MARK 9

1 # Mk 13.30; Mt 10.23; Lk 22.18. Heirou Ane yanung shun, “Keine nanung chimne shunlei, arouwei klei thari Dunpuei Krungram mantrangkou kyong mubongyen tekkhi himakarou.”

Jesuei Shakrung Holkur

(Mt 17.1-13; Lk 9.28-36)

2 # Mt 17.1-8; Lk 9.28-36. #Mk 5.37; 13.3. Tlaini thrukniyei hillou Jesu'ne Peter, James heirou John ya napung khyumya ruiloubine lhungchou khatra yaitamtom kakabi leikur. Yane heisi thiyeinung Jesuei shakrung holkur, 3#Mt 28.3. Aiyei phirul heiri ngouwane tou phiya duine yeryerni ngoukur. 4Ruishik napung khyum heine Elijah'le Moses'ne Jesukou tlou kallangkril kmu. 5Peter'ne Jesu'nung shun, “Upawa, kane bi arou kleiri beimakne lhangaiyura, heineri kani khrumnabam matru khyumtam sabaangase, khatne Neinungei, khatne Moses'nungei, heirou khatne Elijah'nungei hoiyerrase.” 6Heirou yane beimakne chiwurbi Ane koutoubi louyunleiyo toubi bibal naimakur. 7#2 Pt 1.17-18; Mt 3.17; Jn 12.28-29. Heirou ramei hungbine yaidoura hungmalepi, heirou houkhatne ramei hangrei yukpao, “Ari Keiyei kringkna Chanapawame, Aiyei shunya ninglaklo!” 8Yane heisi heithiyeinung Jesu nimakne dei huyakhi mumakura.

9 # Mt 17.9-13; Lk 9.36. #Mk 8.30; 5.43; 7.36. Yane lhungdourei yongchumyeinung Jesu'ne yanung kanthramne, “Thimiyei Chanapawane hiwurnarei ringthutbongyen naiyei mulhakur heiso hukhatnungkhi shunthutmakno.”

10Yane Aiyei shunya ninglhakbi, yaitam khatle-khat ngaikril, “Hiwurnarei katringthutrou tou ari kouya yunknawo?” 11#Mt 11.14. Heirou yane Jesu'nung kngai, “Tloulam Upa rapbei kyunri Elijahni lamkrine yongroume touri koutounei?”

12 # Mk 8.31; 9.31; 10.33. Aiyei loukyunri, “Elijahni put nammaya loumarshiknanung tanghakne lamkrine kyong, heiya Thimiyei Chanapawane kounakbil klah-knang dourou heirou yapimakrou tounei ngamrou koutoubi mayepikhouwo touri Keine nanungei 13shunpirou, ‘Elijah heiri yongura, heirou aiyei ngamrou mayebi khounakne yane Aya yaiyei kning hilthungne toupiwurkhoula.’ ”

Jesu'ne Hyingmak Lhawai Changkur Douwa Khatya Raikyer

(Mt 17.14-21; Lk 9.37-43)

14 # Mt 17.14-18; Lk 9.37-43. Heirou yane Ruishik deiyei leinara hungei kheenrou thimi beimak chungne kartilbi tloulamyei upa rapkou yeetrilbi loukleiya hungkarthangkur. 15Heirou thimi rapne Jesu'ya mubi beimakne ngakura, heirou yane Aya hakraone louropikur. 16Heirou Jesu'ne Ruishik rapnung kngai, “Nane koungamrou yale yeetkrillo?” 17Heirou yaihangrei napawa khatne loukyun, “Upawa, keiyei chanapawa heiri hyingmak lhawaini mareknanei tloukhi yunchangmak, 18heirou hyingmak lhawai heine anungei changbi marhotyeinungri thleira kanellhakbi, aiyei murra chimphunkhi kathukbi heitoubi aiyei hakhi chikmardebi kantumlhakur. Heitounei keine aya neiyei Ruishik rapnung lhangaimak lhawaiya hulthutpinanung heilhakbi buchanarou, yane manimakurnei ngammeime.”

19Heitounei Jesu'ne yanung shun, “Nari tekkhi uklumbi malungam thimirap nimakleintu! Keine nale kounak tlani leikalhonrilo touneiyo? Heitoubi Keine nakou kounak tlani dourilo touneiyo? Douwa heiri Keinungei yenlhaklak!” 20Heisitoubi yane douwa heiya Jesu'nungei yenlhakpikur.

Hyingmak lhawai heine Jesu'ya mule tallengne douwa heiya thiktluilhakur, heitoubi aiyei murpalra phunkhi thukbi thleira kalletkur. 21Jesu'ne douwa heiyei pawanung kngai, “Asitoubi leikurri kounak tlawurawo?”

Heirou ani loumallang, “Douwei puktirrei kyoume. 22Hyingmak lhawaini douwa heiya hatnanung meilungrakhi, heirou yuihangrakhi karyomni khinglhakur. Nangne yapiyanungri kaya kringpibi bei trungpilaklo!”

23 # Mt 17.20; Lk 17.6; Mk 11.22-24. “Moi,” Jesu'ne loumallang, “Nangne malungkngam leiyanungri heinak thiminung namyer manichi.”

24Aiyei pawani tallengne ungraobi kyun, “Keiri uklummura, duine malungam leinanungei keiya trungpilaklo.”

25Jesu'ne thimi rapbei yentruklhak loumubi lhangaimak lhawainung Ane shun, “Khnasit, heirou tlou thukmak lhawai, Keine neinung chay pilei, douwa heirouwei wathukkura, anungei hanui kallenglhakmak!”

