MARK 16

Jesu Ringthutkur

(Mt 28.1-8; Lk 24.1-24; Jn 20.1-10)

1 # Mt 28.1-8; Lk 24.1-10; Jn 20.1-2. #Lk 23.56; Jn 19.39. Heirou Mathrilna tlaini ralwurbi, Mary Magdalene'le, James'yei pui Mary heirou Shalome yane Jesuei sharungra teiphangnungei khrim muiknam shirek lokur. 2Heirou haptaei lamkri tlainirou ningshun manma kinni kathukbongnung yane lhanra wayeinung lamra yaitam yunkril. 3“Lhan'purrei makhupbi khoukur thlung heiwari hune kanungei khanglatpirou?” (Thlung heiri beimakne tang). 4Heirou yane wabi heithinarou thlung heiwari maletthutbi louklei wamukur. 5Heirou yane lhanrilla wachangeinung phi khngou upbi napawa khatne thya lhangra ombi louklei mukur, heirou yane beimakne ngakkur.

6Ane loushun, “Ngakmaklo! Nane heeng karbakra manyarhatkur Jesu'ya raphame touri keine mulei, Ari bi arou makkura, Ari ringthutdura! Thilak, Aya phneikhouna biri awari. 7#Mk 14.28; Jn 21.1-23; Mt 28.7. Asinung nane kallengbi Aiyei ruishik rapnung, heirou Peter'nungkhi hungshunpilak, nanungei shunpiwurkhou heinakne nane Aya bi heirou murilrou.” 8Heitoubi yane chi'knale kngakle kalhonne lhanbi heirouwei chankallengkur. Yane kalthi chiwurbi thimi hukhatnungkhi shunthutmakur.

Jesu'ne Mary Magdalene'nung Mukandangpi

(Mt 28.9-10; Jn 20.11-19)

9Jesu'ne katringthutne ningshun manma Ane lhangaimak lhawai enitamya hulthutbi kna raiyerpikur Mary Magdalene'ya rorilbi muyerkur. 10Ane yenkallengbi Jesukou pulne leikhou thimi rapnung, kanrelne chapbi klei rapnung hungshunpikur. 11Heirou ane “Jesu ringthutdura, keine mukhoula” toubi hungshunpibikhi yane aiyei tlouya malungampimakur.

Jesu'ne Ruishik Khintamnung Mukandangpi

(Lk 24.13-35)

12Heihillou Jesu'ne Aiyei mairung laine yaihangrei khintamya yaiyei yullanung shaalyeinung muyerpikur. 13Heirou yane kallengbi deinungkhi shunpikur, heitoubikhi yai kyun heiwaya malungampimakur.

Jesu'ne Ruishik Chiple Khatnungei Mukandangpi

(Mt 28.16-20; Lk 24.36-49; Jn 20.19-23; Pao 1.6-8)

14Heihillou Jesu'ne chiple khatne chaak chayeinung muyerpikur. Yai ukning mantrangnei heirou yai malungam maknei ngamrou Jesu'ne yaya samkur, 15Heirou Ane yanung shun, “Tlaipangpal bi kantang chabine lhangai paolaa heiya thimi kantangnung shunpilak. 16Heirou malungambi yuilupkur aya kalpirou heirou malungammak thimi heiyari klal dayerrou. 17Malungamkur rapnung kngak lhou tounanungei mantrang pirou: Keiminra yane lhangaimak lhawaiya hulthutrou, yane tlou limlimkhi yunchangrou; 18Yane frulya churbikhi, heirou khru mongbikhi tek himakrou; yane kna rapbei doura yaihut khaanglanung kna rairou.”

Jesu'ne Thangmunra Kakur

(Lk 24.50-53; Pao 11.9-11)

19Asitoubi yale yunrilkur hillou Jesu'ya Thangmunra loubaangkur heirou Dunpuei thya lhangra ombi leikur. 20Heirou Ruishik rapne bi kantang chawurbi lhangai paolaa shunpikur, heirou Dunpune yakou kalhonne lhou toukur, heirou yai tlou'myer heiri chimleime toubi yaiyei kngak lhou toukur namyerwa heine kandangne muyerkur.

Currently Selected:

MARK 16: MARIBSI

Highlight

Copy