MARK 7

Bongei Nutar-Patar rapbei Youkna Ngamrou Jesu'ne Shunmatupi

(Mt 15.1-9)

1 # Mt 15.1-11; Lk 11.38. Lhangai-karsa raple upa rapne Jerusalemrei hungbi Jesuei pongra kartilkur. 2Yane Jesuei Ruishik rapne hut chikmathaimakne chamaikur heiri mardun toubi khalkhou. Heiwari koungameiyo toulanungri ya heine yaiyei hut chikmakne chamaibi loukleiya mulhakur.

3Lhangai karsa raple Jehudirap nammane bongei yai nutar-patar rapbei youkna hilthungne, yane yaiyei hut lhangaine chikmathaimakne cha'kmairi younamak; 4#Mt 23.25; Lk 11.39. heiya duine keithilrei klo putchei koukou hoiyanungkhi yane halnung chaamthaimaka'nungri chamaimak. Heiya duine yane yuikep, chakphu-anphu, heirou ipna-neina rapya lhangaidui machamrou toubi bongei youkna hilthungne charilkhou.

5 # Gal 1.14. Heitounei Lhangai karsa raple upa rapne Jesu'nung kngai, “Neiyei ruishik rapne kai nutar-patar rapbei youkna shunpikhou heiwaya chanthungmakne koungammei yai hut chikmakne cha'kmaiyo?” 6#Isa 29.13. Heirou Jesu'ne yanung loumallangpi, “Isaiahni kounak chimne nanaksi lhangai karsa rapbei ngamrou yunthutkhou; ani asitoubi mayekhoupi heinakne, ‘Nari lhangai karsa thimime: thimi rapne yaiyei murnitom Keiya mathanglei, heiya yai ukningri Keipongra leimakne tlatni leilei. 7Koukhi karsukmakne yane Keiya khrumlei, touri tlaipang thimiyei tlouya Keiyei tloulam'nakne yane marnopilei!’

8“Ane Dunpuei tloulamya lakurkhoubi tlaipang thimiyei shunmatupiya chetni churphopbi klei.”

9Jesu'ne yunthulei, “Nai shunmatupiya chouyernanung Dunpuei tloulamya lhouhoipimaklei.” 10#Hoy 20.12; 21.17; Khn 5.16; Lev 20.9. Moses'yei chaylamne yunkhou, “Naiyei pui-paya rikrai ktrumnalak, heirou hukhatne aiyei pui-paya lhangaimak thuithini mintlangbi shamkur thimiri hirou.” 11Heirou nane atoubi yunlei, “Hukhatne karsukei lhou leiyanungri awari Corban'yei lhou touri Dunpuei pikur hutthul. 12Heisi toulanungri nane thimi heiya aiyei pui-panung lhangai touyerpi nimak. 13Asitoubine nane thimi deinung naiyei youkna heiya shunpinei Dunpuei tlouya karsukyermakur. Anaksi kounakya nane toubi leilei.”

Thimi Khatya Mardunkyer Lhou

(Mt 15.10-20)

14Jesu'ne kartilbi klei thimi nammaya unglhakbi kallengne yanungei shun, “Na namma phabdani louningpilak. 15Thimi khatdei lhangaimak mardun heiwari purei kouninungkhi wachang nimak, heiya thimi heiya mardunkyer heiri aiyei ukning rilrei klei heiwane mardunkyer.” 16Ninglhaknanung khna klei thimine mayeklasu!

17 # Mt 15.15-20; Mk 4.10. Jesu'ne thimi nammaya lakkurkhoubi cheemwaira wachangeinung Aiyei Ruishik rapne yunbi klei tlou awari kouwo toubine loukngai. 18#1 Co 10.25-27; Rom 14.14; Tit 1.15; Pao 10.15. Jesu'ne yanung loumallang, “Nakhi yanaksine beimak muheimaklei. Nane mumako touri thiminung purei wachangkur heiwane koukhi aya mardunyermaklei. 19Heiyei ngamri purei wachang heine aiyei malungra changmak, heirou aiyei ukra yongchangbi mayulra ethutkur heiwariya.” (Asitoubi Jesu'ne cha'kmai put namma marthingurame toubi shunthutpikur).

