MARK 5

Hyingmak Lhawai Changkur Thimi Khatya Jesu'ne Lhangaikyer

(Mt 8.28-34; Lk 8.26-39)

1 # Mt 8.28-34; Lk 8.26-39. Jesule Aiyei ruishik raple Gersa#5.1: bongei maye lailik khmanrari, Gergesenesm, thaneri Gadarenes. ramrei klei Galilee'yei Samadruei khat lhangra wa'tlungkur. 2Jesu'ne malirei yongchumle tallengne hyingmak lhawai changkur thimi khatkhi lhanyaorei wathukbi Jesu'ya murilkur. 3Aiyei leinari lhanyao, hunekhi aya thir'ruine phonphopbi khouchangmak; 4heirou aiyei hut-ho kounakchang phonbine khouthila, heisi toubikhi kheen kantangrou ane thir'rui heiwaya phuitatkur. Heitounei ayari hunekhi rakchangmakur. 5Masa-nunghang ane lhung raalbi lhanyaora ungraochabi karwaichakur, heirou aitamne thlungnekhi shutatkur.

6Ane lhanyaorei Jesu'ya loumunarou chanphabine Jesuei maibongra khuklu kanthrunchane kannelhakbi, 7#Pao 16.17; Heb 7.1; Mk 1.24. heirou ane hou choune lou'ungraobi kyun, “Choudui Dunpuei Chanapawa Jesu; Nangle keiri kouthukrillo? Dunpuei minra buchalei, keiya lahyerpimaklo!” 8Heirou Jesu'ne napawa heinungei shunkur, “Lhangaimak lhawai, thimi heirouwei wathukkura!”

9Heitoubi Jesu'ne anung kngai, “Neiminri kousi ung!”

Heirou napawa heine loumallang, “Keiminri ‘Mob’ toubi ung-touri kari beimakne chung!” 10Heirou yaya ram heirouwei hulthutpimaknanung ane Jesu'ya kalthi buchakur.

11Heirouri beimak chung hog rulkhat lhung mnakra silbine louklei. 12Heitoubi hyingmak lhawai rapne Jesu'nung buchakur, “Kane hog rapbei rilla changnanungei kaya bei malhetpilaklo.” 13Heirou Ane yaya malhetkur heirouri lhangaimak lhawai nammane thimi heirouwei thukkurbi hog rapbei rilla changkur. Hog lishing-khniyeimal heiwane lhungrimrei chansundabi Samadrura dahatkur.

14Heitoubi hogsil rapne chanwurbi pao heiya yultlaira hungshunpikur. Heirou thimi rapne bi heirou kou thukkurro toubi wathikur. 15Heirou yane Jesu'nung hungeinung hyingmak lhawai changkur thimi heine kansambi karbilne lhangaidui mukheine lou'ombi klei heiwaya muwurbi yari beimakne chikur. 16Lhangaimak lhawaitung thimi, heirou hog rapnung kounaksi lhou thukkurro toubi kmu thimi rapne thimi deinungkhi shunpikur.

17Heitounei yane Jesu'nung yaiyei ramya lakkurkhoubi shalnanungei shunchakur.

18Jesu'ne malira kakayeinung lhangaimak lhawai changkhou thimi heine Anungei buchakur, “Keikhi Nangkou chanthungeise.”

19Heisiya'nungkhi Jesu'ne yapimakur, heirou Jesu'ne anung shun, “Neicheemra kallengbi neiya Dunpune kounak tang lhou toupi, kounakchang kringpila toubine yanungkhi hungshunpilak.”

20 # Mk 7.31. Heirou ani cheemra kallengurbi yulthung chiptam ralni chabi Jesu'ne anungei kou toupikur tou heiya shunpikur. Heiya mayekkur thimi nammane beimakne ngakkur.

