MATTHEW 13

Lung-Tuk thimi Khatdei Ngamrou Yailimtlou

(Mk 4.1-9; Lk 8.4-8)

1Heiniyei tlainirou Jesu'ne cheem lakurkhoubine Samadru khatlhang mnakranung wakur, heitoubi Ane bi khatra ombine shunmatupikhou. 2#Lk 5.1-3. Bi'heirou thimi chungwane Aya kar'umbi leikur, heirouri Ane malidoura omyeinung thimi rapne samadrura ombine leikur. 3Heitoubi Ane thimi rapnung yailimyei tloune yunbi chungwane shunmatupikur. “Bongnung napawa napung khatne lung tukrou toubi pothutkur. 4Heirou ane aiyei yekulra lung heisi yentuklhaknarou, lung thari lamruira dalhakur, heirouri ramwaa rapne trailhakbine lungrap heiwaya khulchaloukur. 5Heitoubi lung thaneri thleiphukhi makna thlung doura dabangkur. Heirouri lung rapne thleiphu khyukne maknei ngamrou khrangne katpukthutkur. 6Heirouri kinnine kathukbi katchoueinungri, lung heiyei trikcha rapri phoutaarkur; heirou yaiyei yrung rapri thlungrilra khyukne runchangmaknei ngamrou, khrangne loumarhuikur. 7Heitoubi lung thaneri thrubur rapbei hangra dalhakur. Yarap heini katpukthutbi, yai trik rapri thrune marubphopkur. 8Heitoubi lung thaneri thleiphu leinara dalhakbine, heirou yane katpukthutbi, yaiyei heikhi lhangaidui kat'heikur; heitoubi lung thari hei macha heikur, heirou thaneri hei somruk heikur, heitoubi thaneri hei somthum heikur.” 9“Khna pal thimine loumayeklhaklak!” toubi Jesu'ne yunbi luikur.

Yailim Tlou Rapbei Ngam

(Mk 4.10-12; Lk 8.9-10)

10Heirouri ruishik rapne hungbi Jesu'nung hungkngai, “Nangne thimi rapnung shunmatuyeinung kounungei yailimyei tloune kyunno?” 11Heirou Jesu'ne yanung loumallangpi, “Thangmun Krungramei ngamrou mideine muchangmak chimmei tlou heirapri Keine nanungei yunthutpiwurla, heiya thimi deinungri yunthutpimakhui. 12#Mt 25.29; Mk 4.25; Lk 8.18; 19.26. Heitoubi marthumni klei thimi heinungri duinekhi pilhakthurou; heirou ari maleini kro hoirou; heiya tekkhi mak thiminungri aiyei haallei klei heichayakhi yertleng khrokthutrou. 13Keine thimi rapnung yailimyei tloune yunpinei ngamri, yane thipha, heiya muchangmak, heitoubi yai khnane loukning, heiya mayeklhakmak, heirou yane phabkhi damak. 14#Isa 6.9-10; Mk 8.18; Jn 12.39-41; Pao 28.26-27. Heitounei Isaiahyei shunthutkhou tlourap heiri yanak thimi rapya kyun. ‘thimi rapne loukning, heiya tekchakhi mulhakmak; yane thipha-raphabinekhi, koukhatchakhi muphamaklei, 15ngamri yai ludokri koukhatkhi karsukmakura, heirou yai khna rapri tipburla heitoubi yai mitlung rapri chipbura. Hei nimanungri, yai mitlungni mubi, heirou yai khnane mayekbi, heirou yaiyei ludokni mulhakbine muidanelei, heinakne toulanungri yane Keinungei mai kalleklhakbine, heirou Keine yaya kna raiyerpirou,’ toubi Dunpune shunlei.” 16#Lk 10.23-24; Jn 8.56; Heb 11.13; 1 Pt 1.10-12. “Heirou nari kounak likarsuiyei thimirap hoilei! Naiyei mitni muphalei, heirou naiyei khnakhi mayeklei. 17Keine nanung tanghakne yunpilei touri, naiyei mukur heiwaya Thimkhuirap kounaknekhi, heitoubi Dunpuya uklum thimi kounaknekhi mu'kni, heiya yane heinak rapya mukhou'changmak, heirou naiyei mayekkurnakne yanekhi mayekni, heiya yane heinak rapya mayekkhouchangmak.

