MARK 13
13
Jesu'ne Pukhrumna Cheem Deekrou Ngammei Kyun
(Mt 24.1-2; Lk 21.5-6)
1 #
Mt 24; Lk 21.5-36. Jesu'ne Pukhrumna cheemrei wathukyeinung Aiyei ruishik khatne shun, “Thilak, Upawa! Thlung raple heirou sabaangkur cheemrap heiri kounakchang ngakna!”
2 #
Lk 19.43-44; Mk 14.58; 15.29; Jn 2.19; Pao 6.14. Heirou Jesu'ne anung loumallangkur, “Sabaangkur cheemtangrap namma heiri nangni muleinu? Arou klei thlung namma heiso khatchatomkhi leithungmakne chimsundaeirou.”
Klah-knang Heirou Marhot
(Mt 24.3-14; Lk 21.7-19)
3 #
Mk 5.37; 9.2. Jesu'ne Olive lhungdoura Pukhrumna cheem lhangra mai kallekbi omyeinung Peter, James, John heirou Andrew ya phaline munne hungkngai, 4#Lk 17.20. “Kanungei yunpilaklo, lhou ari koukalnung thukrouwo? Heirou namma heiri thukrou younung koutoubi hoirouwo?” 5Heirou Jesu'ne yanung shun, “Thimi hukhatnekhi naya lehsoni ruimaknungei mukheine heirou naiukning karbilne leiyalo! 6#Jn 8.24; 1 Jn 2.18. Thimi kounakne ‘Keiri Jesume’ toubine Keiyei minra yunbine hungthukeirou, heitoubi thimi kounakya lehsoyerrou. 7Heitoubi nane tlanarei-naknarei raalpao mayekbinekhi nai ukning plangurmak, heinaksi paonilri hungthukeirou, heisiyanungkhi heiwane tlaipang luina kheen hungtlungame touri nimakhui. 8Krungram khatle krungram khat, heirou Krung khatle krung khat raal kardourilheirou, heitoubi bi kantangrou linglang khngaakrou, chaktangkhi thukrou. Namma heiri napuiyaei naopuknei manshan kna heinakrimkhui.
9 #
Mt 10.17-22. “Heirou naitam ukning karbilne malungdamni leiyalo. Naya manbi pichar-bira urheirou, naya Pukhrumna cheemra urlhakbi um-phitkhi touheirou; Keinung'tlim lhangai-paolaa shunthutrou nane Krung rapbei heirou ram kngaak upa rapbei maibongra mayungeirou. 10Heirou kluiyei kheen hungbongnung lhangai paolaa awaya thimi kantangnung mayekyerrou. 11#Jn 14.26; 16.7-11; Lk 12.11-12. Heirou naya manbine pichar bira uryeinung nane koutoubi yunserou toubi uksamak, kheen hungeinung nanungei pikur tlouya yunlak. Heirou nai yunkur tlou heiri naikyun nimak, heiya Lhawai Khyingei kyun. 12Heirou teinao khatne teinao khatya, pani chanapawaya hatnanungei pithutdurheirou. Heirou chanao rapne pui-paya daiphabi yaya hatyerheirou. 13#Jn 15.21. Keinung'tlim thimi nammane naya machinheirou. Heitoubi kluibil kanthram thimi heiyari kalpirou.