20 # Rom 1.28-31; Gal 5.19-21. Heirou Ane hanuikhi shunthulei, “Thimi khatdei ukningrei kathuk heiwane aya mardunkyer. 21Heiyei ngamri thimi khatdei rilrei wathuk lhangaimak, hyingmak, mucha'kni, thimi krang, 22#Mt 6.23; 20.15. minu-micha daimarek, khramtang, mandalkhei, tlaipang sharungnungtom ningcha, miput maduphakal, tangcha, tlou thuithi kyun, heirou muheimek, 23namma heiri thimi khatdei ukrilrei wathukbi aya mardunkyer.”

Napuiya Khatdei Malungam

(Mt 15.21-28)

24 # Mt 15.21-28. Jesu'ne bi heiya lakurkhoubi Tyre'le Sidonyei ramra chakur. Ane thimi hukhatyakhi muyermakne cheem khatra polhakbi leikur, heisiya hoiyanungkhi Ane louyulchangmakur. 25Lhangaimak lhawai changbi klei nangaka khatdei puiwini Jesu Hungurame touya mayekbi tallengne wachangbi Aiyei hopongra wakhrumchakur. 26Napuiya heiri Jehudi nimakne Syria'rei Phoenicia ramrei pukkhou napuiya. Ane aiyei chawiyei rilrei klei lhim hulthutpinanungei Jesu'ya buchakur. 27Jesu'ne anungei loushun, “Kane douwa rapya pichariyeise, douwa rapbei cha'kmai putya ui rapnung picharikur heiri chimmakrou.” 28Heirou napuiya heiwine Jesu'nung loumallang, “Moi heiri chimlei, Upawa, ui rapne rampha douwa rapbei chamainarei dakurya khulchalei.” 29Heirou Jesu'ne anungei shun, “Nangne heitoubi yunnei ngamrou neiyei cheemra kallengalo, touri lhim heiri neiyei chawirei thukkura.” 30Heirou napuiya heiwine aicheemra kallengeinung aiyei chawi heiri khumdoura ipbine louklei, tanghakpani lhim heiri aiyei chawirei thukkurbi louklei.

Khnasit, Tloukhi Thukmak Napawa Khatya Lhangaikyer

31 # Mt 15.29-31. Jesu'ne Tyre ram'rouwei yenkallengbi Sidon ramthungne yenralbi Galilee'yei Samadrura heirou Decapolis'yei ramra yukur. 32#Mk 5.23. Heirou thimi thane khnasit thimi, heirou tlou ak'ak thimi khatya ruilhakbi Jesu'ya aidoura hut khoupinanung buchakur. 33#Mk 8.23. Heirou Jesu'ne yaihangrei aya urthutloubi Aiyei hutmayungni thimi heiyei khnara thunlhakbi heitoubi Aiyei matil thukbine aiyei maleira teipikur. 34Heirou Jesu'ne Thangmunra kadthibi nilsopui shobine napawa heinung shun, “Ephphatha” touri “latpilaka!” 35Heirou tallengne napawa heine khna mayekkur, aiyei malei heiwakhi koukhi loupalmakne tlou yunchangkur. 36#Mk 1.44; 5.43. Heirouwei Jesu'ne hunungkhi shunthutmaknanung yaya shunmatukur, heisi toubinekhi yane mihangra duiduine shunthutkur. 37Heirou lhou heiwaya mayek thimi nammane beimakne ngakurnarou asitoubi kyun, “Kounakchang lhangai lhouya toukurro?” Heirou yane asitoubikhi kyun, “Ane khnasit thimiya rampha mayekyerla, tlou thukmak thimi rapyakhi yun'maneyerla!”

Currently Selected:

MARK 7: MARIBSI

Highlight

Copy