MARK 2

Jesu'ne Mnak-Pangkhat Hisunda Thimi Khatya Toudampi

(Mt 9.1-8; Lk 5.17-26)

1Tlaini beileibi Jesu'ne Caperna-um'ra kallengura, heirouri Jesu'ne cheemra leiyurame touri nammane mayekkurla. 2Thimi beimak chungne kartilnei tho'khatkhi makkura, dangra'ramphakhi leinabi makkura. Heirou Jesu'ne yanungei tlou yunpiyeinung, 3#Mt 9.2-8; Lk 5.18-26. Thimi napung-phaline mnaak paangkhat hisunda thimi khatya heiurlhakur. 4Thimi chungachaknei ngamrou yane aya heiurlhak manimakura. Heitounei yane Jesuei leina cheem bungkhum phorputbine, heitoubi yane kna thimiyei ipna khumdoule kalhonne yuklaksundakur. 5Yaiyei uklum heiwaya muwurbi Jesu'ne mnak ruikhi thimi heinungei kyun, “Keichawa, neiyei borh nammaya kukpiwurlasono.”

6Bi heirou ombine tloulamya marnopi thimi thane yaitamne heishi ningchabine, 7“Koutounei A thimine ‘Neiyei borhya kukpiwurla’ toubi yunngamkuro? Ari Dunpuya lhou hoimakei tloume! Dunpu nimakne hune borhya marthingpi manileiyo?”

8Jesu'ne yai ukningrei khalbi klei heiri talni muwurla, heitoubi Ane yanung shun, “Nane koutounei heinaksi khalkurawo? 9Mnaak pangkhat hisunda thimiya ‘Neiyei borh namyerwa kukpiwurla’ touni klaiyo? Nimakanung ‘Kanthoubi neiyei ipna chungbi karwaichawa’ touni klai? 10Tlaipangpal arou Thimiyei Chanapawari borhya marthingpi maneme toubi nane munanung toume.” Heirouri Ane mnaak pangkhat hisunda thiminung shun, 11“Keine neinungei shunlei, kanthouwa, neiyei ipna chungloubi cheemra shaallaka!” 12#Mt 9.33. Heirouri ani kanthoubi tallengne aiyei ipna urloubi nammaei maibongrei wathukkur. Heirou yane beimakne ngakurbi Dunpuya mathangbine kyun, “Kane anak awaya bongnungri tekchakhi muthimakhui!”

Jesu'ne Leviya Ungkur

(Mt 9.9-13; Lk 5.27-32)

13Jesu'ne Galilee'yei Samadru ruira yenkallengkur. Heirou thimi beimak chungne Aiyei leinara wakallongkur, heirou Ane yanungei shunmatupi waiyoukur. 14#Mt 9.9-13; Lk 5.27-32. Heirou Ane heisi pochutbi chayeinung Khulrui-thou thimiyei cheemra Alphaeus'yei chanapawa Levine ombi louklei muwurla. Jesu'ne aya shun, “Keihil chanthunga,” heirou Levini kanthoubi Aihil chanthungkur.

15Jesu'ne Levi'yei cheemra chak-an chamaiyeinung Rui-thou thimile borh thimirap heirou Aiyei ruishik rapkou omkanthrinbi chamalnakur, heiyei ngamri Jesuei hilthung thimiri beimakne chung. 16#Pao 23.9. Tloulamya shunpi thralni, Jesu'ne Ruithou thimi raple borh thimi rapkou omkanthrinbi chak-an chamalkna heiwaya mulhakur, heirou yane Aiyei ruishik rapnung shun, “Ane ruithou thimi raple borh thimi rapkou ommalnabi chak chamalknari koutounei?”

17Jesu'ne heiya mayekbi yanung shun, “Namak thiminung thimyei lhou mak, heiya kna thiminungei thimyei lhou klei. Keine khying thimiya ungrou kyong nimak, heiya borh thiminung kyong.”

Chara Yilnei Ngamrou Tlou Kngai

(Mt 9.14-17; Lk 5.33-39)

18 # Mt 9.14-17; Lk 5.33-38. Yuiluppi John'yei ruishik raple Lhangai-karsa thimi rapne chara yilbi leiyeinung, thimi thane Jesu'nung hungbi tlou kngai, “Yuiluppi John'yei ruishik rapne Lhangai-karsa thimiyei shikrui rapne chamaimakne chara yilyeinung Neiyei ruishik rapne chara yilmakri koutounei?”

19Heirou Jesu'ne yanung loumallang, “Nu'klou napawane aiyei nu-ruinenung aiyei palui thralya unglhakbi pichamakne chara yilkyer kyako? Nu lourou napawa heine palui rapkou leiyeibilri yane chara yilmakrou. 20#Lk 17.22. Heirou nu lourou thimiya yaihangrei urthutlounei kheen hungeirou, heirou yane chamaimakne yilleirou.”

21“Thimi hunekhi phi khmanra ran phihar thruibangbi cheetnara tholmak, heiya thruibaangla'nungri phihar ran heine taangurbi khman heiwari duine cheetlhakrou. 22Hunikhi darkha yui ranya khman an'un kaora shunglhakmak, haal'lhaklanungri kao khman heiri cheetdurou, heirou kaokhi darkha yuikhi maangrou, darkha yui ran heiri ran an'un kaora haal'lhakrou.”

Mathrilna Tlainiyei Ngamrou Tlou Kngai

(Mt 12.1-8; Lk 6.1-5)

23 # Mt 12.1-8; Lk 6.1-5. #Khn 23.25. Jesu'ne Mathrilna tlainirou loutlaira yenralyeinung Aiyei ruishik rapne gehu thatbine mallipshaikur. 24Heirou lhangai-karsa rapne Jesu'nung shun, “Thilak, Mathrilna tlainirou tloulamne yamak lhouya Neiyei ruishik rapne toukurya koutouneiyo?”

25Jesu'ne yanung shun, “David'le aiyei thimi rapne msulyeinung koutoubi toukur, nane pamumako? 26#1 Sa 21.1-6; 2 Sa 8.17. Ane Dunpuei cheemra polhakbi Dunpu'nungei makatkhou mumtol rapya shailoukur; lhou ari Abiathar'ne Suipipu upa hoiyeinung thukkur. Kai tloulam hilthungne Suipi purap nimakne hunekhi shainung yamak, heiya David'ne shailoukurthil nimakne aiyei thimi rapnungkhi pishaikur.” 27#Hoy 23.12; Khn 5.14. Jesu'ne yanung shun, “Mathrilna tlaini ari thiminung sheempi, thimiri Mathrilna tlaininung nimak. 28Heineri Thimiyei Chanapawa heiri Mathrilna tlainiyei Pu.”

Currently Selected:

MARK 2: MARIBSI

Highlight

Copy