MATTHEW 10

Ruishik Napung Chiple-Khni

(Mk 3.13-19; Lk 6.12-16)

1 # Mk 6.7; Lk 9.1; Pao 11.3. Jesu'ne Aiyei ruishik napung chiple-khniya ungmarkumbi, lhangaimak lhawaiya hulthutnanungei, limlimmei thraikna rapya, heirou deideiyei nabine klah-knang pikur thimi rapya raiyernei mantrangya lhakpikur. 2Ruishik napung chiple-khniyei min rapri lamkrine, Peter toubikhi ung Simon, heirou aiyei naowa Andrew; Zebedee'yei chawarap, James heirou aiyei naowa Joseph; 3Philip heirou Bartholomew; Thomas heirou Ruithouwa Matthew; Alphaeus'yei chawa James, heirou Thaddaeus; 4Canaan ramrei Raalluiwa Simon, heirou Jesu'ya yorchakur Judas Iscariot.

Ruishik Napung Chiple-khniya Watkyil

(Mk 6.7-13; Lk 9.1-6)

5 # Lk 9.52; Jn 4.9; Pao 8.5,25. Ruishik napung chiple-khniya Jesu'ne shunmatubi watyilkur. “Nane Gentile rapbei ramra, nimanung Samaria'yei ramra changmakneya. 6#Mt 12.24; 10.23. Heinung'tlimri, nane Israel thimi rapbei mangkur yao rapbei bomra chawalo. 7#Lk 9.2; Lk 11.9-11; Mk 4.17. Nane wabi yanung shunpilaka, ‘Thangmunyei Krungram heiri beimakne nakkura!’ 8Heitoubi kna rapya raiyerpilak, heirou hikur thimi rapya ringyerpilak, raichi patbi mrimnangkur thimi rapyakhi damyerpilak, heirou lhangaimak lhim rapyakhi hulthutdurpilak. Nane koumankhi pimakne leemmei phanakne, heirou nanekhi koumankhi loumakne leemni raiyerpilak. 9#Mk 6.8-11; Lk 10.4-12; 22.35-36. Naiyei kaora sina-lapa, heirou tuychui khatchakhi urmakne chawa; 10Heitoubi nane ramra chayeinung koukouya lhaknanungei toubine kaocha khatkhi, nimanung naiyei linglikhi marthumni urmak, nimanung khorkhangkhi, heirou shungkrok'khi urmarthummakne chawa. Ngamri lhouchur thimiri aiyei chanung-mainungei namyerwa koukhatkhi kwatsam makne marshikpirou.

11 # Lk 10.4-15; Kan 19.24-28; Mk 11.24; Jud 7; 2 Pt 2.6. “Nane yultlai khatra nimanung Khokul khatra wa'tlunganung, nane bi heirou wachanga, heitoubi nane bi heirou naya lourorou thimiya thiphalak, heitoubi nane shalbongyen bi heirou cheempu heile pulne leimalnakhoulak. 12Nane cheemra polhakyeinung, ‘Naidoura mlungdam hoiniyalo’ toubine yunlak. 13Heitoubi cheem heirou naya lhangaine louropilanungri, bi'heirou naiyei malung damkyer heiri leiyasu; heiya yane naya louropima'nungri, naiyei malung damkyer heiri bi'heirou makneyasu. 14Heitoubi cheem thani nimanung yultlai thane naya louropimanungri, nane bi'heirou homairei rahui rapya mkhasundakhoubi shaallaka. 15Heirou keine nanung muyerlei touri, Dunpune pichar touyeinung, tlaini heirouri yanaknung'tlimri Sodom'le Gomorrah yultlai rapbei thimi rapya duine Dunpune kringpirou!”

Marhotbi Klah-Mrim Nangkyer

(Mk 13.9-13; Lk 21.12-17)

16 # Kan 3.1; Lk 10.3; Rom 16.19. “Louninglaklo! Keine naya yaoshun'nakne yekshang-rul hangra malhetlhaklei. Nane frullei roushing'nakne muheiya, heitoubi mathruei ukning marnim'nakne naiyei ukning marnim hoiya. 17#Lk 12.11-12; Jn 16.2. Nane kanthramlak, kouweiyo toulanungri thimi rapne naya churmanbi pichar'kulla urlhakeirou, heirou naya Pukhrumna Cheem rilwairakhi urlhakbine umphitkhi touheirou. 18#Pao 25.24-26. Keiyei ngamrou nayari Yama-Krung rapbei maibongrakhi urlhakbine mayungyerbine tlou darheirou, heirouri nane yaiyei maibongrale Gentile rapbei maibongrakhi Lhangai Pao-laaya shunthutrou. 19Yane naya tlou darnungei ruiheinung, heirou nane koutlouya yunserou, heirou koutoubi mallangserou toubine nane uksamak; ngamri kheen hungeinung naya tlou yunkyer leiheirou. 20#Jn 16.7-11. Heiyei ngamri nai yunnungei tlourap heiri naiyei hoimakrou; tlourap heiri naiyei Pawane naya yunyerrou.

