MARK 6

Nazareth'ra Jesu'ya Yapimak

(Mt 13.53-58; Lk 4.16-30)

1 # Mt 13.53-58; Lk 4.16-30. Jesu'ne bi heiwaya lakurkhoubi Aiyei ramra yenkallengkur, heirouri Aiyei Ruishik rapkhi chanthungkur. 2#Mk 1.21; Mt 7.28. Mathrilna tlainirou Ane Pukhrumna Cheemra shunmatupi youkur. Heirou thimi kounakne Aiyei tlouya ningbi beimakne ngakur. Heirou yane kngai, “Napawa heine anakya kourei phaeiyo? Aiyei shingkhei heiri koureiyo? Koutoubine Ane anaksi kngakei lhou rapya toumaniyo? 3#Mt 11.6. A heiri Maryei chanapawa, heeng-chur thimi nimako? Aiyei naowa rapri James, Joseph, Judas heirou Simon yarap heiri nimako? Aiyei charra rapkhi kakou klei nimako?” Heiya yane Jesu'ya yapimak.

4Jesu'ne yanung shun, “Thimkhui khatya Aiyei ramra, bommaira heirou cheemkhur-rokhur nimakne bi kantangra chi-rikraini khrumpi.”

5 # Mk 5.23; 7.32; 8.23. Jesu'ne kna thimi thaei doura Aiyei hut khangbaangbi kna raikyer nimakne Ane bi heirouri kngakei lhou koukhatkhi toukhoumak. 6#Mt 9.35. Heirou yai malungam mak heiwaya mubi Jesu'ne beimak ngakkur.

Jesu'ne Ruishik Chiple Khniya Watkyil

(Mt 10.5-15; Lk 9.1-6)

Heirou Jesu'ne karhillei klei yulyulra shunpithotho chawurthu. 7#Mt 10.1,5,7-11; Lk 9.1-5. #Lk 10.1. Jesu'ne Ruishik chiple khniya khumkartilbi yaya napung khni-khni malhetkur. Ane lhangaimak lhawaiya manenei mantrangya yanungei pikur, 8heitoubi Ane yanung shun, “Nane chayeinung nai chamainung mumtol lhaknanung kaole, heirou nai tuykaora tuykhi koukhi urmak, 9heiya khorkhangri tunglak, heiya linglikri marthumni urmanthrinmakne chawalo.” 10Heirou Jesu'ne yanung hanuikhi shunthu, “Kounakpi naya louropi leiyanungri nane deira pochutbongyenri cheem heirou yukleikhoulak. 11#Mt 10.14. Nai tlungna bi kounakrou naya louropimak heirou ningnimakanungri nai horei raba makhawurkhoubi bi heiwaya lakurkhoulak. Heini yanung muyerkna hoirou.” 12#Mt 11.1; Lk 9.6. Heirou yane chawurbi thimi rapnung yaiyei borh lakurkhoubi ukning hungnei tlouya shunthutpikur. 13#Jas 5.14. Yane lhangaimak lhim rapya hulthutbi kna kounakya shirek teipibi thimi kounakya kna raiyerpikur.

Yuiluppi John'yei Hinei

(Mt 14.1-12; Lk 9.7-9)

14 # Mt 14.1-2; Lk 9.7-9; 9.19; Mt 21.11. Heirou Herod Krungni Jesuei min heiri bi kantangrou karyoukur mayekkurla. Thimi thane asitoubi shun, “Yuiluppi John heiri ringurthuwa! Heitounei ane mantrang phabi kngak lhou namma toumanilei.”

15Heirou deine kyun, “Ari Elijah.” Heirou dei thane asitoubi kyun, “Ari bongei thimkhui deirap naksine thimkhui khatme.”

16Heirou Herod'ne mayekbi shun, “Ari yuiluppi John'me! Keine aiyei lu dankur, heirou asinung ringwurthuwa!” 17#Mt 14.3-4; Lk 3.19-20. Herodni John'ya manbine phonbi phatopra khouyerkur. Heiyei ngamri Herodni aiyei naowa Philipbei nu Herodiasya aiyei nu hoinanung lungloukur. 18Yuiluppi John'ne Herodnung shun, “Nei naowaei nuya neiyei nunung louheimakso.”

