MARK 10
10
Nu Karkhainei Ngamrou Jesu'ne Shunmatupi
(Mt 19.1-2; Lk 16.18)
1 #
Mt 19.1-9. #Lk 9.51; Jn 10.40; 11.7. Jesu'ne bi'heiya lakurkhoubi Judea ramra wakur heitoubi Jordan kung raalkur. Hanuikhi bi heirou thimi beimak chungne kartilwurthu, heirou Ane haalleinakne shunpithu.
2Heirou lhangai karsarap thane hungbi Jesu'ya koutoubi manserou toubi wairangkhou. Yane Jesu'nung ngaithikur, “Thimi khatne aiyei nu karkhainei lhou heiri kaiyei Tloulamni kyako?”
3Jesu'ne yanung loukngai khoine loumallangkur, “Kounakei tloulamya Moses'ne nanungei shunpikhou?”
4 #
Khn 24.1-4. Heirou yai loumallangri, “Moses'yei tloulamneri napawa khatne yarilnei tlou myerilbi aiyei nuya karkhaikur kyane toubi kyun.”
5Heitounei Jesu'ne yanung kyun, “Nai ukning kallachaknei ngamrou Moses'ne tloulam heiya mayekhoupi. 6#Kan 1.27; 5.2. Heiyanungkhi Dunpuei Lailikra kyunnakne tlaipang sheemyeinung Dunpune napawa khatle napuiya khat sheemkur. 7#Kan 2.24. Heini ngam hoibi napawa khatne aiyei pui-paya horkhoubine aiyei nukou leikalhonrou, 8heirou ya napung-khni heine khattom hoirou. Heineri ya napung-khni heiri kouniroukhi khintam hoimakrou, heiya khattom hoirou! 9Heine ngam hoibine Dunpuei thikkartilkur napung-khni heiri hunekhi toukarkhaikur hoimakneyasu.”
10Heirou yane cheemra kallengeinung ruishik rapne tloulam heiyei ngamrou Jesu'nung kngai, 11#Mt 5.32; Lk 16.18; 1 Co 7.10-11; Rom 7.2-3. heirou Jesu'ne yanung shun, “Thimi khatne aiyei nu karkhaiwurbi dei napuiya khatya loulanungri minu shuknei lhou touwurla. 12Heinakrimne napuiya khatne aishal lakhoubine dei napawa khatkou shal dunlanungri mishal knam lhou touwurla.”
Douwa Rapnung Jesu'ne Phorpi
(Mt 19.13-15; Lk 13.15-17)
13 #
Mt 19.13-15; 18.3; Lk 18.15-17. Heirou thimi thane douwa rapnung phor piyernanungei Jesu'nung heiruilhakur, heiya Aiyei ruishik rapne yaya wachangyermakne kalthi loushunkur. 14Heitounei Jesu'ne heiwaya mubi malungkhabi Aiyei ruishik rapya shun, “Douwarul heiri Keinungei wachangasu, louthranpimak, kouweiyo toulanungri Dunpuei Krungram heiri yanaksiyei.” 15Keine nanung chimne shunlei, “Hu kounakne Dunpuei Krungram heiri douwa khatnakne loulhakmanungri bi heirou changkhoumakrou.” 16#Mk 9.36. Heitoubi Ane douwa rapya pomloubi yaidoura Aiyei hut khoubi phor shampikur.
Dun Napawa Khat
(Mt 19.16-30; Lk 18.18-30)
17 #
Mt 19.16-30; Lk 18.18-30. #Lk 10.25; Mk 1.40. Heirou Jesu'ne hanuikhi pothutyeinung thimi khatne chanphabi khuklu kanthrunbi buchakur, “Lhangai Upawa, keine klui naimak khring chaanya phananungei koulhou touserouwo?”
