MARK 3

Hut pangkhat Khi'thimi

(Mt 12.9-14; Lk 6.6-11)

1 # Mt 12.9-14; Lk 6.6-11. Hanuikhi Jesu'ne Pukhrumna Cheemra wachangnarou, heirou hut pangkhat khi napawa khat bi heirou louklei. 2#Lk 11.54. Yane Mathrilna tlainirou Jesu'ne aya toudamyerpileiko toubi mrimbine louklei. 3Heirou Jesu'ne hut pangkhat khi thiminung shun, “Ara maibonglhangra wachanga.” 4Heirou Ane yanung kngai, “Kaiyei tloulamra koutoubi yunlei? Mathrilna tlainirou lhangaiyei lhou toulo touwo, ningmakanung lhangaimak lhouya toulo toulei? Nimakanung heinenung lhawai kalpine lhangaiyo nimakanung hiyerkurne lhangairou?”

Heirou yane kou tloukhi yunmakne ri'daine leikur. 5Heirou Jesu'ne yaya thibi malungkhakur, heisiyanungkhi Jesu'ne yaiyei malungkanthring heiwaya mubi yanung'tlim lhawai klahni kringpikur. Heirou Ane kna thiminung shun, “Neiyei hut hei'engthutlak.” Heirou aiyei hutbang hei-engnarou hutbang heiri halleinak'rimni lhangaikur. 6#Mk 12.13. Lhangai-karsa rapne Pukhrumna Cheemya lakurkhoubi yane Jesu'ya koutoubi hatdurserouwo toubine Herodei thimi rapkou yunmaturilbi manrangkur.

Galilee Samadru Ruira Kartil

7 # Mt 4.24-25; 12.15-16; Lk 6.17-19. Jesule Aiyei ruishik rapne Galilee Samadru ruira wakur, heirouri thimi beimak chungne Aihilla chanthungkur. Ya rapri Galilee'rei, Judea'rei, 8#Mt 11.21. Jerusalemrei, Idumea ramrei, Jordan'rei kulkung lhangrei, heirou Tyre'le Sidon ram karhillei klei Krungkul raprei thimi heinak chungne Jesuei lhoutou nammaya mayeknei ngamrou Aiyei leinara wakar'umkur. 9Kartil heiri beimak chungnei ngamrou Jesu'ne Aiyei ruishik rapya mali khat heimarshiklaklo toubi shunkur. 10#Mk 5.29,34; 6.56. Ane kna thimi kounakya raiyerkur, heirou kna thimi nammane Jesu'ya thirnanungei heitonlhakur. 11Heirou hyingmak lhawai tung thimi rapne Jesu'ya muna bi kantangrou, Aiyei maibongra kanelhakbi ungraochane, “Nangri Dunpuei Chanapawame!” toubi loukyun. 12#Mk 1.45. Heirou Jesu'ne hyingmak lhawai tung thimi rapnung, “Nane ungraochanarou Keiya minungei mulhakyermaklo” toubi rekrekni shunkur.

Jesu'ne Aiyei Ruishik Chiple-Khniya Khalthut

(Mt 10.1-4; Lk 6.12-16)

13 # Mt 5.1; Lk 6.12. Heirou Jesu'ne lhungdou khatra kabi Aiyei ungkni thimi rapya ungbangloukur, bi heirou yane Jesu'nung hungkallongkur, 14#Mt 10.1. heitoubi Ane ya napung chiple khniya Aiyei ruishikrap toubi min thulbine khalthutkur. Heirou Ane yanung shun, “Keile kalhonne leinanungei Keine naya khalthutdurla,” heirou Ane yanung shun, “Keine naya Keiyei tlouya shunthutnanungei malhetrou, 15heirou nane lhim rapya hulthutnanungkhi mantrang nanungei leiyerrou.”