Jesu'ne Lungtuk Thimiyei Yailim Tlouya Yunkarshaangpi

(Mk 4.13-20; Lk 8.11-15)

18“Louninglhaklak, heitoubi marnolak, lungtuk thimi khatdei ngamrou yailim tlouri kouweiyo touri yunneise. 19Krungrammei ngamrou Lhangai Pao-laaya mayeklhakbine, heirou muidane ninglhakloumak thimirap heiri lampallei dalhakur lungnakne hoirou. Heitoubi khril-lhangaimak khatne wabi dalhakur lung heiya khulloukhei heinakrim hoirou. 20Heitoubi thlung dourei dabangkur lungrap heiri, thimi rapne pao heiya mayeknarou yane hakraoni ninglhakur, 21heiya yaiyei ukra khyukne loulhakmaknei ngamrou, yaidoura klah-knangne marhotyeinungri, yai mayekloukur pao heirapri malumkur. 22#Mk 4.19-23; 1 Tm 6.9,10,17. Heitoubi thru hangra dalhakur lungrap heiri, thimi rapne lhangai paolaaya mayekloubi heirou yane lhawai klah leiyeinung, heitoubi yai chaanrou laldunya madunei ngamrou, yane mayeklhakur heirapya malumwurbi, koukhatkhi hei heimakne dongkur thimi rapnakrim hoilei. 23Heirou thleiphurei dalhakur lungrap heiri paolhangaiya mayeklhakloubi, lhangaine mulhakur thimirap heiriso. yarap heiri heikhi chungne heilei, heirou thari hei macha, heitoubi thari hei somruk, heirou thaneri hei somthum heilei.”

Gehu Trung Kmal Loutrungei Yailim Tlou

24 # Mk 4.26-29. Jesu'ne yanung yailimyei tloubom khatkhi yunpithu. “Thangmunyei Krungramri anaklei touri, napawa napung khatne aiyei yekulra lungya watuklhakur. 25Heirouri masa khatnung thimirap nammane ipburhillou, aya karhoukril thimi napung khatne wabine gehu trung hangra louh'lungya tuklhakhoubi shaalkur heinakrim. 26Heirouri lung rapne katpukthutbi, hei kad'heiyouweinung, gehu kmal louh'lung rapkhi katpukthutbi hei heiyoukur. 27Heirouri loupu heiyei shok rapne anung hungshunpi, ‘Upawa, nangne neiyei yekulra lhangai lungya tuklhakhou, heiya louh'lung rapri kourei katpukthutkuro?’ 28‘Heiyari Keile karhoukril thimi thani tuklhakur,’ toubi loupuni loumallangpi. ‘Heiyanungri kani wabi louh'trungrap heiya phuimthaiyaserrouko?’ toubi yane loukngai. 29‘Nimakme, tourimakhuilo’ toubi Ane loushun, ‘ngamri nane louh'trung rapya phuimthaiyeinung gehu trung rapkhi phuichokrou.’ 30Heirou gehu trung raple louh'trung rapri trunwai lukbongyenri pulne lokpa pukkanthrinbi louleiriyasu. Heirouri trunwai markum thimi rapnung keine shunbi louh'trung rapya phuiyerrirou, heitoubi lokpani dangmallongbi meini hongyerrou, heirou gehu rapya markumbine marpeikhouna chapong rilla shunglhakyerrou.”

Anchep lungei Yailim Tlou

(Mk 4.30-32; Lk 13.18-19; Mt 17.20)

31Heirou Jesu'ne yanung yailimyei tlou khatkhi yunpithu. “Thangmunyei Krungramri anakrimlei, touri, Napawa napung khatne anchep lung urlouheibi aiyei yekulra watuklhakur heinakrimlei. 32Anchep lung heiri trunwaiyei lung namyerouwei mandidui lungcha khat, heiyanungkhi anchep lung heichani katpuknarouri, heichani anna-louna namyerouwei tangduilei. Heitoubi heengtrung'nakne katchouwurbine ramhangrei klei waacha rapne wachubine heiyei banra yane rabu sheembi klei.”

Phriyei Yailim Tlou

(Lk 13.20-21)

33 # Gal 5.9; Kan 18.6. Jesu'ne hanuikhi yanung yailimyei tlouya yunpikur. “Thangmunyei Krungramri anaksilei, touri, Napuiya khatpini phri loubi, heitoubi ani tsai kunkhi krungkok somlikhat shukloubine, heirou phri nambongyen siklhakbine mankonkur heinakrim.”

Jesu'ne Yailimyei Tlouya Yrengcha

(Mk 4.33-34)

34 # Jn 10.6; 16.25. Jesu'ne thimichung rapnung lhou namyerya yunpinanung yailim tlou rapya yrengchakhou; heitoubi Ane yailim tlou nimakne koukhatkhi yanung yunpikhoumak. 35#Laa 78.2. Ane asitoubi kyun heiri Thimkhuiyei shunthutkhouya chimne hungthukyer, touri, “Keine yanung yunpiyeinung yailimyei tlouya yrengbine yunrou; keine tlaipang sheemtirrei waiyoubine hunikhi mukhoumak tlou rapya yunpirou.”

