hebrew tloura ‘Helem’ toubikhi mu'kna), Tobijah, Jedaiah heirou Josiah (Hebrew tloura Hen toubikhi mu'kna- lingshang 10 ra kyao) yateinao phaliyei ningthutna khoine leirouwa.
15“Ram tlatnarei thimi rapnekhi wabine Umpuei Pucheemya sabaangnara yaothungeirou. Heirouri Thangwan-Shimleiyei Pu Umpune Keiya nanungei yenmalhetpikur touri nane loumurouwa. Lhawairap heiri naiyei Dunpu, Umpuei Chaytlou rapya baimakne hil chanthunglanung hungthukkeirou.”
Currently Selected:
ZECHARIAH 6: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
