MARK 4

Lungtuknei Yailim Tlou

(Mt 13.1-9; Lk 8.4-8)

1 # Mt 13.1-9; Lk 8.4-8. Jesu'ne hanuikhi Galilee'yei Samadru ruira shunmatupi youthu. Thimi kartilkur beimakne chungurbi Ane mali khatra polhakbi omkur. Maline yuira leibine thimi nammane samadru ruira mayungbine leikur. 2Ane yanungei mu'kna yailim tloune chungne shunpibi yanung kyun, 3“Louningpilak! Thimi khatne trunwai lung tukrou wathukkur. 4Ane loutlaira lung heiya heisi heitukyeinang, lung thane loukumra dakur, heirouri ramwaa rapne trailhakbi khulchaloukur. 5Heirou lung thane thlung doura thleiphu maknara dakur, heirou thleiphu maknei ngammei lung heiri mun kabi khrangne katpukthutkur, 6Heiya kinni kathukyei kheenrou mun heiri nungshani phounei ngamrou marhuikur; heirou mun heiri yrung khyukne runmaknei taryura. 7Lung thane thruhangra dalhakur, heirou katpukthutbi thruni yamhuwurbi heikhi heimakura. 8Heirou lung thari thleiphu leinara dalhakbi katpukthutkur, heitoubi tangthutbi hei somthum, somruk heirou macha heikur.”

9Heirou Jesu'ne dongwairou shun, “Ningnanungei khna kleirap nammane mayeklaksu!”

Munanung Yailim Tlou Yunnei Ngam

(Mt 13.10-17; Lk 8.9-10)

10 # Mt 13.10-15; Lk 8.9-10. Jesu'ne Aitam leiyeinung Aiyei tlouya mayekkur rapne Ruishik chiple khnikou hungbi mu'kna yailim tlou rapya khminni shunmatupinanung hungkngai. 11#1 Co 5.12-13; Col 4.5; 1 Th 4.12; 1 Tm 3.7. Heirou Jesu'ne yanung loushun, “Nanungeiri Dunpuei Krungramei muei klei yailim tlouya muyerlei,” toubi Ane kyun, “heiya purei klei, thimi dei rapnungri ngamrap namma mu'kna yailim tloune mayekyerlei, 12#Isa 6.9-10. heineri, ‘Yane murerikhi mumaknanungei; yane mayekrerikhi yai mayek heiri kouweiyo touri muchangmakrou. Yane Dunpunung kalleklhaklanungri, Ane yaya kukpirou.’ ”

Jesu'ne Lungtuknei Ngamrou Mu'kna Yailim tlouya Shunthutpi

(Mt 13.18-23; Lk 8.11-15)

13 # Mt 13.18-23; Lk 8.11-15. Jesu'ne yanung kngai, “Nane mu'kna yailim tlou awaya mulhak maneleiko? Heineri nane mu'kna yailim tlou namma awaya koutoubi mulhakrou? 14Lungtuk thimine Dunpuei tlouya tuklhaklei. 15Thimi thari lamruirei dalhakur lungnaksi; yane tlou heiwaya mayekle talleng Satan'ne wabi heiwaya louthutkur. 16Thimi deine thleiphu makna thlung doura dabaangkur heinaklei. Yane tlou heiwaya mayekkurle hakraone loulhakur. 17Heirou yai ukrilla tlou heiwari khyukne changmaknei ngamrou tlani leikhounak. Heitoubi tlou heinung'tlim klah-knang hungei kheenrou tallengne yane tlou heiwaya lakurkhou. 18Thimi deine thru hangra dalhakur lungnaklei. Yane tlou heiwaya mayekbi, 19heirou tlaipang chaanyei klah, dunya madu, heirou deideiyei lhouya madunei ngamrou tlou heiwaya yamhuwurbi hei heiyermakur. 20Heirou thimi deineri thleiphu leina bira lung dalhakur heinaklei. Yane tlou heiwaya ningbi loulhakur, heitoubi hei somthum, somruk, heirou macha heilei.”