18Heirou Jesu'ne anung loumallang, “Nangne kounungei Keiya lhangai toubi ungkurawo? Dunpu nimakne dei hukhatkhi lhangai makme. 19#Hoy 20.12-16; Khn 5.16-20. Nangkhi tloulamrap heiwaya kmu: ‘thimi hatmak; minu-micha thirmak, muchamak; huyakhi klalni theiborhmak; minam tangmak; neipui-neipaya rikrai khrumlak.’ ”
20Heirou ani shun, “Marnopi Upawa, keiri douwei waiyoubi tloulamrap namyerwa heiya katngaakheime.”
21 #
Mt 6.20; Lk 12.33; Pao 2.45; 4.34-35. Heirou Jesu'ne aya thibi malungshini shun, “Neinungei kwat khat leileihui; nangni kallengurbi neiyei klei namma yormthaiwurbi, tui heiri kanring rapnung yerpiwurlak, heitoulanungri nangri thangmunra dun thimi khat hoirou, heitoubi Keihilra chanthunglaklo.” 22Heirou ani tlou heiya mayeknarou beimakne lahwurbi marhuichum cheemra kallengkur, koungameiyo toulanungri a heiri beimakne dun napawa.
23Jesu'ne Aiyei ruishik rapya karhilne thibi shun, “Dun thimi rapne Dunpuei Krungramra changrouri heisibil klu!” 24Heirou Ruishik rapne Aiyei tlouya mayekbi ngakurra, Jesu'ne yunthu, “Keiyei douwarap, Dunpuei Krung ramra changrou kyou heiri asibil lulei!” 25“Dun thimi khatne Dunpuei Krung ramra changrouri Utni phantrim khnarei kalleikurne dui klai”. 26Heirou Ruishik rapne beimak ngakurbi yaitam yunkril, “Heiyanungri hune kalpi pharouwo?”
27Jesu'ne yaya khminni thibi kyun, “Tlaipang thiminungri hoimanemakrou lhou, heiya Dunpunungri lhou namma hoimaniyerrou.” 28Heirou Peter'ne katyunthut, “Thilak, kani namyerwa lakurkhoubi Neiyei hilla chanthungkura.”
29Jesu'ne yanung shun, “Moi, Keine nanungei shunpilei touri, hukhatne cheem-kei, charra-teinaorap, pui-pa, chanao rapya, heitoubi loubom rapya Keinung'tlim heirou lhangai paolaanung'tlim lakurkhou thimi heine, 30#Mt 6.33. angtuei chaan arou duine pha hoirou, ani asiyei klah-knang doukanthram, heirou cheem-kei, teinaorap, charyorrap, douwarap, heirou loubomrap heiri siruk macha duine pharou, heirou hungrou kyou tlaipangra klui naimak khringei chaan phaheirou. 31#Mt 20.16; Lk 13.30. Heitoubikhi asiyei maibong lamkri heine hiltothungrou heirou asiyei hilto heine maibong lamrirou.”
Jesu'ne Aiyei Hirouyounei Ngamrou Khyumbui Tlungne Kyun
(Mt 20.17-20; Lk 18.31-34)
32 #
Mt 20.17-19; Lk 18.31-34. Jesule Aiyei ruishik rapne Jerusalemra nungkhatnuiyei lamtla chayeinung, Jesu'ne yai maibongra lamkrine louchakur, heirou deine ngakura, heirou thimi deineri chikur. Heirou hanuikhi Jesu'ne Aiyei Ruishik chiple khniya ruilouheibi Anungei thukrou kyou lhou nammaya yunthutpikur. 33#Mk 8.31; 9.12; 9.33. “Louningpilak,” Jesu'ne yanung shun, “Louninglak, kane chabi klei bi Jerusalem heirou Thimiyei Chanapawaya suipipu Upa rapbei heirou tloulam marnopi upa rapbei hutra pilhakrou waiyoulei. Yane Aya mandaihatkur kyame toubi deinungei pithutrou! 34#Mk 14.65; 15.19,26-32. Yane Aya laonarou, mtil thukphangurou, umle-phitle toubine hatdurou, heirou tlaini khyumniyei hillou Ane ringthutthurou.”
James'le John Yakhuntani Jesuei Bira Shuncha
(Mt 20.20-28)
35 #
Mt 20.20-28. Heirou Zebedee'yei chawarap- James'le John'ne Jesu'nung hungbi buchakur, “Upawa, kani Neiya kanungei lhoukhat touyernilei.”
