MATTHEW 12

Mathrilna Tlainiyei Ngamrou Kngai Tlou

(Mk 2.23-28; Lk 6.1-5)

1 # Khn 23.25. Heihillou Jesu'ne Mathrilna tlainirou loutlaira yenraalyeinung; Aiyei ruishik rapne msulwurnei ngamrou yane loutlairei gehu hui rapya thatloubine khekshaikur. 2Heirouri lhangai karsa thimi rapne muthungkur, heirou yane Jesu'nung kyun, “Thilak, Neiyei ruishik rapne Mathrilna tlainirou heinaksi lhouya toukur heiwari kaiyei Chaylamra karha'kna lhoume!” 3#1 Sa 21.1-6. Heirou Jesu'ne loumallangkur, “David'le aiyei thimi rapne msulyeinung yane kousi touwurkhou, nane heiyei ngamrou tekchakhi pathimakeiko? 4#Lev 24.9. Ane aiyei thimi raple kalhoni Dunpuei Cheemra polhakbine, heirou ale aiyei thimi rapne, yaiyei Chaylamra karhakril hoiyanungkhi, Dunpunung makatkur mumtol rapya yane shailoukur. Heinak mumtolrap heiri Suipipu upatomni shai'kya. 5#Msh 28.9-10. Nimanung, Mathrilna tlainiserrou Suipipu rapne yai Chaylamra karhakril lhouyatom toukaryombikhi, yarap heiri koukhatkhi klal makme touri nane Moses'yei Chaylamra pamumakhuiko? 6#Mt 12.41-42; Lk 11.31-32. Keine nanungei tanghakne yunlei, touri arou Dunpuei Cheemya duine tangkhat leileihui. 7#Mt 9.13; Hos 6.6. Khying Tlouni asitoubi yunlei; ‘Keiri khrumna put anchumya madu nimak, heiya kringpikhei heiyatom madulei.’ Ari kouya kyunno toubi nane munneyanung, nane lalmak thimi rapyari kouninungkhi lalyerkhoumakrou; 8#Jn 5.1-18; 7.19-24; 9.1-41. ngamri Thimiyei Chanapawa heiri Mathrilna tlainiyeikhi Pu khoime.”

Hut Pangkhat Hisunda Napawa

(Mk 3.1-6; Lk 6.6-11)

9Jesu'ne bi heiya lakkurkhoubine Synagogue'ranung wakur, 10Heitoubi bi'heirou hut paangkhat hisundakur napawa napung khat louklei. Heitoubi bi'heirou Jesu'ya klal lhoutou thimime toubi theibaangkni thimirap thakhi louklei, heirouri yane Anung loukngai, “Mathrilna tlainirou kna Raikyer heiri kaiyei Chaylamra karha'kna nimako?” 11#Lk 14.5. Heirouri Jesu'ne yanung loumallangpikur, “Naihangra napawa napung khatdei yao khatcha leinarou, yao heine Mathrilna tlainirou khur yuknara dalhakbine leiyanungri, kousi touserou? Ane yao heiya khangthutpimakrouwa? 12#Mt 10.31. Heirou tlaipang thimiri yao heiya duine manklu nimaka! Heiyanungri, Kaiyei Chaylamni Mathrilna tlainirou thimi napung khatya trungpikur heiri kya.” 13Heirouri Ane hut paangkhat hisunda napawa heinungei kyun, “Neiyei hutbang heilamthutlak.” Heisi tounarouri ane aiyei hutbang hei-engthutkur, heirouri raiwurbi khatlhangrei hutbangnakrim lhangaikur. 14#Mk 14.1; Jn 7.30; 8.59; 10.39; 11.53. Heirouri lhangai karsa thimi rapne shaallurbine Jesu'ya hatnanungei wairaangyoukur.

Dunpuei Khalthutkur Shik

15 # Mk 3.7-12; Lk 6.17-19. Heirou yaiyei wairaangkur heiwaya Jesu'ne mayekkurnarou Ane biheiya lakkurkhoubine pochutkur. Heirouri Aihilla thimi chungne heichanthungkur. Heirou Ane thimi kounakya kna raiyerkur, 16heitoubi Aiyei ngamrou thimidei hu khatnungkhi yunpimaknungei yaya shunmatukur. 17Ane heinakei lhou rapya toukur heiri, Dunpuei Thimkhui Isaiahnung shunthutdurkhou tlourap heiwaya chimne hungthukyernanungei toukura. 18#Isa 42.1-4. “Thilak, Keiyei khalthutkur Keishik Awari, Keine Aya duine malungshilei, heitoubi Aiyei ngamrou Keimalung khrahwura. Keine Aidoura Keiyei lhawai malhetsundapirou, heirou Ane Gentile rapnungei Keiyei picharyei tlou rapya shunthutpirou. 19Ane Aitamtomei maniya chanbine tlou yunmakrou, nimanung Ane ungraochakhi toumakrou, nimanung Ane khullamra ungraochabine karwaichamakrou. 20Ane maninanung chimmei picharya chayerbongyen, heirou Ane kangkuiya khribdeekyermakrou, nimanung shirek meisharya mitdurmakrou. Heitoubine Aiyei chim heiwane maneheirou, 21heirouri Anungei thimi namyerne malungam leirouwa.”