Jesu'ne Gehu Kmal Loutrungei Yailim Tlouya Yunpi

36Jesu'ne thimi chungya lakurkhoubi cheemwaira hungchangkur heirouri, ruishik rapne Aiyei leinara wachangbine asitoubi kyun, “Lourei klei louhtrungei yailim tlouwei ngamrou kanungkhi bei yunthutpilak.” 37Heitounei Jesu'ne yanung louyunthutpikur, “Trunwaiyei lung lhangaiya tuklhakpi napawa heiwari Thimiyei Chanapawa heiri; 38#Jn 8.44; 1 Jn 3.10. heitoubi louyaori tlaipangpalya kyun; heirou lhangai lungri Krungrammei thimi rapya kyun; heitoubi lhangaimak lung rapri lhangaimak thrai rapya kyun; 39heirou lhangaimak lung rapya tuklhakurkhou yekna thimiri Satanya kyun. Trunluk heiri tlaipang chaan klui heiya kyun, heirou trunluk thimirap heiri Thangring rapya kyun. 40Louhtrung rapya markumbine meiwaira hongkur heinakrimne, tlaipang chaan luininungkhi heinakrimne hoirou. 41#Mt 24.31. Heirouri Thimiyei Chanapawane Krungramrei Thangring rapya yenhilsundabi thimi rapya borhyei lhouya, heirou lhangaimak lhouya toubi klei thimi namyerya khummartilbi, 42#Mt 13.50; 8.12; 22.13; 24.51; 25.30; Lk 13.28. heirou yane meirilla khinglhakurou, heirouri bi'heirou yane chapbi yaiyei ha khrik-khrik chikmardebi leirouwa. 43Heirouri Dunpuei thimi rapne yai Pawaei Krungramra kinniyei kwaar'nakne albi thrungrou, khna klei thimine kyun awaya louninglhakpilak!

Muwei Marpeikhou Lal

44“Thangmunyei Krungramri anakrimlei, Napawa khatne loutlaira hunikhi mumakne muei marpeikhoubi klei lalya raphamubine, ani lal heirapya hanui phorphumkhoubi, heirou ani malungamne aicheemra kallengurbi aiyei klei putchei nammaya yorwurbi, heirou ani hanui heikallengbi lou heiwaya loloukur heinakrimlei.

Man'klu Thlungei Yailim Tlou

45“Heitoubi Thangmunyei Krungramri anaksikhi hoithulei. Napawa napung khatne manklu thlungya thipha'nakrimlei, 46heitoubi hunekhi rapmumak manklu thlung khatya ani rapmubi, heirou ane cheemra kallengurbine aiyei klei namyerwaya yorwurbi, thlung heiya loloukur heinakrim.

Thanga Manna Lingei Yailim Tlou

47 # Mt 13.40-42. “Heitoubi Thangmunyei Krungramri anaksikhi hoilei. Thanga kman thimi rapne yaiyei lingya yui nalira khinghupbine, thanga limlim khupmankur heinakrim. 48Ling heine thanga bilthimni khubphopburbi, heirou yane ling heiwaya tangthutbi kungruira ombine thanga rapya manmarkumbi; lhangai thanga rapri yai thanga tikra laklhak, heitoubi lhangaimak thanga rapri pura khingthutkur. 49Heirou tlaipang chaan luiyeinungri anakrimne hungthukeirou. Thangring rapne yongbine lhangai thimi rapbei hangrouwei lhangaimak thimi rapya holthutdurbine, 50heitoubi yayari meiwaira khinglhakurbi, heirouri yane bi heirou chapbi yaiyei ha khrik-khrik chikmardebine leirouwa.”

Ran Heirou Khman Chim

51“Nane namyerwa heiya mumanileiko?” toubi Jesu'ne yanungei kngai. Heirou yane, “Moi, kane mulei,” toubi loumallang. 52Heirouri Ane kyun, “Heiyei ngamri, Chaylamei upa rapne Thangmun Krungramei ruishik hoikur heiwari marpeikhouna heiyei cheempu hoibi, heirou naiyei putchei rankhi heirou khmankhi namyerya phawurbi laldun thimi hoikur heinaksi.”

Jesu'ya Ai'ram Nazareth Ramra Yapimakne Horkur

(Mk 6.1-6; Lk 4.16-30)

53 # Mt 7.28; 11.1; 19.1; 26.1. Jesu'ne yailim tlou rapya yunchibine, Ane bi heiwaya lakurkhou. 54Heitoubi Ane aiyei yultlairanung shaalkur. Ane Pukhrumna Cheemra wachangbi shunmatupikur, heirou Aiyei shunmatupiya mayekkur thimi rapne ngakurbine “Ane heinakya kourei mulhakloukheiyo?” toubi yadikne ngairilkur, heirou “Anak kngakei lhou rapri kouweiyo?” toubikhi yunrilkur. 55A heiri heengchur napawaei chanapawa nimako? Heitoubi James, Joseph, Simon heirou Judas yarapri aiyei teinaorap nimako? 56Aiyei charra rapkhi klei nimako? Heiya kourei Ane heinakya mulhakloukheiyo? 57#Jn 4.44. Heisi toubi yane Aya yanimakne horthutkur.

Heirouri Jesu'ne yanung kyun, “Thimkhui heiwari bi kantangrou rikrai-khrumril, heiya Aiyei yultlaihakrou heirou Aiyei bommairei thimi rapne Aya yanimakne horthutkur.” 58Kouweiyo toulanungri yane Aya uklumpimaknei ngamrou, Ane bi heirouri kngakei lhouya chungne toukhoumak.

Currently Selected:

MATTHEW 13: MARIBSI

Highlight

Copy