21 # Mk 10.35-36; Lk 12.52-53. “Thimi rapne yaiyei pukkanthrin teinao rapyakhi hatkur thukkeirou, heitoubi pa rapnekhi yai chanao rapya heinakrimne touheirou; chanao rapnekhi yaiyei pui-pa lhangra hollhakbine, yaya hatkur thukkeirou. 22#Mt 24.9,13; Mk 13.13; Lk 21.17. Heitoubi thimi kantangne Keiyei ngamrou naya machinheirou. Heiya kluiyei kheen phane kanthram thimi rapne kalpi pharou. 23#Mt 16.27; 1 Th 4.17. Yane naya yultlai khatra klah-knang piyeinung, heirou nane yulkhatra loutruklaka. Heirou Keine nanungei kyunri, Thimiyei Chanapawane yongbongyenri Israel rapbei yultlai kantangrakhi naiyei lhou heiwari churchikhou touri maklei.

24 # Lk 6.40; Jn 13.16; 15.20. “Marnobi klei thimi rapne marnopi pu upa rapya duine tangrouri maklei; heinakrimne shok khatne aiyei cheempuya duine tangnungri maklei. 25#Mt 9.34; 12.24; Mk 3.22; Lk 11.15; 2 Kr 1.2. Marno thimine aya marnopi punak hoiyanungri, heitoubi shok heine aiyei cheempunak hoirou dawanungri heiwane aiyei malungkhrah hoilaksu. Heirou cheempu heiya Be-elzebul toubi unglanungri, cheemmai heiyei thimi dei rapyari kounakei thimirap toubi ungrou dawo!”

Huya Chirou

(Lk 12.2-7)

26 # Mk 4.22; Lk 8.17; Eph 5.13. “Heitoubi nane thimi rapya chimak. Ngamri kandangyermakne munne makhubphopbi khourouri koukhi maklei, heitoubi munne yulkhou rapkhi kanrethutyerrou. 27Keine nanungei muei shunpikur heirapkhi nane warnara kandangyerlak, heirou nane muei mayekloukur heirapkhi cheembungra kakabine paothutlak. 28#Heb 10.31. Naiyei tlaipangei sharungya hatkur mani thimi rapya chimak, ngamri yane lhawaiyari kouniroukhi hat manemak; heinung'tlimri sharungle lhawai khintamrekya khiya ramra malhetlhakbine maangyerkur mani Dunpuya chiyalo. 29Nane tuychui khatchane msekwaa khintam lo'kmu, heiya naiyei Pawa Dunpuei kning yaomakne msekwaa khatchatomkhi thleira yongchukhoumakrou. 30Heirou nanungri naiyei lurei shamyakhi namyer sherthiwurla. 31#Mt 12.12. Heini ngam hoibine nane chimak; kouweiyo toulanungri nari msekwaa nam'rouweikhi duine manklu!”

Christaya Ya'kni Heirou Yanimaknei Lhou

(Lk 12.8-9)

32 # Mk 8.38; Lk 9.26; Kre 3.5; 2 Tm 2.12. “Thimi hu khatne kulyomyei maibongra ‘Christaya ya'knine Aiyeime’ toubi yunthutlanungri, Keinekhi heinakrimne Thangmunra klei kai Pawaei maibongra yunthutpirou. 33Heiya hu khatne kulyomyei maibongra Keiya yanimakne yunlanungri, Keinekhi Thangmunra klei kai Pawaei maibongra ayakhi yanimakne yunthutdeirou.”

Kying Nimakne Raalshon Hoirou

(Lk 12.51-53; 14.26-27)

34 # Mic 7.6; Mt 10.21; Mk 13.12. “Keine tlaipang doura kyingya yenpirou kyongme toubi ningchamak. Nimak, Keiyei kyong awari kyingya yenpinungei nimak, heiya raalshonya yenpilei. 35Keine chanao rapya yai pa raple karhourilyerou, heirou yai chawi thralni yai puiwi raple karhourilyerrou, heitoubi mouwi raple nini raple karhourilyerrou; 36heirou thimi napung khatne nam'rouwei karhourillouri aiyei bommairei thimi rapne hoiheirou.

37“Huhuni aiyei pui-pa rapya Keiya duine malungshi hoiyanungri, a heiri Keiyei ruishik hoinei karsukri koukhatkhi makrou. 38#Mt 16.24; Mk 8.34; Lk 9.23. Huhuni aitamei ruiya urbi Keihilla chanthungmakanungri, a heiri Keiyei ruishikme tounei karsukna koukhi makrou. 39#Mt 16.25; Mk 8.35; Lk 9.24; 17.33; Jn 12.2. Huhuni aitamei rongchanya ringnanungei rapha thimi heiri karsukmakrou; heirou huhuni Keinung'tlim aiyei chaan hormangkur thimini heiwaya karsukni phathurou.”

Churnei Klah'man

(Mk 9.41)

40 # Lk 10.16; Jn 13.20; Gal 4.14; Mk 9.37; Mt 18.5; Lk 9.48. “Hu'khatne neiya louropi thimi heiri Keiya ropi; heitoubi hu khatne Keiya louropilanungri a heiri Keiya yenmalhetpikur Aya ropilei. 41Huhuni Dunpuei paocha thimi rapya paocha thimime toubi louropilanungri, a heiri aiyei churnei klahman pharou. Heitoubi huhuni lhangai thimi khatya lhangai thimime toubi louropilanungri, a heiri aiyei klahman pharou. 42#Mk 9.14; Mt 25.40. Nane murou touri hu khatne Keihil chanthungbi klei kanring-kanwang thimi khatnungei Keihil chanthung thimime toubi kmunne mongnungei yuiding harul khatchatomya shorpilanungri, a heiri yulmakne aiyei klahman pharou.”

Currently Selected:

MATTHEW 10: MARIBSI

Highlight

Copy