36Jesu'ne yanung kouwo toubi loukngai.
37 #
Mt 19.28; Lk 22.30. Heirou yakhu teinaoni loumallangkur, “Neiyei Krung ramra nungkngaini omyeinung kakhu teinaoyakhi khatne thya lhangra heirou khatyane thyoi lhangra omyerpilaklo.”
38 #
Lk 12.50; Jn 18.11. Jesu'ne yanung loushun, “Nane naiyei buchakur heiri kouwo touri mumaklei. Keiyei mongrou kyou klah-knangei daarkok heiwari nane mongchangrouko? Keiyei yui lupnara nane lupchangrouko?”
39 #
Pao 12.2; Kre 1.9. “Kane manirou” toubi yane Jesu'nung loumallang. Heirou Jesu'ne yanung shun, “Keiyei mongna daarkok heiri nakhi mongkya, Keiyei yui lupnara nakhi luprou. 40Heisiya hoiyanungkhi Keiyei thya lhangra heirou thyoi lhangra huhuya omyerrouwo tou heiri Keiyei lhou nimakura, heiya marshikpikur thimi rapnungtom bi heiwaya Dunpune pirou.”
41Heirou Ruishik chiptamni mayekbi James'le John'ya malungkhapikur. 42#Lk 22.25-27. Heitoubi Jesu'ne ya nammaya ungkartilbi shun, “Dei limyei ruichingpi purap heirou bomtang rapri yaidoura mantrang kleime touri nane kmu. 43#Mk 9.35. Heirou nanungri heinak nimak. Na hukounak khatne tang thimi hoiniyanungri a heine mideiyei wattouwa hoirou da; 44heirou nai tlakrei hukounak khatne lamkri hoiniyanungri, ani nammaei wattouwa hoirou da. 45#1 Tm 2.5-6. Heirou Thimiyei Chanapawa heine Aya watlhou touyernanung kyong nimak; heiya Ane watlhou tounungei, heirou thimi nammaya lhukthutnanungei Aiyei lhawai malhetpirou kyong.”
Jesu'ne Bartimaeus'yei Mitdeo Lhangaikyer
(Mt 20.29-34; Lk 18.35-43)
46 #
Mt 20.29-34; Lk 18.35-43; Mk 8.22-26. Yane Jericho'ra hungeinung Jesu'ne Aiyei ruishik raple thimi nammale pothutyeinung Timaeus'yei chanapawa, aiyei minri Bartimaeus toubi ung thraicha-thraikmai khatne mitdeoni lamruira ombine louklei. 47#Mt 9.27. Heirou ani Nazerethyei Jesume toubi mayeknarou, ani ungraochane loukyun, “David'yei Chanapawa Jesu! Keiya bei kringpilo!”
48Thimi kounakne aya ungrao'maknung loushamkur, heisibikhi ani, “Davidyei Chanapawa, keiya kringpilo” toubi kat'ungraokur.
49Heitounei Ane bi heirou mayungurbi shun, “Aya ara hei'unglhaklo,” heitounei yane mitdeo heiwaya unglhakbi shun, “Neiyei malungkhrah hoilaka, kanthouwa, Ane neiya hei'unglei.”
50Heirou ani aiyei phi'up khingurkhoubi chunchani Jesu'nung hungchangkur. 51“Keine neinungei kou touyernileiyo?” toubi Jesu'ne anung loukngai. Heitounei mitdeo napawa heine Jesu'nung loukyun, “Upawa, keiyei mitdeo awaya raiyerknime.”
52 #
Mt 9.22; Mk 5.34; Lk 7.50; 8.48; 17.19. Jesu'ne anung shun, “Shaallaka, neiyei uklumne malungam heiwane neiyei mitdeoya raiyerwurla.”
Heirou tallengne napawa heiyei mitdeokhou heiri warkur, heitoubi ani Jesuei hil chanthungkur.
Currently Selected:
MARK 10: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