19 # Mt 14.5-12. Heitoubi shunnei ngamrou Herodias'ne karhalkur, heirou hatkhi hatnikur, heisiya hoiyanungkhi ane koukhi toumanemak. 20#Mt 21.26. Herodni John'ya kalthi chikhou, koungameiyo toulanungri John'ri lhangai, tharmu chim thimi, heitoubi khying thimi touri ane kmu, heitounei aya lhangaine khoupikur. Kheenser aya marhotbi leiyanungkhi Herod'ne John'yei tlouya ningkni.

21Herod Krungkulyei bomtang thimi, raallui uparap heirou Galilee'yei ruichingpi purap namma ungthutbi aiyei pukna tlainiya beimak tangni marngeikur trum heiwari Herodias'yei lhangai tlakcha trum khat hoikur. 22Heirou Herodias'yei cha nangakawi knuy heine Herodle, phalphei marngeinara akou omkanthrin yama-krung rapya kalthi malungkhrahyerkur heirouri Krung heine nangaka heinung shun, “Nangri kou madulei? Neiyei pam heihakya keine pirou. 23#Est 5.3,6. Keine neiyei buei'mkhei pirou, keiyei krungkul lhang khatdanungkhi khaipirou” toubi ani tlou kantombi kyun.

24Heirou nangaka heine aiyei puiwinung hungkngai, “Keine kouya buserou?” Aiyei puiwine loushun, “Yuiluppi John'yei luya bulak.” 25Heirou nangaka heine khrangne heikallenglhakbi Krungnung wabukur, “Yuiluppi John'yei lu heiwaya leitlam khatra lhakbine asinung keinungei malanya keine paamlei!”

26Heirouri Krungri ukning beimakne lahwura, heiya ani nammaei maibongra tlou kantomwurnei ngamrou nangaka heiwiyei bukurri yapimak manimakura. 27Heirou tallengne shumtrum kngaak thimi khatya John'yei lu heiwaya wadinbi yennungei heimalhetkur. Heirou ane phatopra wabine lu heiwaya wadinkur; 28heitoubi ane leitlam khatra lhakbine nangaka heiwinung yenpikur, heirouri nangaka heiwine aiyei puiwi'nung yenpikur. 29John'yei ruishik rapne heiwaya mayekbi aiyei sharung heiwaya waloubi phumkur.

Jesu'ne Thimi Lishing Phangaya Pichakur

(Mt 14.13-21; Lk 9.10-17; Jn 6.1-14)

30 # Lk 9.10; Mk 3.20. Lhangai paocha rapne kallengbi Jesu'ya murilkur, heirou yai toukur lhou heirou tampikur nammaya Anungei hungshunpikur. 31Thimi beimak chungne wathuk-wachang tounarou Jesule Aiyei ruishik rapne kheenkhi phamakur. Heitounei Ane yanung shun, “Kane houdaina bi khatrou pothutriyase, heiyanungri kani lepcha mathril pharou.” 32#Mt 14.13-21; Lk 9.11-17; Jn 6.5-13; Mk 8.1-10; Mt 15.32-39. Heirou yane mali khat tungbi houdaina bi khatranung chayoukur.

33Heirou thimi chungne yaiyei chakurya muthungurbi ram heirouwei thimi namma hone chabi Jesule Aiyei Ruishik rapbei maibongra loutlungura. 34#Mt 9.36. Jesu'ne malirei yongchumyeinung thimi beimak chungne kartilbi klei Ane muwurbi kringpikur, heiyei ngamri yari thikulpirou makkur yaorulnak hoiyura. Heirou Jesu'ne yanung tloulam kounak shunpi youkur. 35Theengei kaallou Aiyei ruishik rapne Anung hungshun, “Beimak yentheengura, heirou bi awari houdaina bi khat, 36Pongrei klei yultlaira yai-yai chaanung-mainung loyerrou yaya malhetlaklo.”