Kalthi Chi'knaei Thuithi
(Mt 24.15-28; Lk 21.20-24)
14 #
Dan 9.27; 11.31; 12.11. “Beimak machinknaei chi'kna khatne mayungmaknung bira mayungbi klei nane murou.” (Aya pakur thimine phab dalaksu), “Heitoubi Judeara klei rapne lhungdoura trukbangurasu. 15Cheembungrei thimi rapne ai'ai putchei markumrou yongchummakneasu. Heitoubi cheemwaira polhakbi koukhatkhi urheimakneasu. 16Heirou lourei klei thimi rapne aiyei phi'up lounungei cheemra yenkallengmakneasu. 17#Lk 23.29. Nao-urbine msha ritbi klei napuiyarap heirou nao pombi klei napuiya rapri kheen heirou kounakchang lahnarou! 18Anaksi lhou ari phalbinung thukmaknanung Dunpunung buchalak. 19Tlainirap heirou thukrou kyou klah-knang heinakri Dunpune tlaipang sheemkanthoutirei youbine angtu ramphani tekkhi thukmakhui, heirou hanui kallengnekhi thukkhoumarou. 20Heirou Dunpune tlainirap heiwaya dansundaeirou, hei nimanungri hukhatnekhi ringchangmakrou. Heiya Aiyei kalpikur thimi rapnung'tlimri Ane tlaini heiri dansundawurla.”
21Heirou hukhatne neinungei, “Thilak! Christari ara leilei, nimanung, thilak Ane heirou leilei, toubi yunyeinung nangni malungampimak. 22#Mt 7.15; Jn 4.48. Heirou Christame heirou thimkhuime toubi toukarsa thimirap hungrou, heirou maniyanungri khalthutkur rapyakhi lehni ruichingnanungei toumani lhou heirou kngakei lhou kounakya mutrou. 23Heiya nane mukheine leiyalo! Keine nanungei lamkrine namyerwa heiya muyerwurla.”
Thimiyei Chanapawaei Kyong
(Mt 24.29-31; Lk 21.25-28)
24“Klah-knangei tlainirap aei hillou kinni katmehrou, tanglakhi warmakrou, 25Nungthourei sorwani yendawurou, heitoubi nungthourei klei namyerwa heiya mantrangne khngaakrou. 26#Mk 8.38; Mt 10.23; Dan 7.13. Heirou Thimiyei Chanapawa heine Aiyei mantrangle thang'alkou kalhonbi ramei doura kyong loumurou. 27Heirou Ane Aiyei Thangring rapya yenyilsundabi, Dunpuei khalthutbi kalpikur rapya tlaipang chithek-thak'daak karyouni raphabi yongmarkumheirou.”
Khyudhei Trungei Mu'kna
(Mt 24.32-35; Lk 21.29-33)
28“Khyudhei trung heirouwei mu'kna khat hoiyasu! Aei banra nabo katshunnanungri manthral hungurame toubi nane loumulak. 29Heinakrimne lhou namma thukkur nane muyeinung Thimiyei Chanapawane yongrou nakurame toubi loumulaka. 30Mulaklo touri asinung ringbi klei thimi namma hibongnung lhou namma a thukchirou. 31#Mt 5.18; Lk 16.17. Thangwan'le tlaipangpalri maangheirou heiya Keiyei tloulhang rapri ker khatkhi maangmakrou.”
Hukhatnekhi Tlaini heiri Mumak
(Mt 24.36-44)
32 #
Pao 1.7. “Pawa nimakne, Chanapawa heinekhi, Thangring rapnekhi kheen heiri kouwawo touri mumaklei. 33#Eph 6.18; Col 4.2. Naiyei ukning karbilne muheiyalo, kanthrambi doulak, kouweiyo toulanungri nane kheen heiwari kouwawo touri mumaklei. 34#Mt 25.14. Thimi khatne aiyei cheem horkhoubi ramdeira chawurbi aiyei watlhou shilla rapnung yaiyai churnung lhou pikhoubi, heitoubi cheem kngaak thimiyakhi kanthrammalo toubi shunkhou heinakrimlei. 35#Lk 12.35-40. Heineri nai ukning muheiyalo, ngamri Cheempune rawainung, nimanung yantrimnung, nimanung nungwarwainung, nimanung nunghangnung hungrouko nane mumak. 36Heirou Ane haophut yonganungri nane ipbi kleiya chanphakur kya. 37Heirou Keine nanungei kyun ari namnungkhi kyun; nane mukheine loukarngeilak!”
Currently Selected:
MARK 13: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