Shangphai Daakrei Dunkhou Meishar

(Lk 8.16-18)

21 # Mt 5.15; Lk 8.16; 11.33. Jesu'ne asitoubikhi yunlei, “Hukhatne meisharya manshokbi shangphaine makhubphopbi, nimakanung khumdou daakra dunkhouko? Ane meishar dunna meitharl doura dunkhounungei nimako? 22#Mt 10.26; Lk 8.17; 12.2. Asitoubi yulkhoubi klei namma urthutchirou, makhubphopbi khou namma latthutdurchirou. 23#Mt 11.15; Mk 4.9. Khna klei thimi nammane mayeklaksu!”

24 # Mt 7.2; Lk 6.38. Jesu'ne yanung shun, “Nai mayekkur heiwaya chetni rumphoplak! Nane minungei holpikur changh heiwaya kanthritmakne nanungkhi Dunpune holpirou, heiya duinekhi holpikur kya. 25#Mt 13.12; 25.29; Lk 8.18; 19.26. Klei thiminung duine leiyerpirou, heiya mak thiminungeiri aiyei beicha kleikhi louthutdurou.”

Lung Pukthutnei Mu'kna Yailim Tlou

26 # Mt 13.24-30. Jesu'ne asitoubi yunthulei, “Dunpuei Krungram heiri anaksilei, thimi khatne aiyei loura lung tuklhakhou. 27Ane masanung ipkur, heirou ningshun nung katwaaryei kheenrou ani kanthouyeinung lung heiri trik katpukthutbine louklei. Heirou loupune heiwari koutoubi thukkuro touri mumak. 28Thleiphu heine lung heiya katpukthutyerbi hei kat'heikur; lamkrine mun kathukbi, heirou katchoubi umbine hui kathukbi hei kat'heikur. 29Heitoubi hei minwurbi markumrou kheen hungame toubi ane chamche dayerkur.”

Anchep Lungei Mu'kna Yailim Tlou

(Mt 13.31-32,34; Lk 13.18-19)

30 # Mt 13.31-32; Lk 13.18-19. “Dunpuei Krungram heiri kounakleiyo touri kani koutoubi yunserou?” toubi Jesu'ne kngai, “Awaya munanungei kounaksi yailim tloune yunserou?” 31“Heiri anaklei, touri thimi khatne tlaipang dourei namrouei mandi ancheplung khatcha loubi thleira linglhakurla, 32heihillou katpukthutbi anna-louna nam'rouwei tangdui trung khat hoikur. Ane ban tang-tang rungbine ramwaa rapnekhi yaiyei rabu hungshulkur.”

33Jesu'ne anaksi munanungei yailim tlou kounakne yanungei paolaa shunmatupikur; Ane yai mulhak maninanungei Ane maniyei'mkhei yunpikur. 34#Mt 13.34; Jn 16.25. Ane munanungei yailim tlou nimakne yanungei shunpimak, heirou Ane Aiyei ruishik rapkou leiyeinung Ane yanungei namma khminni muyerkur.

Jesu'ne Nung-Martheeya Nimkyer

(Mt 8.23-27; Lk 8.22-25)

35 # Mt 8.18,23-27; Lk 8.22-25. Tlaini heiyei rawainung Jesu'ne Aiyei ruishik rapnung shun, “Kane Samadru heiyei khat lhangra heirallase.” 36Heirou thimi nammaya lakurkhoubine, Ruishik rapne Jesu'ne haallei tungkhouna malira katungbi yane Aya urlouheila. 37Lepcharou Lhimnung-martheetang thukbi yuilhaoni mali heiwaya hung'umkarnengbi yuira dumrou waiyoukur. 38Jesu'ne mali'yei hil'lhangra lukhangbi ipbine leikur. Anung ruishik rapne shun, “Upawa kari hirou kyou awari Nangne lhou hoipimakarouko?” 39Jesu'ne kanthoubi lhimnung-martheetangya shunkur, “Yingalo! Mulleiyalo!” Heirou Ane yuilhaonung shun, “Yenneemmalo,” heirouri marthee heikhi yentrimmurbi, rie daikur. 40Heirou Jesu'ne Aiyei ruishik rapnung shun, “Nane koutounei chiyo? Nane asilumpha uklummako?” 41Heirou yane beimakne chiwurbi yaitam khatle-khatle mune yunrilkur, “A thimi aya huwo? Martheekhi heirou yuilhaoni rampha Aiyei shunya ninglei.”

Currently Selected:

MARK 4: MARIBSI

Highlight

Copy