MARK 15

Jesu'ya Pilatedei Maibongra Heiruilhak

(Mt 27.1-2; Lk 23.1-5; Jn 18.28-38)

1 # Mt 27.1-2; Lk 23.1; Jn 18.28. Ningshun manma Suipi purap, tloulamyei Uparap heirou lhou'urpu Uparap nammaya khnotni murilbi tlou sheemrilkur. Yane Jesu'ya phonbi Pilate'yei leinara urlouheibine pilhakurla. 2#Mt 27.11-26; Lk 23.2-3,18-25; Jn 18.29—19.16. Heirou Pilate'ne Anung loukngai, “Nangri Jehudi rapbei Krungko?” Jesu'ne loukrul, “Neikyun heiwariya.” 3Suipipu rapne Jesu'nung nimak tlou kounakya theibaangpikur, 4heitounei Pilate'ne hanui kallengne ngaithu, “Nangri mallangmakrouko? Yai theibaangkur namma heiya louningthilak!” 5Heisibilroukhi Jesu'ne tekchakhi loumallangmak, heitounei Pilate'ri beimakne ngakkur.

Jesu'ya Hatnungei Darilkur

(Mt 27.15-26; Lk 23.13-25; Jn 18.39—19.16)

6Ralthutpinei karngaei tlaini kantangrou youkna hilthungne thimi rapne yaya manbi kulrei klei thimi khatri Pilate'ne malhetpikur mane. 7Kheen heirou khulpamya marhotbi klei napawa khatle kalhonne Barabbas toubi ung napawa khatkhi kulra khoubi louklei. 8Kartilbi klei thimi rapne yai youkna hilthungne toupilaklo toubi Pilate'nung shunchakur. 9Heirou Pilate'ne yanung kngai, “Keine nanung Jehudiyei Krungya malhetpiyernileiko?” 10Suipipu rapne karhoutangnei Jesu'ya aihutra katpibaangme touri ane loukmu. 11#Pao 3.14. Heirou Suipipu rapne Jesu'nung tlim Barabbas'ya malhetyernanungei kartilbi klei thimi rapya khrotlhakur. 12Pilate'ne hanuikhi kartilbi klei thimi rapnung shun, “Heiyanungri nane Jehudia rapbei Krungme toubi ung napawa Anungei keine kou touserou?” 13Heirou yane hanuikhi hou chouni lourulbi, “Aya manyarhatlak,” toubi loukyun. 14Heirou Pilate'ne yanung heingaithu, “Ane kou klal touwurneiyo?” Heirouri yane duine chouni lou'ungraothubi, “Aya manyarhatlak,” toubi loukyun. 15Heirou Pilate'ne kartilbi klei thimi nammaya malung khrahyerou toubi Barabbas'ya yanungei malhetpikur. Asitoubi ani Jesu'ya umwurbi heeng karbakra manyarhatnungei pithutdurla.

Raallui rapne Jesu'ya Laokna

(Mt 27.27-31; Jn 19.2-3)

16 # Mt 27.27-31; Lk 23.11; Jn 19.2-3. Raallui rapne Jesu'ya khulbungya ngaakbi klei Upawaei yuntlangmaira ruilhakbi raallui deiya ungmartilkur. 17Yane Jesu'nung phi'mrao khat upbaangbi Aiyei lura thir-thruyei lukhup khuplakpiwurbi, 18yane Jesu'ya ‘Jehudia rapbei Krung, pulchi hoiniyasu’ toubi yunbine khrumkur! 19Yane Aiyei lura cheine umkur, matilkhi mthukphangbi khuklu kantrunchabine Aya khrumkarsakur. 20Yane Aya laonachibi Aiyei phi'mrao hei lhukurbi Aiyei haallei phiya hupbaangurbi heeng karbakra manyarhatnungei ruiloukur.

Jesu'ya Manyarhatkur

(Mt 27.32-44; Lk 23.26-43; Jn 19.17-27)