Jesule Be-elzebul Marhilna

(Mk 3.20-30; Lk 11.14-23)

22 # Mt 9.32-33. Heirou thimi rapne Jesuei leinara lhangaimak lhawai tungnei ngamrou, tloukhi thukmak, mitlungkhi deo napawa napung khat heiruilhakur. Heirouri Jesu'ne napawa heiya raiyerpikur, heitounei ngamrou napawa heiri mit mumanikur, heirou tloukhi yunmanekur. 23Heitounei ngamrou thimi rapne Jesuei toukur lhou heiwarou beimakne ngakur. Heirou yane “A heiri David'yei Chanapawa hoirouweiko?” toubine yunrilkur. 24#Mt 9.34; 10.25; Jn 7.20; 8.52; 10.20. Heirou Lhangai karsa thimi rapne tlou heiya mayeklhakbine, heirou yane loumallang, “Ane Satanya hulthutkur maniri Anungei yaiyei upani heinakya maninanungei toubine mantrang piwurnei.” 25Heirouri yane kouya ningchaleiyo touri Jesu'ne muwurchila, heitounei Ane yanung shunkur, “Ram khatne ngallurbi lhang-lhang karkhairou dawanungri, kouniroukhi ram heiri tlani pulchimakrou. Heinakrimne yultlai khatne nimanung bommai khatne yaitam ngallanungri, ya heiri lailaini hungkarkhairou. 26Heinakrimne Satanyei bomra rul khatne rulkhatkou ngaallanungri, ya heiri lailaine karkhaiyurame touri mula! 27Nai kyunri Keine Satanya hulthutnei ngamri Be-elzebulni Keinungei heiwaya hulthutnanung mantrang piwurneime toulei. Heiyanungri, huni naiyei hilthung thimi rapnungei yaya hulthutnanung mantrang pileiyo? Heitoubi naihil chanthung thimi rapne koutoubi nai toukur lhou heiri chimmakme toubi murouwo! 28Heiri Be-elzebul nimak, heiya Dunpuei lhawaini Keiya heinaksi Satanya hulthutnanungei mantrangya pilei, heinakei lhou heini Dunpuei Krungram heiri naidoura yongurame toubi loumulak. 29Thimi hu khatnekhi mantrang klei cheempu heiya manbine phonrimakne, aicheemra wachangbi cheem heirouwei putchei lungloukur manemak; heiya cheempuya phonrilanungtom cheem heirou changbi putchei rapya lungkur manirou. 30#Mk 9.40; Lk 11.23. Thimi hukhatpani tanghakpa Keiyei thimi hoimanungri, a heiri Keile karhoukril hoirou; thimi hu khatne Keiyei markumnara yaomakanungri a heiri tanghakne baichek thimi louhoirou. 31#Mk 3.28-30; Lk 12.10. Ngam heini Keine nanungei shunlei, touri, thimi rapne lhangaimak lhouya, heirou borh touwurkhou leiyanungri yaiyei klal heiwaya kukpirou; heiya yane Dunpuei Lhawai Khyingei doura lhangaimak-minamnei tlou yunkur heiyale* heirou hu khatne Lhawai Khyingei doura lhangaimak tlou thuithi yunlanungri, aya kukpimarou. 32Hu khatne Thimiyei Chanapawaei doura karhane yunlanungri, aya kukpirou; heiya Lhawai Khyingei doura karhane yunlanungri-ayari asinungkhi nimanung hilloukhi kukpimarou.”

Heengtrung Heirou Aiyei Heenghei

(Lk 6.43-45)

33 # Mt 7.17; Lk 6.44; Jas 3.11-12. Heenghei lhangaine heiyerreise toulanungri, heengtrung heiwakhi lhangaiyerrou da; heirou heengtrung heini manthirranungri, heenghei rapkhi manthirrou. Ngamri heengtrung heiyei lhangai-lhangaimak heiri kat'heiyanungtom loumuthra. 34#Mt 3.7; 23.33; Lk 3.7; 6.45; Mt 15.18. Nari frullei yu-charap, heirou lhangaimak thimirap hoibine koutoubi nane lhangaiya yunthutrouwo? Murrei yunthutri ukrei ningcha rapya katyunthut. 35#Jas 3.12. Lhangai thimi khatne aiyei lhangaiya marpeikhounarei lhangai heiwaya urthut; heitoubi lhangaimak thimi heini aiyei lhangaimak marpeikhounarei lhangaimakyatom urthut. 36“Nane murou, touri, thimi napung-kantangne picharrei tlainirouri ai'aiyei yunthutdurkhou karsukmak tlou heiyei mshingya sherbangeirou. 37Heini nai-naiyei yunthutdurkhou tloulhang rapne naya pichar touweirouhui--heitoubi naiyei klal-lalmak heiri tloulhangrap heini mutdeirou.”

