KANTHOUNA 43

Josephbei Teinao Rapni Benjamin'ya Ruiloubi Egypt'ra Yukur

1Heiyei kheenrou ram heiyei chaktang thukkur heiri yunnungei makni klah-mrim khat hoikur. 2Heirouri asitoubi hungthukkura, yani Egyptrei yuphalhakkhou tsai-an heiya chachikur heirouri, yai pawani yanungei shun, “Nane hanui kai chanungei tsai-an tha yuraphathulaklo.” 3Heirouri Judah'ne anungei loushun, “Napawa heini kanungei rekrekni shunthungkurri, ‘Nane naiyei naodongwaya yukruiheimaka'nungri, keiya murilnung yamakrou,’ touleime. 4Heineri nangni kaiyei naodongwaya kakou kalhonni yukyilthungla'nungri, kani yubini neinungei tsai-an yulopithurou. 5Heiya nangni aya yukhyilthungmaka'nungri kakhi yumakrou, ngamri napawa heini kanungei, ‘Naiyei naodongwaya nani yukruiheimaka'nungri, nani keiyari murilnungei yamakrou’ toubine rekrek shunthungkurme.” 6Heirou Israel'ne shun, “Koutounei nani naiyei teinao khatkhi leithungleihui toubi napawa heinungei yunpiwurbi keiya lahyerkurawo?” 7Heirouri yani loukyun, “Napawa heini kai rammei ngamrou heirou kai teinao rapbei ngamroukhi khminni loungaibi ani, ‘Nai pawari ringleihuiko? Heirou nai teinao deikhi leileihuiko?’ toubi loukyun. Heirouri kani aiyei kngai tlou rapbei hilthungni anungei louyunthutpikur. Heirou ani ‘Naiyei nao'dongwaya yukruiheilak’ toubine louyunroume touri kani koutoubi muchangrouwo?” 8Heirouri Judah'ne aiyei pawa Israelnung shun, “Napawa douwacha heiri keile kalhonni yukhyilthunglaka, heisi toulanungri kani hoyoubi yurouwa; heiyanungri kari ringrou, himakrou; kakhi, nangkhi heirou kaiyei chanao rapkhi himakrou. 9Keine aya shuikngam yaomakna'nungei thikulpirou; kounakpi keine aya neihutra hungtlungyerma'nungri, keidoura khlang taallak; heirou keiyei chaan khatrekrou heiyei mral keine urrouwa. 10Asitoubine kaya mankanbi touthilmanungri, kani khnuirekpakhi yukallengurlarou.”

11Heirouri yai pawa Israel'ne yanungei shun, “Kounakpi nani urrouwa toulanungri asitoulak: Kairam arouwei trunthut trunwaiyei lung rapya lhangai tha marshikbini naiyei kaora haalbini urlaka; heitoubi ram heiyei pu upawa heinungei hutthulput khoini malanpinungei, muiknam shirek thale, khuiningle, anmroi thale, myrrh shirek thale, thleibe thale heirou almond lung tha urbini yulaka. 12Heitoubi nai hutra tuykhi siruk'khni duini yuklaka, heirou naiyei cha'phitungka murra phonphopbi loukyao tuy rapkhi naihutra shinbini yukmallengthurou da. Heiwari mumaknei yenheikurkhi kya. 13Heirou naiyei nao dongwakhi ruilouheilaka, heitoubi kanthoubi napawa heiyei bira yulaka. 14Heirou napawa heini naiyei teinao khatle Benjaminyakhi hanui loumalhetnanungei Toumani Dunpune naya kringpilaksu. Kounakpi keiyei chanao rapya karkhaiyerrou dawanungri, keiri khi kanrilnei klahni hirouwame.” 15Heisitoubi yani hutthul put rapya marshikbi, heirou tuykhi siruk'khni duini urbini yukur; heitoubi Benjaminkhi yakou kalhonni yukur, heirou yani Egyptra yu'tlungbi Josephbei maibongra wachangbini murilkur.