16 # Mt 10.2-4; Lk 6.14-16; Pao 1.13. Jesuei khalthutkur Ruishik chiple khni rapri: Simon(Jesu'ne aya ‘Peter’ toubikhi ung); 17Zebedee'yei chawarap James'le aiyei naowa John(Jesu'ne yaya ‘Bo-anerges’ toubine ungpi, heiyei tlouri, Nungkhungnakei mantrang chanaorap); 18Andrew, Philip, Bartholomew, Matthew'le Thomas, heitoubi Alphaeus'yei chawarap James, Thaddaeus'le Canaan'rei Simon, 19#Mk 2.1; 7.17. heirou Jesu'ya yorkur Judas Iscariot.

Jesu'le Be-elzebul

(Mt 12.22-32; Lk 11.14-23; 12.10)

20 # Mk 6.31. Heirou Jesu'ne cheemra kallengura. Heirou hanuikhi thimi beimak chungne wakartilwurnei ngamrou Jesu'le Aiyei ruishik rapne chana-mainanung rampha kheen phamakur. 21#Mk 3.31-35; Jn 10.20. Heirou Aiyei bommaini mayekbi Aya khamthungnung wairangkur. Koungameiyo toulanungri mine Jesuri mokna chubi karsukmak thimi hoiyurame toubi yunrilkur. 22#Mt 12.24-29; Lk 11.15-22. #Mt 9.34; 10.25. Heitoubi Jerusalem'rei kyong Puei khying tlou Maye Thimi rapne kyun, “Jesuri Be-elzebul thrai chuwura! Heini lhim kraowei upani Aya lhangaimak lhawaiya hulthut mane'kyer.”

23Heitounei Jesu'ne yaya ungbi yane munanung yailim tloune kyun, “Satan'ne koutoubi minung tungbi klei Satanya hulthutkur manirouwo? 24Krungkul khatne yaitam ngaalbi lhang dane karkhaiyanungri krungkul heiri kouniroukhi mayungchang younamak, 25Bommai khatne yaitam ngalbi baiyanungri bommai heiri kouniroukhi palchang younamak. 26Heinakrimne Satanyei ram heiri lhang-lhang dawanungri paalchang younamakrou, heirouri kluiyei kheen hungrouwa.”

27 # Isa 49.24-25. “Heitoubine hunekhi mantrang thimi khatdei cheemra changbi lamkrine aya hut-ho phonbi khoumakanungri aiyei putchei heiri kouninungkhi lungchangmakrou; haalnung aya phonbi khouwurlanungri aiyei putchei namma lunglouchangrou.”

28 # Mt 12.31-32; Lk 12.10. “Keine nanung shunlei touri, tlaipang thimiyei borh namma, heitoubi yai yunkarkaobi lalkur nammaya kukpirou. 29Heirou hukhatne Lhawai Khyingei doura klal tlou yunlanungri tekkhi kukpimakrou, koungameiyo toulanungri ane klui naimak borhya touwurla.” 30Jesu'ne atoubi kyunri thimi deine, “Ari hyingmak lhawai changurame toubi yunnei ngammei.”

Jesuei Puiwi Heirou Aiyei teinaorap

(Mt 12.46-50; Lk 8.19-21)

31 # Mt 12.46-50; Lk 8.19-21. Heirou Jesuei pui khatri Aiyei teinao rapne Aiyei leinara wa'tlungkur, heitoubi yane daangra mayungbi Jesu'ya wathuknanung thimi heiyilbine washunkyer. 32Jesu'ya thimi chungne omkarhilbi leiyeinung, heirou yane Anung shun, “Thilak, daangra neipuile neiyei teinaowa rapne Neiya murilrou toubine ngaaklei.” 33Heirou Jesu'ne loumallang, “Keiyei pui touri huwo? Heitoubi Keiyei teinaorap touni huwo?” 34Heirou Jesu'ne Aya omkarhungbi klei rapya thibi kyun, “Thilak! Arou Keiyei pui heitoubi Keiyei teinaorap leilei! 35Dunpuei kning hilthungne lhoutou thimi heiri Keiyei teinao, Keichar heirou Keiyei pui.”

Currently Selected:

MARK 3: MARIBSI

Highlight

Copy