MARK 14

Jesu'ya Hatnungei Kraang

(Mt 26.1-5; Lk 22.1-2; Jn 11.45-53)

1 # Mt 26.1-5; Lk 22.1-2; Jn 11.47-53. Tlaini khyumniyei hillou Ralthutpina heirou phri lhakmak mumtol shaibi khulluk khangbi karngana heiri hungrou waiyouwa. Suipipu raple tloulamei upa rapne Jesu'ya manbi hatnanungei tlakcha thiphawura. 2Yane shun, “Karngaei kheen arou kani tourimakase, koungameiyo toulanungri thimi beimakne plangurou.”

Bethany'ra Jesu'nung Shirek Teiphaangpi

(Mt 26.6-13; Jn 12.1-8)

3 # Mt 26.6-13; Lk 7.36-38; Jn 12.1-8. Jesu'ne Bethany'rei raichi patpa Simon'yei cheemra chak chabi leiyeinung, napuiya khatne manklu ‘nard’ toubi ung khrim lhangai shirekya thlungei phu khatra lhakbi heilhakur. Ane phu heiwaya khumna laatbine Jesuei lura shirek heiya teipikur. 4Heirou thimi thane malungkhabi yaitamne yunkril, “Kouya tounanungei muiknam shirek heiwaya mareknabi hormangkuro? 5Heiwaya denari#14.5: denari khatri heiyei chaanyei thimi napung-khatdei nungkhatneyei lhouchurnei man. macha-khyumya duine yorwurbine kanring-kanwang rapnung yerpiwurnungme.” Heirou yane napuiya heiwiya kalthi shamwurpi. 6Heitounei Jesu'ne shun, “Aitam, aithuk toulaksu, nane aya koutounei marhotpiyo? Ane Keinungei beimakne lhangai lhou khat toupiwurla. 7#Khn 15.11. Nane kanring-kanwang rapkou chutmakne leiyeirou, kheenserou nai kning heiri yanungei trungpi kya. Heiya Keiri nakou pulni leimakarou. 8#Jn 19.40. Ane aiyei manicha touwurla, ani muiknam shirekhi teipiwurla. 9Keine nanungei chimne shunrou, Lhangai Pao-laaya tlaipangra shunthutpina bi kantangrou napuiya heiyei toukur lhou heine aya ningthutyerrou.”

Judas'ne Jesu'ya Horkur

(Mt 26.14-16; Lk 22.3-6)

10 # Mt 26.14-16; Lk 22.3-6. Ruishik chiple khni tlakrei Judas Iscariot'ne Suipipu Upa rapnung Jesu'ya yornanungei chakur. 11Heirou yane aiyei shunya mayekbi haraowura, heitoubi anungei tuy piroume toubi kantomrilwurla. Asitoubi Judas'ne Jesu'ya yanung yornanungei trum tlakcha thiphakur.

Jesu'ne Ruishik rapkou Ralthutna Tlaini Karnga

(Mt 26.17-28; Lk 22.7-14; Jn 13.21-30)

12 # Mt 26.17-19; Lk 22.7-13. Heirou phri yaomak mumtol shainei Puluk'khang marngeinei tlainirou, Ralthutpinei karnganei yaokhi hatyei kaallou Aiyei Ruishik rapne Anungei shun, “Nangne kaya koulhangra chabi Ralthutpinei marngeiyei chanung-mainungei marshikyernileiyo?” 13Heirou Jesu'ne Ruishik napung-khniya shunmatubi malhetkur, “Nane yultlaira wachanga, heirou yuikhangcha urbi napawa khatne naya lourorillou, heitoubi nane aiyei hilla heichanthunglak, 14heitoubi aiyei wachangna cheemra nakhi polhakbi cheempu heinung shunlak, ‘Upawane yunlei: Keine Ruishik rapkou Ralthutpinei marngeinei chamainanungei biri koutamrou marshikleiyo?’ 15Heirou cheempu heine kanungei marshikbi klei shangkai dourei bomtho khat nanungei loushunmutpirou.” 16Ruishik rapne wawurbi Jesuei shunmatunakne namyer wamuphakur; heitoubi bi heirou yane Ralthutpinei marngeina chamainanungei marshikkur.