16Heirouri Benjaminkhi yakou kalhonbi kyu heiwaya Joseph'ne loumubi, aiyei cheemrei wattouwa upa heiya ani loushun, “Thimi rapya cheemwaira lou'unglhaklak, heitoubi an hatbini kadthunglak; ngamri thimirap heiri angtu nunghangri keikou chak chamalnarou.” 17Heisitoubi shok napawa heini Josephbei chay hilthungni louchanthungbi, ani thimi rapya Josephbei cheemwaira louruilhakpikur. 18Heirouri thimirap heiri chiwurchiya; ngamri yaya Josephbei cheemwaira namma lou'unglhakkur. Heirouri yani yunkril, “Kaya cheemwaira lou'unglhakur awari kani yuriyei kheenrou kaiyei cha'phitungka phonphopna rilla kaiyei tuy-yumrap louyaowurnei ngammeiroume. Heirou kaya kul chalphopbi aiyei shokrap hoiyernanungei, heirou kaiyei gadha rapkhi lunglounanungei rou silkuralleime!” 19Heirouri yani Josephbei cheemrei klei watlhousil upawayei leinara wachangbini, shumtrum pongra anungei warochakur. 20Yane kyun, “O upawa, tanghakni lamkrini kari cha lorou toubi kyume. 21Heiya asitoubine thukkura, kani lamrakra yarekyeinang, kaiyei cha'phitungka rapya shutbi thiyeinungri, thilak, ka thimi napung kantangei tuykao heiri ai'aiyei cha'phitungka rilla, tuy mshingkhi khatchatomkhi rilmakni loukyao. Heirou tuyrap heiri kani tekchakhi toubaimakni kaihutni hanui yukthuleime. 22Heitoubi tuy deikhi hanui cha lothunanungei kaihutra yukthuleime; tuyrap heiri huni kaiyei cha'phitungka rilla phonphopkuro touri ka hukhatnikhi muchangmakura.” 23Heirouri napawa heini loukyun, “Na lhawai lahbi chimaklo; naiyei Pu Dunpu, heirou nai pawaeikhi Dunpune nai tuyrap heiri naiyei cha'phitungka rapbei rilla nanungei toubine haal'lhakpikur hoiroume; naiyei piwurkhou tuyrap heiri keine khouleime.” Heisi toubi ani Simeon'ya yanungei yenruithutpikur. 24Heirouri napawa heini yaya Josephbei cheemwaira ruilhakpibi, heirou yuiding tha shorthutpikur, heitoubi yani hut-ho choumthaikur, heirou ani yaiyei gadha rapkhi namh pishaikur. 25Heirouri yani nunghangnung Joseph'ne yenkallengei kaalnang loumlanpinungei toubine putchei rapkhi marshikbini louleikur; ngamri bi heirou chak chamalnaroume tounei pao heiri yani mayekkur.

26Heirouri Joseph'ne cheemra yenkallengei kheenrou, yani cheemwaira shinbi louklei hutthul put rapya anungei loumalanpikur, heitoubi yani thleira khuklu kanthrunchabi aya khrumkur. 27Heirouri ani yanungei yai bommai'yei ngamrou tlou loungaibi, heitoubi ani kyun, “Nane tarwurame toubi kyun nai pawa heiri kna'sa makni leileisanu! A heiri asilumpha ringleihuinu?” 28Heirouri yani loumallang, “Neishok kai pawari leileihuime, ari himakhui, ringleihui.” Heisitoubi yani lu sikhuplhakbini aya rikrai khrumkna mutkur. 29Heirou ani thiyeinung aiyei puiwiyei puknara akou pukmalkna aiyei naodongwa Benjaminya muwurnarouri, ani loukngai, “Nai keinungei yunpikur naiyei naodongwa touri heiriko?” Heirouri ani kyun, “Keinaowa, neiyari Dunpune kringpibi phor pi hoiniyasu.” 30Heirou Joseph'ne aiyei nao dongwaya munarouri aiyei ukningra malungshithutdurbi chapnikurri loudouchangmakura; heitounei ngamrou ani aiyei bomthora hungchangurbi muni hungchapkur. 31Heitoubi ani mai tlamathaiwurbi, hanui wathukthu, heirou aitam aiyei ukning manphopbi kyun, “Chak-an heimarshikthutlaka.” 32Heitoubi yani Josephya bi khatra omyerbi, heirou yai teinao rapyani bi laikhatra omyerkur; heitoubi Egyptbei thimi rapyari bi khatra omyerbi chamaiyerkur; ngamri Egyptbei thimi rapneri Hebrewa rapleri omkanthrinbi chamalkna yamak; kouweiyo toulanungri, Egyptbei thimi rapne yakou chamalkna heiri kmangh lhoume toubine klou. 33Heirou yani aiyei maibongra maikroni omkallukrilbi, upathang knaini naodongchaya hungtongyerkur. Heisi tounarouri yani khatle khat kngakni thirilkur. 34Heirou Joseph'ne aiyei anlukrei anchum khulloubi yaiyei anlukra waiknaini yenlhakpikur; heiya Benjamin'nungeiri yanungei khullhakpikurya duini siruk phanga Joseph'ne khullhakpikur. Heisitoubi yani heiniyei masanungri kalthi nungkngaini, heirou houklumni chamaibi yarekkur.

Currently Selected:

KANTHOUNA 43: MARIBSI

Highlight

Copy