26Lhangaimak lhawai heine kantrumchabi douwa heiya nuideek'khoubi thukkura. Douwa heiri hikurnakura, heirou nammane kyun, “Douwa heiri hiyura!” 27Heirou Jesu'ne douwa heiya hutra churbine taangkanthoupikur.

28Jesu'ne cheemwaira wachangeinung Aiyei ruishik rapne mubi kngai, “Koutounei ngammei kani hyingmak lhawai heiya hulthutkur manimako?”

29Heirou Ane yanung loushun, “Dunpunung khrumchabi bucha nimakne anakya koukhatnekhi hulthut manimakrou.”

Jesu'ne Hanuikhi Aiyei Hirou Younei Ngamrou Kyun

(Mt 17.22-23; Lk 9.43-45)

30 # Mt 17.22-23; Lk 9.43-45. Jesule Aiyei Ruishik raple bi heiwaya lakurkhoubi Galilee ralbine chakur. Jesu'ne A heiri koura kleiyo touri huyakhi muyernimakur. 31#Mk 8.31; 10.33. Kouweiyo toulanung Aiyei ruishik rapya Ane shunmatukur, touri “Thimiyei Chanapawaya miyei hutra hatdurnungei pithutdurou. Heirou tlaini khyumnirou Ane ringthutthurou.”

32 # Jn 12.16. Heirou yane kyun heiwaya kouwo touri phab damakura, heirou yane Jesu'nung hanui ngaimallangroukhi chiwura.

Namrouwei Tangduiri Huwo?

(Mt 18.1-5; Lk 9.46-48)

33 # Mt 18.1-5; Lk 9.46-48. Yane Caperna-um'ra wa'tlungkur, heirou cheemwaira leiyeinung Jesu'ne Aiyei ruishik rapnung koungammei nane lamra yeetkrillo toubi kngai. 34#Lk 22.24. Heirou yane mallangchangmakur, koungameiyo toulanungri yane lamra yai tlakra hune tangduiyo tounei ngamrou yeetrilkur. 35#Mk 10.43-44; Mt 20.26-27; 23.11; Lk 22.26. Jesu'ne ombine Aiyei ruishik chiple khniya ungkartilbi shun, “Hu'khatne lamkri hoiniyanungri a heine nam'rouwei hiltorou da, heirou namaei watlhou chur thimi hoirouda.” 36#Mk 10.16. Heirou ani douwa khatya yai maibongra mayungyerbi, heitoubi Ane douwa heichaya rkolbi yanung shun, 37#Mt 10.40; Lk 10.16; Jn 12.44; 13.20. “Hukhatne douwa khatya yai hangrei Keiminra loulhaklanungri Keiya loulhaklei, Keiya loulhaktom nimakne Keiya yukmalhetpi Puyakhi loulhakpi.”

Kaya Karhourilmak thimi Heiri Kaiyei

(Lk 9.49-50)

38 # Lk 9.49-50; 11.23; Mt 12.30; Msh 11.27-29. John'ne Anung shun, “Upawa, thimi khatne Neiyei minra lhimpob khatya hulthutkur kane kmu, a heiri kai tlakrei nimaknei kane aya shundongkur.” 39Heirou Jesu'ne yanung shun, “Aya shunkhampimak, heiyei ngamri Keiminra kngak lhou toumanemak thimi heine Keiya yunborheirou. 40Kaya karhoumak thimi heiri kaiyei hoirou. 41#Mt 10.42. Tanghakni Keine nanung shunlei, hukhatne naya Keiyei thimime toubi yuiding harul khatchanungkhi pimonglanungri aiyei churnei manri tekkhi leemni dongmakrou.”

Borhra Dananung Malhim

(Mt 18.6-9; Lk 17.1-2)

42 # Mt 18.6-9; 5.29-30; Lk 17.1-2. “Hukhatne Keiya malungam thimi khatya malhimnara dananungei marhotlanungri heinak thimiya aiyei ngakra chakri thlungtang khat manthuibi yui nalira khinglhakurne lhangai. 43Neiyei hut pangkhatne neiya borhra dayerlanungri, heiwaya dantatdurlaka, touri hut khintam kyaone kmit naimak meikhurra changkurnung tlimri hut pangkhat yaomakne ringna bi heirou changkurne lhangai. 44Bi heirou shaibi klei khlung rapkhi himak, heitoubi kaangbi klei meikhi kmit naimak. 45Heirou neiyei hone neiya borhnara dayerlanungri danwurlak, kouweiyo toulanungri neiyei ho khintam kyaone kmit naimak meikhurra khinglhaknung tlimri neiyei ho pangkhat yaomakne ringna bi heirou changkurne lhangai. 46Heitoubi bi heirou shaibi klei khlung rapkhi himakne, heirou kaangbine klei meikhi kmit naimakne leilei (9.44, 46 lingshaangrap ari lingshang 48 le khatnakdik). 47Heirou neiyei mitlung pangkhatne neiya borhra dayerlanungri kholthutdurlak, heiyei ngamri mitlung khintam kyaone kmit naimak meikhurra khinglhaknung tlimri mitlung paangkhattom kyaone Dunpuei ramra changkurne lhangai. 48#Isa 66.24. Bi heirou shaibi klei khlung rapkhi himak, heirou kaangbi klei mei heikhi tek'kmit naimak. 49#Mt 5.13; Lk 14.34-35. Heiyei ngamri thimi kantangya mitti mnikyernakne meini touhyingchirou. 50#Col 4.6; 1 Th 5.13. Mittiri lhangai, heiya heiyei mnik heine makanungri koutoubi nane mnikyerou? Mittini mnikyernakne na khatle-khat palui hoilak heirou khatle-khat phab dani leiyalo.”

Currently Selected:

MARK 9: MARIBSI

Highlight

Copy