17 # Mt 26.20-25; Lk 22.14,21-23; Jn 13.21-30; Laa 41.9. Rawainung Jesu'ne Ruishik chiple khnikou hungchangkur. 18Yane chamaiyeinung Jesu'ne yanungei kyun, “Keine nanungei shunlei touri nai tlakrei Keile chamalkna thimi heiwane Keiya yorrou waiyoulei.” 19Ruishik rapne lhawai lahwurbi Jesu'nung khatdei thangrou khatne heikngai, “Keineko?” 20Jesu'ne yanung shun, “Chiple khniyei tlakrei Keikou kaikam khatrei mumtol khrupmalkna thimi heiwari! 21Thimiyei Chanapawane khyingei Pu'tloura kyunnakne hirou; heiya Thimiyei Chanapawaya yorkur thimi heinungeiri kounakei klah hoirou! A heiwari loupuk'khoumaka'nungri kounakchang anungei lhangairou!”

Puei Luk'khaang

(Mt 26.26-30; Lk 22.14-20; 1 Co 11.23-25)

22 # Mt 26.26-29; Lk 22.17-19; 1 Co 11.23-26. #Mk 6.41; 8.6; Lk 24.30. Heirou yane chamaiyeinung Jesu'ne mumtol khat loubine Dunpuya mathangbi, lhemchaalkur, heitoubi Ruishik rapnung yerpikur. Heirou Ane yanung shun, “Louloulak, awari Keiyei sharung.” 23#1 Co 10.16. Heitoubi Ane daarkep heikhi shinbine mathangbi yanungei malanpikur, heitoubi ya nammane mongkur. 24#Hoy 24.8; Heb 9.20. Jesu'ne yanung shun, “Awari nammanungei dapikur Keiyei Kantomrilnei hee.” 25Keine nanungei chimne shunlei, “Dunpuei Krungramra Keine darkha yui ranya mongnei tlaini hungbongyen Keiri hanui kallengne darkha yui mongmalnamarou.”

26 # Mt 26.30-35; Lk 22.30,33-34. Heirou yane laa khat shabi Olive Lhungdoura kakakur.

Peter'ne Jesu'ya Yamakne Hornei Jesu'ne Shunthut

(Mt 26.31-34; Lk 22.31-34; Jn 13.36-38)

27 # Zec 13.7; Jn 16.32. Jesu'ne yanung shun, “Keiya lakurkhoubi na namma trukurheirou, heiyei ngamri asitoubi mayebine leilei, ‘Dunpune yaosil puya hatdeirou heirou yaorul heiri chekkurheirou.’ 28#Mk 16.7. Heirou Keine ringthutkur hillou, nai maibongra Galilee'ra loucharou.” 29Peter'ne Anungei loumallang, “Nammani trukurbikhi keiri trukmakrou!” 30#Mk 14.66-72; Jn 13.36-38; 18.17-18,25-27. Heirou Jesu'ne Peter'nung shun, “Keine neinungei chimne yunlei, angtu masa waapani khnuirek khungbongnung nangniri Keiya khyumbuirek yapimakne horheirou.” 31Heirou Peter'ne krakni loumallang, “Keiri Nangkou himalnabikhi Neiyari keine yamakurnei tlouri tekkhi yunkhoumakrou!” Heirou Ruishik deirap nammanekhi heinakrim kyun.

Jesu'ne Gethsemane'ra Shuncha

(Mt 26.36-46; Lk 22.39-46)