37 # 2 Kr 4.42-44. Heirou Jesu'ne loumallang, “Nane yai chanungei kou-kouwanungkhi waloupilaka.” Heirou yane Anung shun, “Kane wabi yai shainungei tuychui denari macha-khniyei mumtol lopiserouko?”

38Heitounei Jesu'ne yanung kngai, “Nanung mumtolri kounak chungne yaoleikhiyo, hungthilak?” Heirou yane hungthibi louleinarouri Anungei shun, “Mumtol pak phangatamle thanga khintamkhi leileime.” 39Jesu'ne thimirap heiya pung-pungni tingtou doura omyernanungei Aiyei ruishik rapnung shunmatukur, 40Heirou thimi rapne pung-pungni machayei heirou somngaei toubi waiknaine omkarhungkur. 41#Mk 14.22; Lk 24.30-31. Heirou Jesu'ne mumtol pak phangale thanga khintam heirapya loubine thangmunra kathibine Dunpunung mathangkur, heitoubi Ane mumtol heiwaya threlchaalbi thimi rapnung yerpinanungei Aiyei Ruishik rapnung malanpikur. Heirou Ane thanga khintamyakhi yanung yerpikur. 42Ya nammane chaamaibi uk thowurchiya. 43Heitoubi Ruishik rapne chamainei maleikur tol'har raple thanga heiwari lukshangphai chiple-khni bil-bil thimne markumthungkur. 44Heirou chaamaikur thimiri napawa'thilkhi lishing phanga tlung.

Jesu'ne Yuidoura Hone Lamtla

(Mt 14.22-33; Jn 6.15-21)

45 # Mt 14.22-33; Jn 6.15-21. Jesu'ne thimi nammaya malhetyeinung Aiyei ruishik rapya malira tungyerbi Samadruei khatlhang mnakrei klei Bethsaida'ra lamkrine louyilkur. 46Ane thimi nammarei karkhaikur hillou Ane lhung khatra bucharou kakur. 47Yenrawaiyeinung mali heine samadru tlaira leiyeinung Jesuri Aitamtom samadru ruira leithungkur. 48#Mk 13.35. Aiyei ruishik rapne mali heiwari marthee maironi yenhulnei ngamrou yaiyei lahkur heiwaya Ane mubi ningshun nung warthrunyei kheenrou Ane yuidoura hone chabi yailhangra wakur, Ane yaya tladuirou waiyounarou, 49heirou yane Aya loumubi, awari marsakna lhawaime toubi yane ungraokur. 50#Mt 9.2. Heisitoubi yane Aya mubi beimakne chikur.

Heirou Jesu'ne yanung tallengne shun, “Na uksamak, awari Kei, chimaklo!” 51Ane malira katungkurle marthee heiwari ri'daine trimkur. Heitounei Ruishik rapne beimakne ngakur, 52#Mk 8.17. koungameiyo toulanungri thimi lishing phangaya mumtolle thanga thachane thoyerwurnei ngamrou yane bisokhi naimakur.

Genesaret'ra Jesu'ne Kna Raikyer

(Mt 14.34-36)

53 # Mt 14.34-36. Yane samadru yenraalbi Genesaret ramra hungbi mali heiya hungmathrumkur. 54Yane malirei yongchumyeinung thimi deine Jesume toubi tallengne loumukur. 55Yane ram heirouwei bi kantangra chawurbi heirou Jesu leiyame tounei paoya mayekbi bi kantangrei kna thimi nammaya yai ipnakou kalhonne Anungei hei'urlhakur. 56#Mk 3.10; Mt 9.20. Jesuei chana bi kantang, yultlai-yultlaiyei, Krungkulrei, keithilrei heirou bi kantangrei kna thimi rapne Jesuei phichi thirthungnanungei toubi raphakur. Heirou thirkur thimi nammane yai knari raikur.

Currently Selected:

MARK 6: MARIBSI

Highlight

Copy