Jairusyei Chawi, Heitoubi Hee Karso Napuiya khat

(Mt 9.18-26; Lk 8.40-56)

21 # Mt 9.18-26; Lk 8.40-56. Jesu'ne hanuikhi Samadru ralbi wakur. Samadru heirou thimi beimak chungne Aya loukar'umkur. 22#Lk 13.14; Pao 13.15; 18.8,17. Dunpuya khrumna Synagogue khatrei ruichingpi pu Jairusni Jesu'ya loumubi Aiyei hopongra kanelhakbi, 23#Mk 6.5; 7.32; 8.23; Pao 9.17; 28.8. ani beimak kalni loubuchakur, “Keicha napuiyacha heiri beimak kalni nabi leiyurame, malungshipibi wabine aidoura Neiyei hut wakhoupilaklo, heiyanungri aiyei kna heiri raiwurbi ringroume!”

24Heirou Jesu'ne akou wakur. Heirouri thimi beimak chungne Jesu'ya kar'umbi chanthungkur

25Heirou kum chiple khni hee karsoni nabi klei napuiya khat louklei. 26Thim kounaknekhi aiyei kna heiya thikhoula, ane tuy kounak dingni kna heiya thiyerbinekhi rainung'tlimri duiduiyura. 27Ane Jesuei lhouya mayekbi, thimi rapbei tlakra Jesuei hilra hungchangbine, 28aitam ningchakur, “Keine Aiyei phichi tomchara hoiyanungkhi thirthung phalanungri keiyei kna awari rairou.”

29Ane Jesuei phichira tekcha thirkurle aiyei hee karsobi klei heiwari tallengne kapkur; heirou aiyei kna heiwari raiyurame touri ane ningmuwurla. 30#Lk 5.17. Heirou Jesu'ne Aiyei mantrang thukkurame touri tallengne muwurbi Ane Aya kar'umbi klei thimi rapnung kngai, “Hune Keiyei phichira heithirkur?”

31Heirou Aiyei ruishik rapne loumallang, “Thimi anak chungwani Neiya kar'umbi kleiri Nangne kmu; koutounei Neiya hune therkurro toubi ngaikurawo?”

32Heisiya'nungkhi Jesu'ne hui toukurro toubi karhilne thiphakur. 33Heirou napuiya heine anungei kouthukkurro toubi ningmubi ane chi-kanchunle kalhonne hungbi Jesuei hopongra khuklu kanthrunchani dunbi Anungei chimtlouya namma shunthutkur. 34#Lk 7.50; Mk 10.52. Jesu'ne anung shun, “Keichawi, neiyei malungam heine neiya raiyerla; neiyei muidane kallenglaka, neiyei kna heiwari railakasu.”

35Jesu'ne asitoubi yunyei kallou, Jairus'yei cheemrei thimi thane wabi anung washun, “Neichawi hiyura, kounungei Upawaya lahyerrouwo?”

36Jesu'ne yai kyun heiya ninglhakmakne anung shun, “Tekkhi uksamak, malungamnitom leiya.” 37#Mk 9.2; 13.3. Heitoubi Ane Peter, James heirou aiyei naowa John'ya nimakne dei hukhatyakhi Aihil chanthungyermakur. 38Yane Jairusyei cheem wa'tlungeinung, cheem heirou yane bisokhi naimakne chapkarhungbi louklei heiwaya Jesu'ne wamukur. 39Heirou Ane wachangbi yanung washun, “Koutounei nane asi bisokhi naimakne chapkarhungbi leikurrawo? Douwa ari himakme, ari ipme!”

40Heirou yane Jesu'ya lhouhoimakne laonakur, heitounei Ane ya nammaya hulthutdurbi douwaei pui-pale Aiyei ruishik napung-khyumya ruibine douwa heiyei neina bira wachangkur. 41#Lk 7.14; Pao 9.40. Jesu'ne Aiyei hutbangra churbine douwa heiya shun, “Talitha cumi,” (touri, “Napuiya douwacha, Keine neiya shunlei, kanthouwa!)” 42Napuiya douwacha heine tallengne kanthouwurbi karwaichayoukur. (Ari kum chiple khniyei douwa). Asitoubi thukkur heiwaya mubi ya namma heiri beimakne ngakur. 43#Mk 1.43-44; 7.36. Heirou Jesu'ne yaya hunungkhi yunthutmaknungei karbilne shunmatukur, heirou Jesu'ne shun, “Anungei chamainungei heiloupilak.”

Currently Selected:

MARK 5: MARIBSI

Highlight

Copy