32 # Mt 26.36-46; Lk 22.40-46; Heb 5.7-8. Yane Gethsemane toubi ung bi heirou wa'tlungkur, heirouri Jesu'ne Aiyei ruishik rapnung shun, “Keine shunchayeinung nane bi arou ombi louleiya.” 33Heitoubi Ane Peter, James heirou John'ya ruilouheikur. Ari ukningra kalthi lhawai lahkur, 34#Jn 12.27. Ane yanungei shun, “Keiri beimakne lhawai lahwura, nane bi arou mit'ringne leibi loungaaklak.” 35Ane beicha tlatni pochutbi thleira shikhuplhakbi, “Yawanungri anaksi klahyei kheen awaya ralthutdurpilaklo,” toubi shunchakur. 36#Rom 8.15; Gal 4.6; Mk 10.38; Jn 18.11. Heirou Ane kyun, “Abba, Pawa, lhou namyerwa heiri Neinungei manichi, klahyei daarkok awaya Keidourei louthutdurpilaklo. Heiya hoiyanungkhi Keiyei kning hoimakne Neiyei kning hoilaksu.” 37Ane yenkallengeinung ruishik napung-khyum heiri ipbine louklei hungmukur. Heirou Ane Peter'nung shun, “Simon, nari ipkurako? Nane kheen lepchakhi ipmakne douchangmakurako?” 38#Mt 6.13; Lk 11.4. Heitoubi Ane yanungei shunthu, “Nane kanthrambi malhimnara damaknungei shunchalak, naiyei lhawaineri kraklei heiya naiyei sharungri shullei.” 39Ane hanuikhi pochutbine haallei nakrimne buchathu. 40Ane yenkallengeinung ruishik rapne hanuikhi ipbine louleithuya yongmukur; ngamri yaiyei mitlung rapri beimakne ritdura, miengchangmakura. Heirouri yane Anungei kouya mallangserouwo touri bi naimakura. 41Ane khyumbui tlungne yenkallengeinung yanung shun, “Nari asilumpha ipleihuiko? Rowarou! Kheen hungtlungura! Thilak, Thimiyei Chanapawaya asinung borh thimi rapbei hutra pilhakrou waiyouwura. 42Kanthoulaka, shaallakase, thilak, Keiya pithutkur thimiri wathukkura!”

Jesu'ya Kman

(Mt 26.47-56; Lk 22.47-53; Jn 18.3-18)

43 # Mt 26.47-56; Lk 22.47-53; Jn 18.2-11. Jesu'ne tlou yunbi louleiyeinung, Suipipu upawale, tloulamei uparap, heirou yama upa rapne ruishik chiple khniyei tlakrei Judas'ya, thimi beimak chungne shonle-cheile shinyerbi ale kalhone heimalhetkur heiwari wa'tlungura. 44Pithutkur thimi heiwane yanungei munanung khat shunmaturilkur, “Naiyei mankni thimi heiwari keine machuprou kyou heiwarisono, Aya manbi mukheine silchabi ruilouheilak.” 45Judas'ne wa'tlungle tallengne Jesu'ya, “Upawa#14.45: nimanung, Rabbi.!” toubine wa'kyun. Heisitoubi ani Jesu'ya rkolbi maibungra machupkur. 46Heirou yane Jesu'ya manbi phonkur. 47Heirou yai pongra mayungbi louklei khatne shon phuithutbi Suipipu upawaei shok khatdei khnabil pangkhat shatsundakur. 48Heirou Jesu'ne yanung loushun, “Mucha thimiya manrou kyou'nakne nane shonle-cheile kyaone Keiya manrou wakurako? 49#Lk 19.47; Jn 18.19-21. Tlainiser Keine nanungei Pukhrumna Cheemra marnopiyei kalnungri nane Keiya manmaklei. Heiya Khying Pu'tloura mayebi klei heiwaya tlungyernanungei toukura.” 50Heitounei ruishikrap nammane Aya lakurkhoubine trukurchiya.

51Heirou kartlang douwa khatne phaikhringei phiyatom upbine Jesuei hilra heichanthungkur. Heirou yane aya manrou waiyoukur, 52heitounei ani aiyei phi'upya lakurkhoubi hakthilni loutrukkur.

Jesu'ne Upa Rapbei Maibongra Myungkur

(Mt 26.57-68; Lk 22.54-62,63-71; Jn 18.12-14,19-27)

