MARK 11
11
Jesu'ne Jerusalemra Wachang
(Mt 21.1-11; Lk 19.28-40; Jn 12.12-19)
1 #
Mt 21.1-9; Lk 19.29-38. Heirou yane Jerusalemra yennakyeinung Bethphage'le Bethany Krungkul khintamei pongrei klei Olive Lhungdoura hungtlungkur. Heirou Jesu'ne Aiyei ruishik khintamya shunmatubi yai maibongra louyilkur. 2“Keiyei shunkniri, nai maibongrei louklei yultlaira wawalo, nane bi heirou hek wa'tlungeinung hunekhi tungnamak sapuk mandi khat rui msuibine louleirou. Heiya nane rui sutbine ara yentaangheilak! 3Heirou thimi hukhatne kounungeiyo toubi loungailanungri, ‘Kaiyei Upawane Aiyei lhoubom khatra changnungei leilei, heiya hanuikhi ara yenmallengthurou’ toubi mallangniya!”
4 #
Mk 14.16. Heirou yane wayeinung cheem maisukra sapuk mandicha khat msuibine louklei yane wamukur. Heirou yane rui sutbine malhetyeinung, 5heiyei pongra mayungbi heiklei thimi rapne heikngai, “Koutounei nane sapuk shunchaya malhetkurawo?”
6Heirou yane Jesuei shunmatuthung heinakne mallangkur, heitounei thimirap heine yaya loumalhetkur. 7#Jn 12.12-15. Heitoubi yane sapuk shuncha hei Jesu'nung yenpikur, heitoubi heiyei doura yaiyei linglik chulrap myerbaangbi Jesu'ya omyerbi tungyerkur. 8Thimi rapne yaiyei phi'uprap heiwaya lamtlaira khingmyerbi, heirou thimi thane kangwoina deekloubi lamtlaira louchaikur. 9#Laa 118.26; Mt 21.15; 23.39. Heirouri maibongra loulamkri heirou hillei heichanthung thimirap nammane ungraobi paokur, “Hosanna! Dunpuya choune mathanglei, Umpuei minra hungbi klei A heiri likarsui lhangai hoiniyasu! 10Kaiyei pawa Krung David'yei Krungram heiri Dunpune phorpi hoiyasu! Hosanna, chouduine Dunpuei min hoiniyasu!”
11 #
Mt 21.10-11,17. Jesu'ne Jerusalemra ho trumyeinung, Pukhrumna Cheemwaira wachangbi putchei namyerwa karhilne wathimallokur, Heirou heiyei tlainirouri kheen yentheengurnei ngamrou Ane Aiyei Ruishik chiple-khnile kalhonne Bethany'ra kallengkur.
Jesu'ne thrumkur Khyudhei Trung Khatya Mancho
(Mt 21.18-19)
12 #
Mt 21.18-19; Lk 13.6-9. Heithangei tlainirou yane Bethany'rei pothutbi wachangeinung Jesuri msulkur. 13Heirou Ane tlatnarei heithiyeinung heengna manbobni klei khyudhei trung khat heimubi khyudhei leileiko toubi yeelthinungei wachangkur. Heirou Ane wathinarouri heengnatom louklei, heiyei ngamri kheen heiri khyudhei heinei kumchaanri nimakhui. 14Heirou Jesu'ne khyudhei trungya manchobi shun, “Asirouei waiyoubi thimi hukhatnekhi neiyei hei lachamakneasu!”
Heirou Aiyei ruishik rapnekhi Aiyei heisitoubi kyun heiwaya mayekthungkur.
Jesu'ne Pukhrumna Cheemra Polhak
(Mt 21.12-17; Lk 19.45-46; Jn 2.13-22)
15 #
Mt 21.12-16; Lk 19.45-48; Jn 2.13-16. Yane Jerusalem'ra wa'tlungeinung, Jesu'ne Pukhrumna Cheemra wachangbi putchei lobi heirou yorbi louklei rapya namma hulthutkur. Ane tuychui lipna kangthak heengpik heirou mathru yorthimiyei omna rapkhi namyer khingmatraikur, 16heirou Ane thimi hukhatyakhi putchei urbine Pukhrumna Cheem heiyei yuntlangmaira ralyernakur. 17#Isa 56.7; Jer 7.11. Ane yanungei asitoubi shun, “Dunpuei shunthutkhou tlouya asitoubine mayekhoubi leilei, Keiyei Cheem awari lim nammaei buchana cheem toubine ungrou, heiya nane cheem heiri mucha rapbei rabu hoiyerwurla!”
