MATTHEW 11

Yuiluppi John'yei Ruishikrap

(Lk 7.18-35)

1 # Mt 7.28; 13.53; 19.1; 26.1. Jesu'ne Aiyei ruishik rapnung shunmatupi luiyurbi, heitoubi Ane bi heiwaya lakurkhoubi, heiyei pongrei klei yultlai deirakhi shunmatupinungei, heirou lhangaiyei paoya shunthutpinungei chakur. 2Heirou Yuiluppi John'ne kul chalphopbi leiyeinung Jesuei toukur lhourap heiwaya loumayeknarouri, ani aiyei ruishikrap thaya Jesuei leinara heihilkur. 3#Mk 1.7-8; Hab 2.3; Jn 11.27. Heitoubi yane Jesu'nung wakngai, “Kanungei yunpilaklo, John'ne aihilla napung-khat hungeiroume toubi kyunri Neiya kyunko?” 4Heirou Jesu'ne yanung loumallangpi, “Nane kallengbi nai mayekloukur heirapya, heirou naiyei mukur namyerwa heiya anungei hungshunpilak. 5#Isa 35.5-6; 61.1; Lk 4.18-19. Mitdeo thimi rapne yaiyei mit mu maniwura, heirou hodeek thimi rapne karwaicha maniyura, raichi patbi mrimnangei klei thimi rapkhi yaiyei pat dammura, khnasit thimi rapkhi yaiyei khnasit heikhi mayekchangura, hikur thimi rapkhi katringura, heitoubi Pao lhangaiya kanring-kanwang thimi rapnungei shunthutpiwurla. 6Heini Keiya koukhi khalcha'kna makne uklum thimi rapri likarsui lhangairou!”

7Heirou John'yei ruishik rapne shaalkur hillouri, Jesu'ne thimi rapnung Aiyei ngamrou kyun: “Nane ramhangra John'yei leina bira wayeinungri kouya muphalei? Marthee thiyeinung heengna-ronaei kansaicha heiyatom muphaleiko? 8Nimanungri nane kouya thirou tounei wathuko? Napawa napung khatne phirul ranya mansambi kleiya thinungko? Nimanung thimi rapne Krungkulla omyeinung kansam heinakne kansam heiwaya thinungeiko? 9#Mt 14.5; 21.26; Lk 1.76. Keinung yunlak, nane kouya thirou tounei wathuk? Thimkhui khatya thirou touneiko? Moi, heisi hoikhi kya, heiyanungkhi nane Thimkhuiya duine muwurla. 10#Mal 3.1; Mk 1.2. Kouwo toulanungri, Khyingei Tlouni yunthutkhou heiwari John heiriso. touri ‘Dunpune yunkhoulei, thilak, Keine naiyei maibongra, nanung shumtrum loulatpinanung thimi napung khat loumalhetpirou.’ 11Keine nanung yunlei, touri Yuiluppi John heiri ringbi klei thimi namrouei tangdui napawa khatme. Heisiya hoiyanungkhi Thangmun Krungramra klei namrouei mandidui heini John'ya duine tanglei. 12#Lk 16.16. John'ne lhangai paoya shunthutkur heirouwei waiyoubine angtuei tlaini phane Thangmunyei Krungram heiwari mantrangne rumphopbi leileihui, heitoubi heiya rumphopbi klei thimi rapne kulchalbi leilei. 13John'yei chaanya trumphopni, Thimkhui rapnekhi, heirou Moses'yei Chaylamnekhi Krungbomyei ngamrou yunkhoupi; 14#Mal 4.5; Mt 17.10-13; Mk 9.11-13; Lk 1.17; Jn 1.21. heini nane yaiyei pao lhangaiya uklumnianungri, John'ri Elijah'naksi, ani hillei hungthuknung tlou rapyakhi yunthutkhoupi. 15#Mt 13.9,43; Mk 4.23; Kre 13.9; 2.7. Nane khna kwaar thimi hoiyanungri louninglhaklak!