53 # Mt 26.57-68; Lk 22.54-55,63-71; Jn 18.12-24. Jesu'ya Suipipu raple, yama uparap heirou tloulamei upa rapne kartilbi leina Suipipu upawaei cheemra Jesu'ya yenruilhakur. 54Heirou Peter'ne Jesuei hilra tlatni heichanthungbi Suipipu upawaei yuntlangmaira wa'tlungkur. Heitoubi karngeibi klei raple mei lumbine heiklei. 55Suipipu raple, heirou upa rapne kartilbi klei nammane Jesu'ya koutoubi hatdurserouwo toubine Aiyei klalya raphakur, heisi toubikhi yane koukhatkhi klal phachangmak. 56Thimi kounakne Jesuei doura nimak-nimakei klal kounakya khingbangbine kyun, heiya yai kyunrap heiri khattomkhi karchurilmakur. 57Thimi thane kanthoubi Jesuei doura kartlikril, mandallei tlou kounakya yunbangbi, 58#Mk 13.2; 15.29; Pao 6.14; Jn 2.19. “ ‘Hutni sabangkur Pukhrumna cheemtang heiwaya threwurbi tlaini khyumnirou hut yaomakne cheem khat sabangrou’ toubi kyun kani mayekthungkur,” toubine mral theibangpikur. 59Anakchung yunbikhi yai yunkril heiwari khatle-khat tekkhi karchurilmakur. 60Heirou Suipipu upawane kanthoubi Jesu'nung kngai, “Neidoura klal heinakchung khingbangkurya Nangne tekkhi mallangmakrouko?” 61Jesu'ne koukhatkhi mallangmakne mulcha louklei. Heirou hanuikhi Suipipu upawane kngai, “Likarsui Dunpuei Chanapawa Christa touri Nangko?” 62#Dan 7.13; Mk 9.1; 13.26. Heirouri, “Keime,” toubi Jesu'ne loumallang, heirou “Thimiyei Chanapawane Dunpuei thya lhangra ombi, heirou Ane ramei doura kyong nane loumueirou!” 63#Pao 14.14; Msh 14.6. Heitounei Suipipu upa heine aiyei shambya threlwurbi kyun, “Kane asitoubi ngaithinarou aya duine tlou lounungei makura. 64#Lev 24.16. Ngamri Dunpuya duine Ane yunborh heiri nane mayekla. Nai kningri kouwei?” Heisitoubi yane Aya klalme, heineri hatkur kyame toubine darilkur.

65Heitoubi thimi thane Jesu'ya mtilkhi mthukphaangkur, heirou Aiyei mitlungkhi yeetkhallurpibi umle-phitlekhi toukur, heirou yane kyun, “Neiya hei'umkuri huwo, loumuleiya, katyunthi?” Heitoubi sipai rapne aya maibira phitdurbi taanglhakloukur.

Peter'ne Jesu'ya Yamakne Horkur

(Mt 26.69-75; Lk 22.56-62; Jn 18.15-18,25-27)

66 # Mt 26.69-75; Lk 22.56-62; Jn 18.16-18,25-27; Mk 14.30. Peter'ne Suipipu upawaei yuntlangmaibil chanthungeinung wattouwa nangaka khatne hungkarsilbi, 67Peter'ne mei lumbi omyeinung, aya rie-thimanrebi kyun, “Nangkhi Nazareth'rei Jesukou klei thimi khat.” 68Heiya ani yamakkur. Heirou ani loumallang, “Neiyei kyun heiri keiri koukhi mumak, kouya kyun keiri phabkhi damaklei.” Heisi yunkhoubi ane daangra wathukkur, heirouri tallengne waapa heikhi katkhungkur. 69Heirou wattouwa nangaka heiwine Peter'ne mayungbi klei mubi pongrei thimi rapnung heishun, “Akhi yai tlakrei khatme.” 70Heiroukhi Peter'ne hanuikhi yathumakura. Lepcha leibi pongra mayungbi heiklei rapne Peterya hanuikhi heikyun, “Shuimakne nangkhi yai tlakrei napungkhat louhoirou, koungameiyo toulanungri nangkhi Galilee'rei thimime.” 71Heirou Peter'ne loumallangkur, “Keine chimya kantombine yunlei: Dunpune keiya mrim-nangyerlaksu! Nai kyun thimi heiri kei mumak!” 72Heihakrou waapa heine khnui tlungne katkhungkur, heirouri Peter'ne Jesuei shunkhou heiwaya louningthutkur, “waapani khnui tlungne khungbongnung nangni Keiya khyumbuirek ‘mumakme’ toubi horbine yunrou.” Heirou Peter'ne heiwaya mayekthutdurbi malung douni chapkur.

Currently Selected:

MARK 14: MARIBSI

Highlight

Copy