18Suipipu raple tloulamei Upa rapne kyun heiya mayekbi Jesu'ya koutoubi hatdurserouwo toubi lam thiphakur. Heiyanungkhi yane Aya chikhou, ngamri kartilbi klei thimirap nammane Aiyei shunpikur tlouya mayekbi ngakkur.
19 #
Lk 21.37. Rawainung Jesule Aiyei ruishik rapne yulthung heiwaya lakurkhoula.
Khyudhei Trung Khatrouwei Mulounungei
(Mt 21.20-22)
20 #
Mt 21.20-22; Mt 17.20; Lk 17.6. Nithangei ningshun manma yane lamra heisi yentlayeinung khyudhei trung heiwari yrung kyaone yentaarkur muwurla. 21Peter'ne heiwaya muwurbi Jesu'nung shun, “Thilak, Upawa, Neiyei manchokur khyudhei trung heiwari yenhiwura!”
22Jesu'ne yanung loumallang, “Dunpuya malungamlak. 23Keine tanghakne nanungei kyunri, hukounak khatne aiyei ukningra koukhi kardonmakne, Lhungdou heiwaya, ‘neitam phukkurbi samadru khatra khinglhakurlak’ toubi yunchanganungri, aiyei malungammei kyun heine hoiroume tou leiyanungri, anungei tlungyerpirou. 24#Jn 14.13-14; 16.23; Mt 7.7-11. Heitounei Keine nanung kyun: Nane ngam khatnungei buchalanungri, heiwaya pharoume toubi malungamlak, heirou naiyei bucha heiwari yulmakne pirou. 25#Mt 6.14-15; 18.35. Heirou nane buchanungei mayungeinung nangni thimi hukhatya klal lhou toulanungri kukpirilak, heiyanungri thangmunrei klei nai Pawane nai klal toukur heiwaya kukpirou. 26Nane kukpimanungri thangmunrei klei nai Pawanekhi naiyei klal toukur heiwaya kukpimakrou.”
Jesuei Toumaniyei Ngamrou Kngai
(Mt 21.23-27; Lk 20.1-8)
27 #
Mt 21.23-27; Lk 20.1-8; Jn 2.18. Yane hanuikhi Jerusalemra hungtlungurthu, heirou Jesu'ne Pukhrumna Cheemra wachangyeinung, Suipipu raple, tloulamyei uparap, heirou yama upa rapne hungbi, 28Anung hungkngai, “Lhou namyerwa aya tounanungei Neiyei mantrang kou kleiyo? Neinung mantrang awaya huipiyo?”
29Heirou Jesu'ne loumallang, “Keine nanungei tlou khat ngaithiyeise, nane heiwaya mallang maniyanungri, Keiyei mantrang awari nanungei shunpirou. 30Keinungei yunlak, John'yei yui luppinei mantrang heiri koulhangrei hungo? Dunpureiyo, tlaipang thimirei?” 31Heirouri yaitamne yeetrilkur, “Kane koutoubi yunserou? Kane ‘Dunpurei’ toulanungri, ‘Heiyanungri nane koutounei John'ya malungammak?’ toubi Ane louyunthurou! 32Heiya kounakpi kani, ‘Tlaipang thimirei,’ toubi kane yunlanungri, kousitoulei!” (Yane thimi rapya chirilkur, ngamri thimirap nammane Johnri thimkhui khatme toubi yachilei). 33Heitounei yane Jesu'nung loumallang, “Kari mumakura.”
Heirou Jesu'ne yanung shun, “Heiyanungri Keine kourei mantrangne touwo touri shunpimakarou.”
Currently Selected:
MARK 11: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.