Kngakei Lhouya Touyernanung Bucha

(Mk 8.11-12; Lk 11.29-32)

38 # Mt 16.1; Mk 8.11; Lk 11.16; Jn 2.18; 6.30; 1 Co 1.22. Heitounei ngammei Chaylam upa raple Lhangai karsa thimirap thani kanthoubine kyun, “Upawa, Neiyei kngakei lhoutou heiwaya kani thinilei.” 39#Mt 16.4; Mk 8.12. “Angtu chaanyei thimirap ari kousitounei anakei tharmu yaomak heirou lhangaimak hoikurrawo!” Jesu'ne louyunthutkur, heirou hanuikhi Ane yunthu, “Nane Keiya kngakei lhouya touyernileino? Keine nanungei mutpimarou! Heirou Keine nanungei mutpirouri Thimkhui Jonahyei kngakei lhou heitomngei. 40#Jn 1.17. Heinakrimne Jonah'ne thangatang khatdei ukrilla tlaini khyumnile masa khyumnibil yarekurkhou, heinakrimne Thimiyei Chanapawa heinikhi thleirilla tlaini khyumni heirou masa khyumni leiyeirouhui. 41#Jn 3.5. Pichar tounei tlainirouri Ninevehyei thimi rapne naidoura klal dayerheirouhui, ngamri Jonah'ne lhangai tlouya shunthutnarou yane borh'rouwei kallekthutkur; heini Keine nanungei tanghakne kyunri, arouri Jonah'ya duine tang thimi khat hungeirou! 42#1 Kr 10.1-10; 2 Ch 9.1-12. Pichar tounei tlainirouri, Sheba rammei Krungei nuni naidoura tlou yunheirou! Koungameiyo toulanungri, ani aiyei ramya duine yenchaheibine Krung Solomon'yei shingkhei-mukheiyei shunmatupikur heirapya yenninglhakur; heini Keine nanungei tanghakne yunpilei touri, heirou Solomonya duine tang thimi khat leileihui!

Lhangaimak Lhawai Yenkalleng

(Lk 11.24-26; 2 Pt 2.20)

43“Lhangaimak lhawaini thimi napung khatrei thukkurbi, ram karyoune karngana bi thiphabi yenkarwaichakur. Heirou ani bi khatchakhi rapmumaknarouri, 44ani aitamtom kyun, ‘keine keicheemra hanui kallengthurouwa.’ Heitoubine ane hanui kallengeinung aicheem heiri koukhatkhi makne dingei louklei ani hungmukur. 45Heirouri ane hanui pothutdurthubi aya duiyei lhangaimak lhawai enitamya yenruilhakbine, yane bi'heirou hungleikur. Heirouri thimi heiri haallei leikhouya duine lhangaimakur. Heinakrimne angtu chaanyei thimi rapnung thukeirouhui.”

Jesuei Puiwi Heirou Aiyei Teinaorap

(Mk 3.31-35; Lk 8.19-21)

46 # Jn 2.1-12; Jn 19.25-27; 7.1-10; Mk 6.3; 1 Co 9.5. Jesu'ne thimi rapnung tlou yunbi louleiyeinung Aiyei puiwile, heirou Aiyei teinao rapne Aiyei leinara wa'tlungkur. Heirou yane Jesu'nung tlou kallangninei ngamrou yuntlangmaira mayungaakbine louklei. 47Heitounei thimi napung khatne Anungei loushunpi, “Thilak, neipuile neiyei teinao rapne yuntlangmaira mayungakbine leilei, heirou yane neinungei tlou kallangnine ngaaklei.” 48Heirou Jesu'ne loumallangkur, “Keiyei pui touri huwo? Heirou keiyei teinaorap touni huhuwo?” 49Heirouri Ane Aiyei ruishik rapya shunmandobi kyun, “Thilak! Keiyei nuwile keiyei teinao rapri bi arou klei thimi rapri! 50#Jn 15.14. Huhuni Keiyei Thangmunrei klei Pawaei kningya toubi klei thimirap namyerwari Keiyei teinaorap, Keiyei char, heirou Keiyei pui hoirou.”

Currently Selected:

MATTHEW 12: MARIBSI

Highlight

Copy