21 # Mt 27.32; Lk 23.26; Rom 16.13. Yuldeirei Krungkul heirounung kwa Simon toubi ung napawa khatya lamra rorilnarou raallui rapne manbi Jesuei heeng-karbak heiya uryernakur. (Simon'ri Cyrene'rei Alexander'le Rufusyei pa). 22#Mt 27.33-44; Lk 23.33-39; Jn 19.17-24. Heirou yane Jesu'ya Golgotha'ra, touri “lu-thru” toubi ung bira ruilouheikur. 23Heirou yane myrrhya darkha yuile maryalbi Jesu'nung pimongkur; heiya Jesu'ne loumyukmakur. 24#Laa 22.18. Heirou yane Jesu'ya manyarhatdurbi Aiyei phi heiwaya threlkhaibi hu-hunungei li-karsuileiyo toubi meirui thirilkur. 25Yane Aya hatkur heiwari ningshun pung tako daei kaallei. 26Heirou yane Jesu'ya theibaangpikur tlouya, “Jehudia rapbei Krung” toubi mayebi Aiyei luthakra hempopkur. 27Heirou yane mucha thimi khintamyakhi khatne Jesuei thya lhangra heirou khatyane thyoi lhangra heeng karbakra manyarhatkur. 28Asitoubi Khying Pu'tloura mayekhou heiwaya karchune hungthukkura. Ane klal thimi rapbei mrim-knang urpiwurla. 29#Mk 13.2; 14.58; Jn 2.19. Heirou pochabi klei rapne lu khngaakbine Jesu'ya rikrai pikur. “Hih! Nangne Pukhrumna cheemya threwurbi tlaini khyumnirou sabaangthurou! 30Asinung heeng karbak dourei yongchumthiama, heitoubi Neitamya kallakma!” toubi kyun. 31#Laa 22.7-8. Heinakne Suipipu raple, tloulamei upa rapne Jesu'ya laonabi yaitam yunkril, “Ane deiyari kalpilei, heiya Aitamya kalchangmaklei!” 32“Christa heiri Israel rapbei Krungme toubi mubi kani malungamnungei heeng karbakrei yongchumlaksu!” Heirou Jesukou pulni manyarhatkur napung-khni heinekhi Aya khremnabi rikrai pikur.

Jesu Hikur

(Mt 27.45-56; Lk 23.44-49; Jn 19.28-30)

33 # Mt 27.45-56; Lk 23.44-49; Jn 19.28-30. Heirou nunghang-tlaikalrou khulyao namma pung khyumbil mehkhup katleikur. 34#Laa 22.1. Pung-khyumrou Jesu'ne hou chouni ungraobi, “Eloi, Eloi, Lama sabach-thane?” touri “Keiyei Dunpu, Keiyei Dunpu, Nangne koutounei Keiya lakurkhouwo?” 35Heirou mayungbi klei thimi thane heiwaya mayeknarou kyun, “Heiningthilak, Ane Elijahya ungphalei.” 36#Laa 69.21. Yai hangrei napung khatne nbur khat shinloubi beimak khakur yuira namlupbine cheimsur khatra phonbine Jesuei murra katnamphonbi katkyun, “Tourimakhui, heileiyasu! Elijahni yongchumbi Aya heeng karbak dourei lousundapileiyo kouwei kani thiyase.” 37Heirou Jesu'ne hou chouni ungraokhoubi hikur. 38#Heb 10.19-20. Heirou Pukhrumna cheemrei yarkhaina maikhal phi heiwakhi dourei waiyoubi holibil khintam thukni threlsundakur. 39#Mk 1.11; 9.7. Heirou raalluiyei bomtangni heeng karbak heiyei maibongra mayungbi Jesu'ne koutoubi hikuro touri heimuthungkur. Ane kyun, “A thimiri Dunpuei Chanapawame touri tanghakpani chimlei!”

40 # Jn 19.25. Napuiya thanekhi tlatnarei thibine heiklei. Yaitlak heirouri Mary Magdalene, Josephle ainao Jamesyei pui Mary, heirou Shalomekhi kyao. 41#Lk 8.1-3. Ya heiri Jesu'ne Galilee'ra leiyeinung Aiyei hil-chanthungbi churtrungpikhou thimirap. Akou Jerusalemrei hungmalkna napuiya kounakhi bi'heirou klei.

Jesu'ya Krui

(Mt 27.57-61; Lk 23.50-56; Jn 19.38-42)

42 # Mt 27.57-61; Lk 23.50-56; Jn 19.38-42; Pao 13.29. #Khn 21.22-23. Yenrawaiyeinung Arimathea'rei Josephkhi wa'tlungkur. Ari upa rapbei tlakrei rikrai khrumna kya thimi khat, ani hungbi klei Dunpuei Krungramya karngeibi klei. 43Marshikrou tlaini (heiri Mathrilna tlainiyei maibong), heirou Joseph'ne Pilateyei bira khrangne wabi Jesuei sharung heiwaya pilaklo toubi buchakur. 44Jesu hiyurame tounei paoya mayekbi Pilate'ne beimak ngakkur. Ane raallui upawaya ungbine, Jesu hikur heiwari koulumeiyo toubi ngaithikur. 45Heirou raallui upawa heirouei pao heiya mayeknarou, Pilate'ne khi'lhung heiwaya Josephya ruiyernungei yapiwurla. 46Joseph'ne phaikhring'phi khat lobine, heitoubi Jesuei sharung lousundabi lhombine thlungra utlhakbi sheemkur lhan khatra phumkur. 47Heirou Mary Magdalene, Josephbei puiwi Mary'ne Jesuei sharungri koura khouwo touri muwurla.

Currently Selected:

MARK 15: MARIBSI

Highlight

Copy