16 # Lk 7.31-35. “Asinungri, Keine achaanyei thimi rapya koule marhilnaserou? Yanaksi thimirap heiri keithil tlaira ombi klei douwa rulnakne, thral khatne thral khatya ungloubi kyun'nakne: 17‘Kane nanung nu ruinei taariya tangkhungpilanungkhi, nane heirou kouniroukhi lounuypimakrou! Kane khilaaya sapilanungkhi, heirou nane kouniroukhi louchapkhoumarou!’ 18John'ne hungeinungri, ani cha'kmaikhi ngeikhou, darkha heiyuikhi mongkhoumak, heiya thimi rapne kyun, ‘Ari lhangaimak lhawaini thimbi klei thimime.’ 19Heiya Thimiyei Chanapawane hungeinungri, Ari chamaikhou, heisi tounarouri thimi rapne, ‘Napawa heiya thilak! A heiri chakal-maikal thimilei, heitoubi Ruithou thimi rapbeikhi heirou mine kulchalyermak thimi rapbei paluikhi hoilei!’ toubine yunlei.”

Uklum Thimi Mak Krungkulrap

(Lk 10.13-15)

20Jesu'ne kngakei lhou chungwane touwurkhouna Krungkul rapbei thimi rapne, hu khatnekhi yai borhrei lhourouwei mai kallekthut'khoumak, heitounei ngamrou Ane yailimyei tloule kalhonne yaya sammurkhou. 21#Isa 23.1-18; Ezk 26.1—28.26; Jol 3.4-8; Ams 1.9-10; Zec 9.2-4. “Chorazin'yei Krungkul, heirou Bethsaidaei Krungkul, naidoura kounak klahyei bomya hoiwurleisanu! Kouweiyo toulanungri, nanak Krungkul rilwaira touwurkhou kngakei lhourap heiwaya, Tyre'le, Sidon'yei Krungkul rapbei rilwaira touwurkhoulanungri, ram heiyei thimi rapne koulumnungkhi yane yaiyei borh'rouwei ukning hungurame toubi munanungei, yaiyei lura meimkarei udya khrebaangbine, yane phichun rapya upbine ukning hungurlarou! 22Keine nanung chimya yunpilei, pichar tounei tlaini heirouri Dunpune Tyre'le Sidon'yei thimi rapbei doura duine kringpi hoiyerrou! 23#Isa 14.13-15; Kan 19.24-28. Heiya nanungeiri, Caperna-um'yei khokul! Nangne neitamtom nungthou katokni khangbangnileiko? Heisi toulanungri nayari khiya ramra khingsundarou! Naihangra mutpiwurkhou kngakei lhou rapya Sodom krungkulla mutpikhoulanungri, yane angtu ramphane ringbine louleiheirou! 24#Mt 10.15; Lk 10.12. Heiyanungri nane muheirou, pichar tlainirouri Dunpune nanakya duine Sodom krungkullei thimi rapya kringpirou!”

Keinung Hunga Heitoubi Karngalak

(Lk 10.21-22)

25 # 1 Co 1.26-29. Heirouri Jesu'ne asitoubi kyun, “Thangmun ramle Tlaipangei Pu, Pawa! Keine Neiya mathanglei, ngamri, mukhei rapnung heirou marnokur thimi rapnung mutpikhoumak heirapya asinung Nangne muheimak thimile heirou marnomak thimi rapnungei kandangne mutpiwurla. 26Moi, heinakrime Neiyei hoiyerkniri, Pawa! 27#Jn 3.35; 5.20; Jn 7.29; 10.15; 17.25; 1.18; Mt 28.18. Keiyei Pawane put namyerwa heiri Keinungei piwurla. Heini Pawa nimakneri deiri hu khatnekhi Chanapawaya mumakrou, heirou Chanapawane nimakne Pawayari dei hu khatnekhi mumak, heitoubi Chawaei khalthutkur thimirap'tomni Aya mupharou. 28Putkharit urbi klah thimirap na nammane Keinung hungalo, Keine naya klah mathrilyerrou. 29#Jer 6.16; Jn 13.15; Php 2.5; 1 Pt 2.21. Keiyei putya neinungei khangbaangbi urlak, heitoubi Keirouwei marnolak, ngamri Keiri ukning khnim heirou solungkhi kying; heiyanungri nane klah mathrillou. 30Ngamri nanung pinungei Keiyei putri klai, heirou Keiyei putri kyang.”

Currently Selected:

MATTHEW 11: MARIBSI

Highlight

Copy